Ti Panagasawa Agnanayon Koma a Singgalut

SIGUN iti konklusion ti adu a sine, matarigagayan unay a kalat ti panagasawa. Masansan nga agkadua laeng ti lalaki ken babai, agkasarda, ken agbiagda a “siraragsak kalpasanna.” Kadagiti pelikula, gagangay a kasta ti ngudo ti estoria.

Iti kinapudnona, ti kasar ket saan a ngudo, no di ket pangrugian laeng ti baro a panagbiagda nga agkadua. Ket manamnama, kas kunaen ti Eclesiastes 7:8 a ‘nasaysayaat ti tungpal ti maysa a banag kalpasanna ngem iti punganayna.’

Agnanayon a Singgalut

Kasapulan ti kinamanagsakbay. Ti panagasawa ket masapul nga addaan kadagiti natibker a pamuon tapno agpaut ken makapnek dayta. Ta no saan, mabalin a dakdakkel nga amang ti rigat a mapasaran kalpasan ti kasar ngem iti kasakbayanna. Saan a mabalin a makiasawa ti maysa a Kristiano a mangpampanunot iti: ‘No di agballigi, kanayon a mabalinko ti makidiborsio.’ Ti panagasawa ket masapul a matmatan kas agnanayon a singgalut.

Imbatad ni Jesus a ti panagasawa ket agnanayon idi sinungbatanna ti nayimtuod kenkuana maipapan iti kinaumiso ti diborsio. Kinunana: “Saanyo aya a nabasa a ti nangparsua kadakuada nanipud idi damo inaramidna ida a lalaki ken babai ket kinunana, ‘Iti daytoy a rason, ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag’? Iti kasta saandan a dua, no di ket maymaysadan a lasag. Gapuna, ti pinagsinnangol ti Dios saan koma a pagsinaen ti tao.”​—Mateo 19:4-6.

Kalpasan ti Aldaw ti Kasar

Siuumiso a naikuna nga iti biag ti maysa a Kristiano, ti panagasawa ket maikadua laeng ti kinapategna iti dedikasionna iti Dios. Ti dedikasion isinggalutna ti maysa a tao iti Namarsua iti agnanayon, ket ti bautismo ti mangiparangarang iti dayta iti publiko. Ti kasar isut’ publiko a deklarasion ti pannakitulag iti sabali a tao​—iti agnanayon. Di mabalin a maaramid ti dedikasion ti maysa a tao iti Dios wenno maisinggalut iti panagasawa no adda nakaro a panagduaduana. No kasta, dagidiay agpangpanggep a makiasawa nasayaat no usigenda a naimbag dagiti patpatien, kalat, ugali, ken disposision ti manamnama nga asawaen wenno pakiasawaanda.

Iti panagsagana iti panagpakasar, nasken ti kinamanangngaasi, kinamanagpanunot, ken ti panagtinnulong. Napatpateg pay dagita a kualidad  kalpasan ti kasar tapno naballigi ti panagasawa. Agin-innayat dagiti kakaskasar, ngem kalpasan ti kasar masapul a laglagipenda nga iti kada aldaw, ti ayat “saanna a sapulen dagiti bukodna a pagimbagan.” No tinawentawen a mayaplikar, “ti ayat saan a pulos aggibus.” (1 Corinto 13:5, 8) Babaen ti manayon nga ayat, dagiti kalidad a kas iti mabayag a panagitured, kinamanangngaasi, kinaimbag, kinaalumamay, ken panagteppel​—dagiti bunga ti espiritu ti Dios​—ket nalaklaka a maipakita. Nasken dagitoy a kalidad tapno agballigi ti panagasawa.​—Galacia 5:22, 23.

Ti panangitultuloy a mangipakita kadagita a kalidad kalpasan ti kasar ti narigat a pasetna. Nupay kasta, ti sekreto tapno maiparangarang dagita a nasasayaat a kalidad ket kastoy: Ayatem ti tao nga inkasarmo, ket situtulokka nga agsakripisio.

Kinuna ni Jesus a ti kadakkelan a bilin kadagiti tattao ket ayatenda ni Jehova, ken imbagana a ti maikadua a kadakkelan a bilin ket, “Ayatem ti padam a tao [wenno kaarrubam] a kas iti bagim.’’ (Mateo 22:39) Ti kaasitgan a kaarruba ti maysa a tao ket ti asawana, ta awan ditoy daga ti aniaman  a mamagsinggalut iti dua a tao a kas iti maaramidan ti panagasawa.

