Agimtuod Dagiti Agtutubo . . .

Apagapaman a Panaginteres iti Okulto​—Ania ti Pagdaksanna?

TALAGA kadi nga interesado dagiti tin-edyer iti okulto? Pinadas ti maysa a grupo dagiti managsirarak nga ammuen babaen ti panangsurbeyda kadagiti estudiante iti 115 nga eskuelaan ti grado 5 aginggat’ grado 8 ken haiskul. Kastoy ti estadistika a naammuan ti surbey: Nasurok a kagudua kadagiti napagsaludsodan (54 a porsiento) ti nangibaga nga interesadoda iti okulto ken iti datdatlag, idinto ta kakapat (26 a porsiento) ti nangibaga nga “interesadoda unay.”

Kastoy ti insurat dagiti managsirarak iti University of Alaska idiay Anchorage: “Dagiti estoria kadagiti periodiko ken magasin maipapan iti maipagarup a kasta unay nga irarang-ay ti aktibidad ti sataniko a kulto . . . ket nagraira kadagiti kallabes a tawen.” Sigun kadagiti eksperto, bassit ti natibker nga ebidensia a mangpatalged nga agsaksaknap ti Satanismo kadagiti agtutubo. Nupay kasta, di pagduaduaan nga adu nga agtutubo ti interesado kadagiti aspeto ti Satanismo ken okulto, uray no gagangay laeng ti kasta a panaginteres.

‘Ania ti pagdaksan ti apagapaman a panaginteres iti okulto?’ nalabit iyimtuod ti dadduma nga agtutubo. Kas sungbat, ammuentayo nga umuna ti sumagmamano a pamay-an a makiraman dagiti agtutubo iti okulto.

Ti Pangallukoy ti Okulto

Iti maysa nga artikulo iti U.S. News & World Report, “nalakan a makagun-od ken makabuya dagiti ubbing ken tin-edyer itatta iti makariribuk​—masansan a makasinga​—a nagadu a ladawan ken impormasion a di maipagarup a magun-odan 20 a tawen ti napalabasen.” Ti panagusioso ti mangdurog kadagiti agtutubo tapno agbasada kadagiti libro ken magasin, agbuyada kadagiti video, ken agsukisokda iti material a mangitampok iti okulto kadagiti Web site iti Internet.

Sigun iti BBC News Online, dagiti nalatak a programa iti TV a mangitampok iti panagkulam ken ar-aramid ti bampira ti “manggutugot kano iti panaginteres dagiti ubbing iti panagkulam.” Kasta met a dadduma a musika a heavy-metal ti mangitampok kadagiti naranggas wenno sinasairo a tema. Nagsurat ti kolumnista a ni Tom Harpur iti periodiko ti Toronto a The Sunday Star: “Masapul a mangiruarak iti kabilgan a pakdaar maipapan iti mapaspasamak [iti musika]. . . . saanak pay a pulos a nakakita iti aniaman a nakadakdakes a banag. Dagiti kanta ket naglaon kadagiti liriko maipapan iti kinamauyong, panagpagunggan, sairo, panangibukbok iti dara, panangilunod, amin a kita ti kinaranggas, agraman panangrames, panangsugat iti bagi, panangpapatay, ken panagpakamatay. Ti ipapatay ken pannakadadael, panangipadto iti didigra, panangilibak iti aniaman a kinaimbag ken panangawat iti amin a naalas ken dakes​—dagitoy ti temada.”

Makadangran aya iti kababalin ti maysa a tao ti panangdengngeg kadagita a musika? Nabatad a kasta ti napasamak iti kaso ti 14 anyos nga  agtutubo idiay Estados Unidos a nangbagsol ken ni nanangna agingga a natay sa nagpakamatay kalpasanna. Napno dagiti diding ti siledna kadagiti poster dagiti musiko iti heavy-metal. Impakpakaasi ni tatangna idi agangay: “Ibagayo kadagiti nagannak a siputanda ti musika a dengdenggen ti annakda.” Imbagana a makalawas sakbay a pinatay ti barona ni nanangna, kanayon a kankantaenna ti maysa a kanta a rock “maipapan iti dara ken panangpapatay iti nanangmo.”

