Manipud Kadagiti Agbasbasa

Kararag Ti artikulo nga “Agimtuod Dagiti Agtutubo . . . Denggento Ngata ti Dios Dagiti Kararagko?” (Hunio 22, 2001) talaga a pinabilegnak. Naawatko daytoy a magasin bayat a naidalitak iti ospital. Diak nakatabuno iti Kingdom Hall wenno iti kombensionmi. Talaga a naglidayak ket kasla diak idi madaeran ti riknak. Ti panagkararagko ken Jehova ti nangpakalma iti riknak, ket nakaskasdaaw ti pannakapagin-awa ti pusok. Maliwliwaak a makaammo a dinak pulos lipatan ni Jehova.

A. O., Japan

Agtawenak iti 18 ken maysa a regular pioneer, wenno amin-tiempo a managebanghelio. Iti napalabas a sumagmamano a bulan, nagleddaangak. Panagriknak ket kaslaak ken ni Steve, ti agtutubo a nadakamat iti artikulo, a nangibaga a no dadduma, mariknana a dina rumbeng a rengrengen ti Dios kadagiti problemana. Ngem impapusok ti pammagbaga ti Lucas 12:6, 7. Mas kalmado itan ti riknak ken natignayak a mangyebkas iti kaunggan ti pusok ken Jehova.

M. D., Nicaragua

Pinadakkel Dagiti Madre Adu ti impalagip kaniak ti artikulo a “Nupay ti Dadakkelko Binaybay-andak​—ti Dios Inayatnak.” (Hunio 22, 2001). Malagipko ti imbaga idi ni nanang kadakami maipapan iti panagbiagna iti kombento ken ti panangtrato kenkuana dagiti madre. Idi pimmanaw iti kombento idi agtawen iti 16, awan ti pagnaedanna. Adu a tattao ti nagsagaba iti kastoy a pannakamaltrato ken mabutengda a mangibaga iti dayta. Isu a maragsakanak ta naipablaak daytoy nga artikulo.

G. E., Estados Unidos

Salun-at Iti ruaryo a Hunio 8, 2001, binasak ti artikulo a “Moderno a Panangagas​—Kasano Kangato ti Maragpatna?” Kas ordinario a tao iti panangagas ken siensia, natakuatak a makapainteres unay ken makagunggona kaniak dagiti inlawlawag ken dinakamatyo a pakasaritaan ti panangagas. Idulinkonto daytoy a ruar.

E. F., Alemania

Panagdroga Kanayon a makaawatak kadagiti magasinyo manipud iti maysa a katrabahuak ket basbasaek ida. Ngem marigatanak a mangakseptar iti nabileg nga implikasion ti serye a “Panagdroga​—Adda Solusionna!” nga amin a musiko iti rock ket adikto iti droga. (Hulio 8, 2001) Nagadu ti musiko iti rock a di agus-usar iti droga ken napasnekda iti trabahoda.

M. M., Japan

Kastoy ti sungbat ti “Agriingkayo!”: Saanmi nga imbaga nga amin a musiko iti rock ket agdrogdroga. Nupay kasta, agpayso nga adu ti agdrogdroga a musiko iti rock ken agrayo kadakuada kadagiti konsiertoda.

Niagara Falls Kabasbasak ti artikulo a “Niagara Falls​—Makapaamanga a Kapadasan.” (Hulio 8, 2001) Nagustuak a binasa dayta. Nabiit pay nga impannak sadiay ni lakayko idi anibersario ti kasarmi. Impagarupko no makapauma. Nagkamaliak gayam! Ti pannakakitak kadagiti dissuor ket katupag laeng ti pannakangngegko iti daranudorda.

C. K., Estados Unidos

Kinunayo a ti panagreggaay ti bawek ti karayan ket napasamaken iti napalabas a 12,000 a tawen. Saan a maitunos daytoy iti salaysay ti Biblia maipapan iti sangalubongan idi a delubio.

R. P., Britania

Kastoy ti sungbat ti “Agriingkayo!”: Insalaysaymi laeng ti agdama a pattapatta dagiti geologo, ket saankami a nagkomento no kasano ti kinaumisoda. Kadagita a pattapatta, nabatad a di naamiris ti salaysay ti Biblia maipapan iti Layus idi kaaldawan ni Noe, a nabatad a napasamak awan pay 5,000 a tawen ti napalabasen.​—Mateo 24:37.