Manipud Kadagiti Agbasbasa

Da Lolo ken Lola Kabasbasak ti artikulo nga “Agimtuod Dagiti Agtutubo . . . Kasano nga Agbalinak a Nasingsinged Kada Lolo ken Lolak?” (Mayo 22, 2001) Nabayagen nga iparparegta ti dadakkelko nga agbalinak a nasinged kada lolo ken lolak, ngem gapu ta kanayon nga adda pagginnuraan ti dadakkelko ken ti nagannak ni nanangko, kanayon idi a pagarupek a rumbeng a diak ida kasarsarita. Daytoy nga artikulo ti nakatulong kaniak a mangamiris a kayat ni Jehova nga agbalinak a nasinged kadakuada. Imbes nga adda dasigak, dumasigak laeng ken ni Jehova.

C.L.M., Estados Unidos

Nagsayaat ketdin dagitoy nga artikulo maipapan kadagiti lolo ken lola! Maragsakanak unay ta dinakamatyo ti panagsurat. Iduldulin uray ti dadduma kadakami nga ‘ub-ubing pay’​—agtawenakon iti 36​—ti tunggal surat wenno kard a naipatulod kadakami. Nakapatpateg ti umawat iti maysa a banag malaksid kadagiti babayadan ken dagiti naikoreo a publisidad ken anunsio!

M. Q., Estados Unidos

Kayatko ti agyaman kadakayo gapu kadagiti artikulo maipapan kadagiti lolo ken lola iti Abril 22 ken Mayo 22, 2001 a ruar. Nupay adayo ti pagnanaedan ni lolak, nadungngo ti relasionko kenkuana a kas kadagiti nadeskribir kadagiti artikuloyo. Isut’ maysa a Saksi ni Jehova, ket adu ti isursurona kaniak maipapan kadagiti naespirituan a banag. No dadduma agsaganakami a dua para kadagiti Nakristianuan a gimong. Umun-uneg ti panagayatko ken ni Jehova kada makitak ti kinagagarna nga agserbi kenkuana. Tultulongandak dagitoy nga artikulo tapno mataginayon daytoy naisangsangayan a relasion. Pagyamanan unay!

G. M., Yugoslavia

Adda damagek. Masaksakit unay ni lolok nga ama ni tatangko, ket nagbassit ti makukuarta ni lolak. Kasano nga agbalinak a nasinged kadakuada idinto ta diak mabalin ti agpasiar a kaduada?

T. O., Estados Unidos

Kastoy ti sungbat ti “Agriingkayo!”: No asideg ti pagnanaedan da lolo ken lolam, mabalin a pasaray sarungkaram wenno teleponuam ida. No usigem ti kasasaadda, mabalin nga agpaibaonka kadakuada. Kas nadakamat ti artikulo, ti panagsurat ket mabalin a maysa pay a pamay-an tapno agbalinka a nasinged kada lolo ken lolam. Aniaman ti kasasaad, sigurado nga apresiaren da lolo ken lolam ti aniaman a pamay-an ti pannakikomunikarmo kadakuada.

Dagiti Telepono Yantangay agtartrabahoak iti departamento ti pisika iti dakkel nga eskuelaan, apresiarek ti artikuloyo a “Konektadokan​—Kasano?” (Mayo 22, 2001) Naglawag ti pannakaisuratna, ket sapay koma ta makaparegta dayta kadagidiay pagarupenda a narigat a maawatan ti pisika.

S. T., Britania

Pagyamanan iti artikulo a “Konektadokan​—Kasano?” Sangkapanunotko idi daytoy a saludsod. Maysaak nga estudiante iti haiskul, ket kaay-ayok ti agbasa iti Agriingkayo! Dakkel ti maitultulong daytoy naintiempuan a publikasion iti adu nga aramidek a report idiay eskuelaan. Pagyamanan iti kinagagetyo!

H. W., Estados Unidos

Ti kable ti telegraph a naiwayat iti ballasiw ti Atlantico idi 1866 ket saan nga isu ti kaunaan. Ti kaunaan ket naiwayat iti nagbaetan ti Ireland ken Newfoundland idi 1858. Nalipatanen dayta gapu ta saan unay a nagbayag.

L. D., Britania

Kastoy ti sungbat ti “Agriingkayo!”: Imbaga laeng ti artikulomi nga “idi 1866 ti sibaballigi a pannakaisaad ti kable ti ‘telegraph’ a limmasat iti Atlantico iti nagbaetan ti Ireland ken Newfoundland.” Kas iti naammuanyo, ti kaunaan ket nairingpas idi 1858. Nupay kasta, saanen a maitutop nga usaren kalpasan ti sumagmamano a lawas isu nga idi agangay, nabaybay-anen.