Malaksid iti dayta, adda met dagiti ay-ayam a mangtulad iti karakter, nga iti sumagmamano kadagitoy, mapalubosan dagiti makipaset a mangtulad iti karakter dagiti mangkukulam ken dadduma a persona iti okulto. Adu kadagitoy nga ay-ayam ti mangitampok iti sinasairo a kinaranggas. *

Nupay kasta, kastoy ti ipadamag ti managsirarak nga organisasion a Mediascope: “Sigun kadagiti panagadal, ti pannakaay-ayo iti musika a heavy metal ket mabalin a naisangsangayan a mangipakaammo iti panagputputong, panagabuso kadagiti substansia, sakit ti isip, pagannayasan nga agpakamatay, . . . wenno peligroso a kababalin kabayatan ti kinaagtutubo, ngem ti musika ket saan a pakaigapuan dagitoy a kababalin. Maipagarup a dagiti tin-edyer a datin a mangsarsaranget kadagita a parikut ket mabalin a maallukoy iti musika a heavy metal, agsipud ta dagiti liriko ti mangyebkas iti mismo a nariribuk a riknada.”

Mabalin a saan nga umannugot ti amin a managsirarak kadagiti peggad ti panagimdeng iti sataniko a musika. Ngem saan aya a makasabidong ti panunot ti naynay a panagdengngeg ken panagbuya kadagiti video, musika, wenno ay-ayam a mangitampok iti kinaranggas ken panangdadael iti bagi? Ngem para kadagiti Kristiano, adda pay napegpeggad nga ibunga ti apagapaman a panaginteres iti okulto.

Panangmatmat ti Dios iti Okulto

Iti 1 Corinto 10:20, namakdaar ni apostol Pablo kadagiti Kristiano: “Diak kayat nga agbalinkayo a makiramraman kadagiti sairo.” Siasino aya dagiti sairo, ket apay a napeggad unay ti pannakinaig kadakuada? Iti simple a pannao, dagiti sairo ket dati nga anghel, nga inkeddengda ti sumurot ken ni Satanas a Diablo. Ti Satanas kaipapananna ti “Bumusbusor” ket ti Diablo kaipapananna ti  “Manangpardaya.” Sigun iti Biblia, daytoy dati nga anghel nga anak ti Dios pinagbalinna ti bagina a bumusbusor ken manangpardaya babaen ti panangikeddengna nga agrebelde iti Dios. Idi agangay, inallukoyna ti dadduma pay nga anghel a makikadua kenkuana iti rebelioso a kababalinna. Dagitoy a nakikadua kenkuana ket nagbalinda ngarud a sairo.​—Genesis 3:1-15; 6:1-4; Judas 6.

Ni Jesus inawaganna ni Satanas a “ti agturay iti daytoy a lubong.” (Juan 12:31) Addaan ni Satanas ken dagiti sairona iti “dakkel a pungtot” gapu ta asidegen ti pannakadadaelda. (Apocalipsis 12:9-12) Di pakasdaawan a nadamsak dagidiay nainaig kadagiti sairo. Maysa a babai idiay Suriname a dimmakkel iti pamilia a mangal-alagad iti espiritismo ti nakakita a mismo no kasano a dagiti sairo “pagay-ayatda a tutuoken dagiti agkitakit nga agbalin a biktimada.” * No kasta, nakapegpeggad ti pannakinaig kadagitoy nauyong nga espiritu a parsua iti aniaman a pamay-an!

Gapu iti daytoy, imbilin ti Dios iti nagkauna nga ilina a dagiti Israelita, a liklikanda ti amin nga aramid a nainaig iti okulto. Impakdaar ti Deuteronomio 18:10-12 nga “isuamin nga agar-aramid kadagitoy a banag ket nakarimrimon ken Jehova.” Mapakdaaran met dagiti Kristiano a dadaelento ti Dios ‘dagidiay mangan-annurot iti espiritismo.’ (Apocalipsis 21:8) Kondenaren ti Dios uray ti apagapaman a panaginteres iti okulto. “Isardengyo a sagiden ti di nadalus a banag,” ibilin ti Biblia.​—2 Corinto 6:17.

