Manipud Kadagiti Agbasbasa

Dagiti Pagbaludan Pagyamanan unay kadagiti artikuloyo maipapan iti suheto a “Makapagbalbaliw Kadi Dagiti Balud?” (Mayo 8, 2001) Naibaludak iti 14 a tawen. Bayat ti pannakaibaludko, naam-ammok dagiti Saksi ni Jehova, ket rinugiak nga inadal ti Biblia. Idi nawayawayaanak, intultuloyko ti nagadal, ket di nagbayag nabautisaranak. Makapagbalbaliw dagiti balud no surotenda dagiti prinsipio nga isursuro ti Biblia. Mabalinda met ti agyaman​—a kas kaniak​—kadagiti nagaget a Saksi a mangipapaay iti panawenda a tumulong kadagiti naibalud.

R. S., Estados Unidos

Addaak ita iti maysa a koreksional a pasilidad. Naipalubos ditoy a maangay ti nagsayaat a programa a panangisuro dagiti Saksi ni Jehova. Nabautisaranen ti maysa a balud, ket adu a sabsabali pay ti makipagad-adal iti Biblia. Anian a nagsayaat ti agserbi ken Jehova uray sadino ti ayantayo!

J.A.M., Estados Unidos

Ditoy Japan, mariknak no dadduma a narigat ti makisarita kadagiti tattao maipapan iti Biblia. Ngem pinaregtadak dagitoy a kakabsat nga agpampannuray ken Jehova ken mangyad-adal iti Biblia kadagiti balud. Agyamanak ta impakaammoyo kadakami no kasano ti kinapinget dagitoy a kakabsat. Maudi itan nga al-aldaw, isu a rumbeng a lalo a pabilgen ti tunggal maysa kadatayo ti relasiontayo ken Jehova.

K. D., Japan

Iti walo a tawenen a pannakaibaludko, makitak a mismo a saan a matungtungpal dagiti pagbaludan ti panggepda. Ti naballigi isut’ panangisuro iti Biblia a kas iti ar-aramidenyo. Kas maysa a balud, talaga nga agyamanak kadagiti Saksi ni Jehova a mangipakpakita iti ayat kadakami a nagkamali ngem ikagkagumaanmi nga aturen dayta tapno agbalinkami a nasaysayaat a tattao.

R. J., Estados Unidos

Bayat a pinidutko daytoy a ruar, pinampanunotko no siasino ngata ti interesado nga agbasa iti dayta. Iti dayta met la a rabii, adda nagtelepono kaniak. Adda nangraut ken ni nanangko, ket tinakawda ti kotsena. Bayat a nagsasaritaanmi kadagiti katrabahuak ti maipapan iti krimen, dagiti kriminal, ken pagbaludan, nalagipko ti magasin iti locker-ko. Nagsayaat dagiti artikulona! Kabigatanna, inikkak iti kopia dagiti katrabahuak ken ni nanangko. Talaga a matungtungpal dagitoy nga artikulo ti panggep ti Agriingkayo!​—bayat a “sukimaten ken ipaganetgetna ti pudno a kaipapanan dagiti agdama a pasamak.”

R. S., Estados Unidos

Ti kaduak iti seldak ti damo a nakaammuak maipapan kadagiti Saksi ni Jehova. Talaga nga agyamanak a nakabasa iti kinatured dagiti Saksi ni Jehova a sumrek kadagitoy a pagbaludan tapno tulongan dagiti tattao a kas kaniak a mangbirok ken ni Jehova sakbay a naladawen ti amin. Rumbeng a makomendaran dagiti Saksi iti ayat nga ipakpakitada.

M. N., Estados Unidos

Makatulong dagitoy nga artikulo kadakami nga agtartrabaho iti pagbaludan agsipud ta isuroda a ti Biblia ket makatulong kadagiti balud tapno mabalbaliwanda ti kinatao, panunot ken pusoda. Tulonganda met dagiti balud a mangtarus iti akemmi a tumulong kadakuada a mangammo no kasano nga aramidenda ti pagayatan ni Jehova. Pagminaren dagiti ehemplo iti panid 10 no apay a ditay koma makibiang kadagiti problema dagiti balud maipapan iti linteg no di ket isurotayo kadakuada ti Biblia ken ikagumaantayo a danonen ti pusoda.

A. I., Romania

Panagpasiar Agtawenak iti 13, ket talaga a nagustuak a binasa ti artikulo a “Panagpasiar Idiay Ghana.” (Mayo 8, 2001) Kaay-ayok ti agbasa maipapan kadagiti animal. Pangngaasiyo ta diyo isardeng ti agimprenta kadagiti magasin!

J. W., Estados Unidos