“Ti Kararagsakan nga Aldaw iti Panagbiagmi”

TI KASAR ket naragsak nga okasion. Kinuna ti adu a pagassawaan: “Dayta ti kararagsakan nga aldaw iti panagbiagmi.” Ngem dayta met ti karirigatan a panawen. Mabalin a masikoran ken mabannog unay ti nobio ken nobia ken dagiti pamiliada gapu iti amin a desision ken panagsagana a kasapulan, agraman ti adu a tattao a masapul nga asikasuen ti nobio ken nobia iti dayta nga aldaw.

Ti kasar ti pangrugian iti baro a panagbiag ti agassawa. Ngem saan laeng nga isuda ti maapektaran. Tangay ti panagasawa ti balasangmo, barom, kabsatmo a babai wenno lalaki ket masansan a kaipapananna ti panangipasdek ti dungdungoem iti sabali a sangakabbalayan, masansan nga agkakanat ti rikna ti pamilia.

Agduduma dagiti kaugalian iti kasar iti nadumaduma a pagilian, ket daytat’ di mabalin a maisalaysay amin ditoy. Ipamaysa dagitoy nga artikulo ti nagbalinen a gagangay kadagiti Makinlaud ken umasping a pagilian. Mabalin a nangina unay sadiay ti agpakasar. Daddumat’ gumasto iti adu a kuarta kadagiti banag nga usarenda iti aldaw ti kasar, agraman ti panangabang iti lugar wenno restawran a pakaangayan ti boda ken ti panagpakan. Mapattapatta nga idiay Italia, ti promedio a magasto iti kasar ket nasurok a $10,000. Idiay Japan, kas iti dadduma pay a pagilian, mabalin a nanginngina pay. Gagangay a saan a ti nobio ken nobia ti agbayad, no di ket ti dadakkelda.

Dakkel a negosio ti kasar. Adu a kompania ti mangitandudo iti makuna a “naballigi” a kasar, nga awan a pulos ti pagkuranganna. Ngamin, kunada a “daytoy ti karagsakan nga aldaw iti panagbiagmo!” Isut’ gapuna a mangitukonda iti adu a “nasken” a produkto ken serbisio tapno “naballigi” ti kapatgan nga aldawmo. Mabalin nga adda dagiti awan kaaspingna nga imbitasion, ‘arapaapmo’ a trahe de boda, terna para kadagiti abay, ken amerikana wenno barong para kadagiti lallaki a gagayyem ken kakabagian ti nobio. Adda met sabsabong, kotse, nalabit restawran a pakaangayan ti boda, retratista, banda, ken dadduma pay. Ti listaan dagiti mabalin a tarigagayan ti nobio ken nobia, agraman ti naipakuyog a listaan ti paggastuan, mabalin a pagamkenna ti adu nga amma.

Iti nadumaduma a kagimongan, mayunay-unay ti panangannurot iti tradision. Adda wagas ti pannakaaramid amin dagitoy, ket manamnama nga annuroten ti nobio ken nobia ti tradision. Wen, adu ti masapul nga aramiden, ngem limitado ti tiempo a mangorganisar kadagitoy amin.

Makaparagsak wenno makapaupay? Aniaman ti sungbatmo, rumsua ti adu a saludsod no mausig ti amin a kasapulan iti kasar. Ania ti kaipapanan iti panagkasar kadagitoy nga aldaw? Talaga kadi a kasapulan amin daytoy tapno “nagarbo” ti kasar? Kasano a maliklikan ti nadumaduma a praktikal ken emosional a pakarigatan?

Nupay adu ti pakasikoran, adu ti sibaballigi a nangiplano kadagiti detalye ti kasarda ket tinagiragsakda ti okasion. Nalabit, dagiti kapadasanda ket makatulong iti dadduma nga agsagsagana nga agpakasar. Kasta met nga adda dagiti prinsipio ti Biblia a makatulong no maipalplano ti panagpakasar, tapno agbalinto dayta nga aldaw a makaay-ayo, naragsak, ken makapabileg iti amin.