Ilalapsut iti Ar-aramid a Nainaig iti Okulto

Nagbiddutka kadin iti apagapaman a panaginteres iti okulto? Usigem ngarud ti napasamak iti siudad ti Efeso idi immuna a siglo. Adu sadiay ti “nangan-annurot kadagiti arte ti panagsalamangka.” Ngem natignay ti dadduma iti nabileg a pannakabalin ni apostol Pablo babaen ti tulong ti nasantuan nga espiritu. Ania ti nagbanaganna? “Adu kadagidiay nangan-annurot kadagiti arte ti panagsalamangka inyegda a pinagkaykaysa dagiti libroda ket pinuoranda ida iti sanguanan ti isuamin. Ket pinattapattada a sangsangkamaysa dagiti gatadda ket nasarakanda nga agpategda iti limapulo ribu a kapisi ti pirak. Ngarud iti nabileg a pamay-an nagtultuloy a rimmang-ay ken nagballigi ti sao ni Jehova.”​—Aramid 19:11-20.

Ania ti ipasimudaag amin dagitoy kadatayo? No kayat ti maysa a tao ti lumapsut kadagiti sairo, masapul a dadaelenna ti amin a ramramit a nainaig iti sataniko a panagdayaw! Ramanen dagitoy ti amin a libro, magasin, poster, komiks, video, karkarading (bambanag a maisuot kas “anib”), ken sinasairo a material a naggapu iti Internet. (Deuteronomio 7:25, 26) Ibellengmo ti aniaman a ramramit a mabalin a mausar iti panagpadles, kas kadagiti bola a kristal wenno Ouija board. Ibellengmo met dagiti musika wenno video a mangitampok kadagiti sataniko a tema.

Nakired a nakem ken determinasion ti kasapulan iti panangaramidmo kadagita a natured a pamuspusan. Ngem adu dagiti pagimbaganna. Gimmatang ti maysa a Kristiano a babai nga agnagan Jean * iti ay-ayam iti computer a kasla saan a makadangran idi damo. Bayat nga intultuloyna ti nagay-ayam, natakuatanna dagiti aspeto iti ay-ayam nga addaan kadagiti espiritistiko a tema. Di nagbayag, nangrugin a mabatibat kadagiti naranggas a buya! “Bimmangonak iti tengnga ti rabii,” kuna ni Jean, “ket dinadaelko dagiti CD ti ay-ayam.” Ania ti nagbanaganna? “Nanipud idin, awanen ti aniaman a nangriribuk kaniak.”

Agballigika no ipakitam a talaga a determinadoka a lumapsut. Lagipem ti determinasion ni Jesus idi pinadas ti Diablo a sulisogen nga agdayaw kenkuana. “Kinuna kenkuana ni Jesus: ‘Pumanawka, Satanas! Ta adda a naisurat, “Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.”’ Kalpasanna pinanawanen ti Diablo.”​—Mateo 4:8-11.

Saanmo a Labanan a Siksika

Palagipannatayo ni apostol Pablo nga amin a Kristiano ket ‘addaan iti pannakigubal . . . maibusor kadagiti nadangkes nga espiritu a puersa kadagiti nailangitan a disso.’ (Efeso 6:12) Ngem saanmo a padasen a labanan ni Satanas ken dagiti sairona a siksika. Agpatulongka kadagiti managbuteng iti Dios a dadakkelmo ken kadagiti panglakayen iti kongregasion Kristiano. Mabalin a nakababain ti panangipudnom a nakipasetka, ngem mabalin a daytanto ti makagapu a magun-odam ti kasapulam unay a panangandingay.​—Santiago 5:14, 15.

Laglagipem met a kuna ti Biblia: “Busorem ti Diablo, ket isu agtalawto kenka. Umadanika iti Dios, ket isu umadaninto kenka.” (Santiago 4:7, 8) Wen, andingayennaka ni Jehova a Dios! Tulongannaka a lumapsut iti silo ti okulto.

[Footnotes]

[Ladawan iti panid 26]

Ibellengmo ti amin a banag a nainaig iti sataniko a panagdayaw

[Ladawan iti panid 26]

Agannadka kadagiti Web site a mangitandudo iti espiritismo