Panangandingay ken Panangngaasi Manipud iti Adu a Lugar

DAGITI boluntario ket naggapu iti dadduma a paset ti Estados Unidos agraman iti dadduma pay a pagilian. Maysa kadagita a boluntario isu ni Tom (makita iti ngato), nga agtawen iti 29. Isut’ maysa a bombero a taga Ottawa, Canada. Imbagana iti Agriingkayo!: “Nakitak dagiti napasamak iti TV isu a kayatko a tulongan dagiti padak a bombero ditoy New York. Nagmanehoak nga immay ditoy idi Biernes ket napanak iti Ground Zero (nakapasamakan ti didigra) idi Sabado tapno tumulong. Naikabilak iti maawagan nakabaldi a grupo, nga agpala kadagiti rebbek sa ikarga dagitoy kadagiti baldi.

“In-inut a sinukainanmi dagiti rebbek, tunggal sangapala. Birbirokenmi dagiti banag a mabalin a pamalatpatan iti kinasiasino dagiti natay a bombero. Nakasarakak iti alikamen a Halligan a mausar a paglukat kadagiti nakatulbek a ridaw, agraman paspaset a mangikonekta iti hose. Narigat a trabaho dayta. Uray adda agarup 50 a boluntario, dua nga oras ti mabusbos a mangpunno iti maysa a dump truck.

“Idi Lunes, Setiembre 17, inruarmi ti bangkay ti sumagmamano a bombero a napan a dagus iti pasdek idi napan a Martes. Diakto pulos malipatan dayta a buya​— simmardeng a nagtrabaho ti amin a trabahador nga agal-alaw, inikkatda dagiti mangsalaknib a kallugong ken helmetda, sada timmakder​—kas panagraem kadagiti natay a padami a bombero.

“Bayat nga agtaktakderak a mangbuybuya iti mapaspasamak iti Ground Zero, mapampanunotko ti kinarasi ti biag ita. Napanunotko ti biagko, ti trabahok, ti pamiliak. Kasano man ti kinarisgona, makagunggona unay ti trabahok​—ta makatulongak kadagiti tattao ken mabalinko pay nga ispalen ti adu a biag.”

Mangitukon Dagiti Saksi iti Praktikal a Tulong

Iti immuna a dua nga aldaw ti didigra, agarup 70 a tattao ti nagkamang iti sangalubongan a hedkuarter dagiti Saksi ni Jehova. Dadduma a naawanan iti otel ken alikamen ti naikkan iti lugar a pagnaedan ken kawes a pagsukatan. Nataraonanda. Mabalin a ti napatpateg pay ket ti emosional a panangsaranay kadakuada dagiti aduan kapadasanen a Kristiano a panglakayen.

Nagipatulod met dagiti Saksi kadagiti pang-emerhensia nga alikamen ken suplay para kadagiti agsapsapul ken agal-alaw a grupo nga agtartrabaho iti naawagan Ground Zero. Adda met naipaay a pagluganan ti fire department tapno makapan dagiti bombero iti lugar a pagalawanda. Ni Ricardo (iti kannawan a ngato), a maysa a 39 anyos a Saksi ken agtartrabaho a basurero, ket inaldaw a nakipaset, agraman ti ginasut a sabsabali pay, a mangikkat kadagiti tonetonelada a rebbek. Imbagana iti Agriingkayo!: “Makapadanag unay ti  buya, nangruna para kadagiti bombero, a mangbirbirok kadagiti napukaw a kakaduada. Nakitak ti panangiguyodda iti maysa a sibibiag a bombero. Natay ti maysa pay a bombero ta natupakan iti natnag a bangkay. Agsangsangit ti adu a bombero. Diak met nakaibtur isu a nagsangitak. Iti dayta nga aldaw, awanen ti naturtured pay ngem kadakuada.”

“Ti Tiempo ken ti Di Mapakpakadaan a Pasamak”

Rinibu a tattao ti natay iti didigra. Mairaman kadagitoy ti 14 a Saksi, nga adda idi sadiay wenno iti asideg ti nakapasamakan ti didigra. Ni Joyce Cummings, a 65 anyos ken dati a taga Trinidad ket nakitulag iti dentistana iti asideg ti World Trade Center. Daksanggasat ta tiempo idi a napasamak ti didigra. Nalawag nga adu unay nga asuk ti nalang-abna isu a naitaray iti asideg nga ospital. Dida nasalbar. Ti napasamak kenkuana ket maysa kadagiti adu a kasasaad dagiti tattao a makapaspasar kadagiti epekto ti “tiempo ken ti di mapakpakadaan a pasamak.” (Eclesiastes 9:11) Naammuan nga isut’ maysa a nakaregregta nga ebanghelisador.