Nupay kasta, ti basta pisikal a panagnaig a mismo dina ipanamnama ti emosional a panagtunos. Ti panagnaig ti dua a bagi ket di kanayon a panagtunos ti dua nga isip. Tapno naan-anay a makapnek ti seksual a panagnaig, masapul nga adda sabali pay​—ti panaglantip dagiti puso ken panggep. Kaaduanna, masapul ti panagsakripisio agpaay iti sabali a tao tapno naballigi ti panagasawa. Asino ti agsakripisio? Ti asawa a lalaki? Ti asawa a babai?

Panangipakita iti Ayat ken Dayaw

Ibilin ti Sao ti Dios: “Iti panangipakita ti pammadayaw iti maysa ken maysa mangidaulokayo.” (Roma 12:10) No kabaelam, agsakripisioka sakbay pay a daytat’ kiddawen ti asawam kenka. Ngamin, no magun-odan ti maysa a banag kalpasan ti kanayon a panangkiddaw, saan unayen a napateg dayta. No kasta, rumbeng nga iyugali ti tunggal maysa kadagiti agassawa ti mangyun-una iti panangipakita iti dayaw iti sabali.

Kas pagarigan, maibilin kadagiti asawa a lallaki nga ‘itudinganda [ti asawa a babai] iti dayaw a kas iti narasrasi a basehas, ti babai, . . . tapno saan a malappedan dagiti kararag[da].’ (1 Pedro 3:7) No di padayawan ti lalaki ti asawana, malapdan pay ketdi dagiti kararagna iti Dios. Ania ngarud ti kaipapanan ti panangpadayaw iti asawana? Kaipapananna ti kanayon a panangikonsiderar kenkuana, panagimdeng iti opinionna ken masansan a panangted kenkuana iti gundaway nga isu ti umuna nga agpili iti nadumaduma a banag. Ket mabalin met a padayawan ti babai ti asawana babaen ti pannakitinnulongna kenkuana.​—Genesis 21:12; Proverbio 31:10-31.

Kuna ti Sao ti Dios: “Dagiti lallaki ayatenda dagiti assawada a kas kadagiti bukodda a bagi. Ti agayat iti asawana a babai ay-ayatenna ti bagina, ta awan pay a pulos ti tao a nanggura iti bukodna a lasag; no di ket taraonan ken ipatpategna dayta, a kas met ti panangipateg ti Kristo iti kongregasion.” Kasano ti panagayat ni Kristo kadagiti pasurotna? Isut’ situtulok a natay gapu kadakuada. Kuna pay ti Biblia: ‘Ayaten koma ti tinunggal maysa kadakayo [assawa a lallaki] ti asawana a kas ti panagayatna iti bagina.’ (Efeso 5:28-33) Ket ibaga ti Sao ti Dios kadagiti assawa a babbai nga “ayatenda dagiti assawada, . . . nga ipaspasakupda ti bagbagida kadagiti bukodda nga assawa, tapno ti sao ti Dios saan koma a mapagbassawangan.”​—Tito 2:4, 5.

Anusam Dagiti Biddut

Tangay amin a tattao ket naipasngay nga imperpekto, agbiddutda. (Roma 3:23; 5:12; 1 Juan 1:8-10) Ngem, imbes a padakkelem dagiti biddut, ipangagmo ti balakad ti Biblia: “Maaddaankayo iti nasged nga ayat iti maysa ken maysa, agsipud ta ti ayat abbonganna ti nakaad-adu a basol.” (1 Pedro 4:8) Ti pananglipat wenno di panangikankano kadagiti babassit a biddut ti kasayaatan a pamay-an ti panangtaming kadagitoy. Pudno met dayta kadagiti nakarkaro a biddut. Kuna ti Colosas 3:12-14: “Kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured. Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti panagdarumna maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo. Ngem, malaksid kadagitoy amin a banag, kawesanyo ti bagbagiyo iti ayat, ta dayta ket naan-anay a singgalut ti panagkaykaysa.”

Kasano koma ti kasansan a panangpakawantayo kadagiti babassit a biddut ti asawatayo? Nagimtuod ni Pedro ken Jesus: “‘Apo, mamin-ano nga agbasol kaniak ni kabsatko ket pakawanek? Agingga iti mamimpito?’ Kinuna kenkuana ni Jesus: ‘Kunak kenka, saan nga, Agingga iti mamimpito, no di ket, Agingga iti mamimpitopulo ket pito.’” (Mateo 18:21, 22) Tangay ibagbaga ni Jesus daytoy kadagidiay di naasawaan, anian nga ad-adda pay nga amang a nasken ti panagpinnakawan dagiti agassawa!

