Maysa a Tin-edyer a Pagpannakkelna ti Relihionna

IDI 13 ti tawen ni Andrew, natudingan nga agaramid iti proyekto ti grupoda idiay eskuelaan maipapan iti topiko a ‘tinawid a kultura.’ “Idi damo,” kunana, “planok ti agsurat maipapan ken ni lolok, ngem kalpasanna nalagipko: ‘Aguray! Maysaak a Saksi ni Jehova. Nagsayaat a gundaway daytoy tapno mairakurak ti pammatik!’

“Ti pinilik a tema ti proyektok ket ‘Salimetmetam ti Kinatibkermo (Stand Firm),’ ket nangaramidak iti dakkel a poster a mangiladawan iti naranggas a pannakaidadanes a sinagaba dagiti Saksi ni Jehova iti Nazi nga Alemania. Mairaman kadagiti inusarko a nangilawlawag isu ti ladawan ti uniporme nga addaan lila a trianggulo ken nadumaduma a retrato ken sursurat a naggapu iti pamilia Kusserow. * Kas maipadawat, addaanak kadagiti kopia ti surat nga impatulod dagiti Saksi ni Jehova iti gobierno ti Alemania, a nupay neutralda iti politika, sititibker a binabalawda ti di nainkalintegan a pannakabusor dagiti Saksi ni Jehova. Inggiddanko iti proyektok ti agtultuloy a panangipabuyak iti video a Jehovah’s Witnesses Stand Firm Against Nazi Assault. In-display-ko met dagiti Biblia, broshur, ken tract.

“Damo a naipabuya ti proyektomi iti gymnasium ti eskuelaan iti imatang amin nga estudiante ken mannursuro. Iti simmaganad a rabii, naawis ti pamilia ken gagayyem dagiti estudiante. Adut’ nagsaludsod kaniak, ta dida ammo a dagiti Saksi ni Jehova ket indadanes gayam dagiti Nazi.”

Inamin ni Andrew a kasapulanna ti tured a mangirakurak iti pammatina. “Ammok a rabakendak ti dadduma a tattao,” kunana, “ngem mariribukanak no diak inaramid dayta. Ti nakaisentruan ti proyektok ket dagiti tattao a nangipaay iti biagda tapno maidepensa ti pammatida ken Jehova, isu nga inkeddengko nga uray kaskasano, nabaelak nga inibturan ti sumagmamano a pammabalaw.”

Idi agangay, naragsakan ni Andrew ta inaprobetsarna daytoy a gundaway tapno makapangasaba. “Nagadu ti nakasaritak no apay a ditay makigubat, ket nakaipaimaak iti adu a Biblia, libro, ken tract kadagiti interesado,” kunana, sa innayonna pay: “Diakon makapanunot iti tiempo nga ad-adda a pagpannakkelko ti panagbalinko a maysa kadagiti Saksi ni Jehova.”

[Footnote]