Ni Calvin Dawson (kitaem ti kahon) ket agtartrabaho iti maysa a kompania iti maika-84 a kadsaaran ti makin-abagatan a tower. Adda idi iti opisinana ket nalawag a nakitana ti makin-amianan a tower kalpasan unay a sinalput daytoy ti maysa nga eroplano. Immawag ti amona, nga awan idi iti opisinana, tapno ammuenna ti napasamak. Kinuna ti amona: “Ibagbaga idi kaniak ni Calvin ti nakitana. Kinunana, ‘Tumtumpuak dagiti tattao!’ Imbagak kenkuana a rummuar idiay ken paruarenna ti dadduma iti opisinada.” Saan a nakaruar ni Calvin. Intuloy nga imbaga ti amona: “Nagsayaat a tao ni Calvin ken apresiaren ti amin, agraman dagiti saan a naespirituan a kas kadakami. Apresiarenmi ti panagayatna iti Dios ken ti kinamanangngaasina.”

Ti sabali pay a biktima a Saksi ket ni James Amato (makimbaba iti kannawan iti bangir a panid), nga ama ti uppat nga annak ken kapitan ti New York fire department. Kuna dagiti makaam-ammo kenkuana a nakaturtured ta “uray la nga  ulienna ti maur-uram a pasdek uray no pumampanawen dagiti tattao.” Naital-o ti ranggo ni James kas hepe ti batalion uray no awanen.

Ti sabali pay a Saksi, a pito a tawenen a bombero, ket ni George DiPasquale. Isut’ asawa ni Melissa, ket ti dua ti tawenna a ni Georgia Rose ti anakda a babai. Isut’ maysa a panglakayen iti kongregasion dagiti Saksi ni Jehova idiay Staten Island. Adda idi iti maikasangapulo a kadsaaran ti makin-abagatan a tower idi narbek daytoy. Natay met gapu iti panangikagumaanna a mangispal iti sabsabali.

Dagitoy ket dua laeng kadagiti ginasut a bombero, polis, ken pang-emerhensia a trabahador a nakeltay ti biagda idi situtured nga ikagkagumaanda nga ispalen dagiti tattao. Di nalabes ti panangipaganetget iti kinatured dagitoy a para alaw. Kinuna idi agangay ti mayor iti New York City a ni Rudolph Giuliani, kadagiti naital-o ti ranggoda a bombero: “Ti kinatulokyo a mangsarakusok iti karirigatan a kasasaad ket maysa nga inspirasion kadakami amin . . . Ket awanen . . . ti nasaysayaat a pagwadan iti kinatured ngem ti Fire Department iti New York City.”

Makaliwliwa a Ministerio

Kadagiti aldaw kalpasan ti trahedia, agarup 900,000 a Saksi ni Jehova iti Estados Unidos ti nangikagumaan a nangliwliwa kadagiti agladladingit iti intero a pagilian. Nagutugotda a mangliwliwa kadagiti agladladingit gapu ta ay-ayatenda ti padada a tattao. (Mateo 22:39) Iti ministerioda, inkagumaanda met nga impatuldo ti kakaisuna a pudno a namnama iti marirriribukan a sangatauan.​—2 Pedro 3:13.

Naasi ti iyaadani dagiti Saksi iti publiko. Panggepda ti mangipaay iti liwliwa manipud iti Kasuratan ken tuladen ti makapagin-awa nga ulidan ni Kristo, a nagkuna: “Umaykayo kaniak, dakayo amin a mabambannogan ken madagdagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo. Ta ti sangolko nalanay ken ti awitko nalag-an.”​—Mateo 11:28-30.

Napalubosan ti adu a grupo dagiti panglakayen iti lokal a kongregasion dagiti Saksi ni Jehova idiay Manhattan a mapan iti Ground Zero tapno makisarita ken liwliwaenda dagiti agal-alaw a trabahador sadiay. Maragsakanda unay. Kastoy ti imbaga dagitoy a ministro: “Makasangit dagiti lallaki sadiay bayat nga iranranudmi dagiti teksto kadakuada.” Agin-inana dagiti agal-alaw a trabahador iti maysa a barangay idiay sangladan. “Maup-upay unay dagiti lallaki, nakadumogda, ta dida la ngamin maibturan ti nakitada. Nakitugawkami kadakuada ket inranudmi dagiti teksto ti Biblia kadakuada. Nagyaman unay dagiti lallaki kadakami gapu iti iyaaymi, ket imbagada a talaga a kasapulanda daytoy a liwliwa.”