Nupay ti pannakayussuat ti panagasawa ket nagsagaba iti pannakarbek kadagiti kallabes a tawen, makalasatto met laeng kamaudiananna agsipud ta ti Dios ti nangyussuat iti dayta ket amin nga inaramidna “nasayaatda unay.” (Genesis 1:31) Dinto malaus. Ket mabalin nga agballigi dayta, nangruna kadagidiay mangraraem ken mangitantandudo iti bilbilin ti Dios. Ngem ti karit ket: Salimetmetanto ngata ti dua a tao ti karida idi aldaw ti kasarda nga aginnayat ken agpinnategda? Talaga a karit dayta, ken masapul nga ikagumaam tapno agballigika. Ngem makagunggonanto dagiti pagbanaganna!

[Kahon iti panid 10]

PANAGDIBORSIO KEN PANAGSINA

Ti Dios, a Nangyussuat iti panagasawa, diniseniona dayta tapno agbalin a permanente a panagtipon. Ngem adda kadi aniaman a Nainkasuratan a rason ti maysa a tao tapno idiborsiona ti asawana​—ket mapalubosan a mangasawa wenno makiasawa manen? Sinungbatan ni Jesus daytoy babaen ti panagkunana: “Kunak kadakayo a ti siasinoman a mangidiborsio iti asawana a babai, malaksid no maibatay iti pannakiabig, ket mangasawa iti sabali makaaramid iti pannakikamalala.” (Mateo 19:9) Ti seksual a pananggulib iti asawa ti kakaisuna a pakaibatayan ti diborsio a mangipalubos iti pannakiasawa manen ti di nakabasol nga asawa.

Kanayonanna, ti panagsina ket ipalubos ti sasao ti Biblia idiay 1 Corinto 7:10-16, nupay iparparegtana ti panagtipon ti agassawa. Dadduma, kalpasan ti panangikagumaanda a mamagtalinaed iti panagasawada, mariknada nga awan ti maaramidanda no di ti agsina. Ania ti mabalin a maanamongan a Nainkasuratan a pakaibatayan ti kasta a pamuspusan?

Ti maysa ket ti sipapakinakem a di mangsuportar. No mangasawa ti lalaki, ibaklayna ti rebbengen a mangsuportar kadagiti material a kasapulan ti asawa ken annakna. Ti lalaki a sipapakinakem a di mangipaay kadagiti material a kasapulan ti asawana ket “pinaglikudanna ti pammati ket isu dakdakes ngem ti tao nga awanan pammati.” (1 Timoteo 5:8) Isu a mabalin ti makisina.

Ti sabali pay ket ti aglablabes a pisikal a panangabuso. No kasta, no kanayon a pisikal nga abusuen ti asawa a lalaki ni baketna, mabalin a sinaan ti biktima. (Galacia 5:19-21; Tito 1:7) ‘Asinoman a mangay-ayat iti kinaranggas pudno unay a guraen ti kararua [ti Dios].’​—Salmo 11:5.

Ti sabali pay a pakaibatayan ti pannakisina ket ti naan-anay a panagpeggad ti espiritualidad ti manamati​—ti relasion ti maysa iti Dios. No ti panangbusor ti asawa, a nalabit pakairamanan ti pisikal a pananglapped, ti namagbalin nga imposible ti panangitultuloy iti pudno a panagdayaw ken mamagpeggad iti espiritualidad ti manamati, naamiris ngarud ti dadduma a manamati a nasken a makisinada. *​—Mateo 22:37; Aramid 5:27-32.

Nupay kasta, no makisina ti maysa a tao iti sidong dagita a kasasaad, dina mabalin ti makiasawa manen. Sigun iti Biblia, ti kakaisuna a nainkalintegan a pakaibatayan ti diborsio a mangipalubos iti pannakiasawa manen ket ti pannakikamalala wenno “pannakiabig.”​—Mateo 5:32.

[Footnote]

[Ladawan iti panid 9]

Matmatan koma ti panagasawa kas agnanayon nga urnos

[Ladawan iti panid 10]

Kinuna ni Jesus a rumbeng a mangpakawantayo iti “mamimpitopulo ket pito”