Dagiti tattao a nasarungkaran kalpasan ti didigra masansan a kayatda nga adda basaenda, isu a rinibu a broshur ti naipadawat kadakuada. Dadduma kadagitoy ti No Adda Matay nga Ay-ayatenyo, Will There Ever Be a World Without War?, ken Pudno Aya a Maseknan ti Dios Kadatayo? Kasta met naikkan iti naisangsangayan nga atension ti serye a nagparang iti akkub ti dua a ruar ti Agriingkayo!: “Ti Baro a Langa ti Terorismo” (Mayo 22, 2001) ken “Panangdaer iti Post-traumatic Stress” (Agosto 22, 2001). Iti adu a kasasaad, inlawlawag dagiti Saksi ti namnama ti Biblia maipapan iti panagungar. (Juan 5:28, 29; Aramid 24:15) Nalabit naidanon ti kastoy a makaliwliwa a mensahe iti minilion a tattao.

Pagpanunotennatayo Koma

Pagpanunotennatay koma dagiti didigra a kas iti napasamak idiay New York City maipapan iti ar-aramidentayo iti biagtayo. Agbibiagtayo kadi a maipaay laeng iti agimbubukodan a panggep, wenno ikagkagumaantayo a paragsaken ti sabsabali? Inyimtuod ni mammadto a Mikias: “Ania ti kidkiddawen kenka ni Jehova no di ti panangwatwat iti kinahustisia ken panangayat iti kinamanangngaasi ken panagbalin a naemma iti pannakipagna iti Diosmo?” (Mikias 6:8) Ti kinaemma ti mangtignay koma kadatayo nga agkonsulta iti Sao ti Dios tapno maammuantayo ti pudno a namnama para kadagiti natay ken no ania ti asidegen nga aramiden ti Dios tapno agbalin manen a Paraiso dagiti kasasaad ditoy daga. No kayatmo a maammuan ti ad-adu pay maipapan kadagiti kari ti Biblia, paregtaendaka a makiuman kadagiti Saksi ni Jehova iti sangakaarrubaam.​—Isaias 65:17, 21-25; Apocalipsis 21:1-4.

[Kahon/Dagiti Ladawan iti panid 11]

KARARAG NI TATIANA

Ti balo ni Calvin Dawson a ni Lena ti nangisalaysay iti Agriingkayo! maipapan iti kararag ti balasitangna a pito ti tawenna, sumagmamano nga aldaw kalpasan a naammuanna a saan a makaawid ni tatangna. Kalpasan a nagkararag ni Lena, kiniddaw ni Tatiana, “Mabalin kadi nga agkararagak, Mommy?” Immanamong ti ina. Nagkararag ni Tatiana: “Jehova, nailangitan nga Amami, kayatmi ti agyaman kenka iti daytoy a taraon ken iti biagmi ita nga aldaw. Ket kayatmi a kiddawen nga andingayendakami koma ken ni Mommy babaen ti espiritum tapno nabilegkami. Kayatmi met a kiddawen a ni Daddy ket andingayen met koma ti espiritum, tapno napigsa inton agsubli. Ket inton agsubli, sapay koma ta naimbag, napigsa, naragsak, nasalun-atto, ken makitaminto manen. Iti nagan ni Jesus . . . ay, ken dikay met liplipatan a pabilgen ni Mommy. Amen.”

Gapu ta saan a sigurado ni Lena no naawatan ni Tatiana, kinunana: “Tiana, nagpintas ti kararagmo. Ngem, Honey, ammom kadi a saanen nga agawid ni Daddy?” Dagus a nalidayan ti rupa ni Tatiana. “Saanen nga agawid?” kinunana. “Saanen,” kinuna ti ina. “Impagarupko no imbagakon dayta kenka. Impagarupko no naawatam a saanen nga agawid ni Daddy.” Kinuna ni Tatiana: “Ngem sangkaibagam kaniak nga agsubli inton baro a lubong!” Idi maamirisna met laengen no ania ti kayat a sawen ti anakna, kinuna ni Lena: “Ladingitek, Tatiana. Diak naawatan ti kayatmo a sawen. Impagarupko no ti kayatmo a sawen ket agsubli ni Daddy inton bigat.” Kinuna ni Lena: “Naragsakanak ta agpaypayso ti baro a lubong kenkuana.”