Natimbeng a Panangmatmat iti Trabaho

MAYSA a napasnek nga opisial ti militar ti nagtultuloy a nagtrabaho uray no tiempo ti pangngaldaw tapno malpasna ti trabaho a naganat a kasapulan ti superiorna. Idi nagsubli dagiti katrabahuanna kalpasan ti pangngaldaw, nasangpetanda a natayen a nakakul-ob iti trabahona iti lamisaanna.

Awan pay dua nga oras kalpasanna, nasdaaw ti padana nga opisial idi nagtelepono ti superiorda ket kinunana: “Kaasi met ni ​—​—​—, ngem kasapulak ti kasukatna inton bigat!” Nagpanunot dagiti nakapaliiw, Ti kadi laeng trabaho nga inaramid ti opisial ti napateg iti superiorna?

Daytoy agpayso a kapadasan ipaganetgetna ti kinapudno​—a masansan a marukod ti kinapateg ti maysa a tao babaen laeng iti maitulongna iti amona. Mabalin a magutugot ti maysa a tao nga agsaludsod: Agbibiagak kadi tapno agtrabaho, wenno agtartrabahoak tapno agbiag? Ania dagiti aspeto iti biagko nga isaksakripisiok gapu iti trabahok?

Panangaramid Kadagiti Nainsiriban a Desision

Dua kadagiti ibilang ti dadduma a kapatgan a desision iti biag ket masansan a maaramid a sidadarasudos​—ti panagpili iti asawa ken ti panagpili iti panggedan. Agpada a maibilang idi ti panggedan ken ti panagasawa a permanente a banag. Isu a mautob a naimbag ti panangpili iti tunggal maysa kadagitoy. Masansan a makalikaguman ti balakad dagiti natataengan a gagayyem wenno nagannak.

Ngem kadagitoy nga aldaw, agparang nga adut’ agpili iti asawaen wenno pakiasawaanda a maibasar laeng iti kinaguapo wenno kinaimnas, a kunaenda a no di agballigi ti panagasawada, mangbirokdanto iti sabali. Kasta met nga adut’ agpili iti panggedan gapu laeng iti makitada  a pagsayaatanna, a didan amirisen dagiti mabalin a pagdaksanna. Wenno mabalin a dagus a dida ikankano dagiti di makaay-ayo a kasasaadna ta kunaenda a, ‘Maipamuspusak dagita.’

Nakalkaldaang ta masansan a patien dagiti babbai kadagiti napangpanglaw a pagilian dagiti makaallukoy nga anunsio dagiti panggedan a mangikari iti nakapimpintas a panagbiag iti sabali a lugar. Ngem apaman nga addadan sadiay, masansan a maibaonda iti balay dagiti balangkantis. Ti panagbiagda sadiay kas balangkantis ket narigrigat pay ngem iti panagbiagda sakbayna. Sigun iti artikulo ti World Press Review, daytoy makapaalingget a moderno a panangtagabo ket maysa a “saplit a di maparmek.”

Mabalin kadi met a maallukoy dagiti tattao a mangawat iti gagangay a panggedan ket kalpasanna mariknada inton agangay a matagtagaboda? Mapaspasamaken daytoy! Kas pagarigan, agituktukon ti dadduma a kompania kadagiti naisangsangayan a pagragsakan ken pagnam-ayan dagiti trabahadorda. Mabalin a mairaman kadagitoy dagiti panganan ti pamilia ken gagayyem kadagiti pasdek ti korporasion, libre a lugan ken panagpa-dry clean, panagpadentista, panangusar kadagiti gymnasium, ken tulong a kuarta no manganda kadagiti nangingina a restawran.

“Adda maysa a kompania a mangtangtangdan pay ketdi iti ahensia ti pannaki-date para kadagiti empleadoda a mapaksuyan,” kuna ti periodista a ni Richard Reeves. Ngem agannadka! Inlawlawagna: “Mangitukon dagitoy a kompania kadagiti plano nga ad-adda a mangpanam-ay iti panagbiagmo, no la ket ta bay-am a kontrolenda ti biagmo; 18 nga oras nga agtrabahoka iti kada aldaw ket iti ngudot’ lawas, mangan, agehersisio, agay-ayam, ken maturogka idiay opisina tapno makapagserbika no kasapulandaka.”

Panangpili iti Nasaysayaat nga Alternatibo

Kuna ti kadaanan a proverbio: “Ti sibibiag nga aso nasaysayaat ngem iti natay a leon.” (Eclesiastes 9:4) Dayta a proverbio ket mangpataud iti saludsod nga, Isaksakripisiok aya ti biag wenno salun-atko gapu iti trabahok? Kas sungbat, inamiris manen ti adu ti kasasaadda ket nakasarakda iti pamuspusan a mangipaay iti umdas a kasapulanda​—agraman ti pamiliada no adda​—bayat a sagrapenda met ti naragsak ken makapnek a biag.

 Agpayso a masapul ti kinanumo no aramidem daytoy ken ikeddengmo no ania a talaga dagiti kasapulan ti maysa a tao, imbes a dagiti tarigagayan a di nasken. Dagidiay agsapsapul iti saad ken kinatan-ok mabalin a dida kayat ti agbiag iti kalkalainganna ken ibilangda pay ketdi a maag dagidiay kayatda ti agbiag a kasta. Ngem ania aya a talaga ti napateg iti biag? Nabiit pay kadi nga inwayaam nga inutob daytoy?

Ti masirib nga Ari a ni Solomon, a nangisurat iti naadaw itay a proverbio, ket nalabit nabakbaknang idi nga amang ngem iti asinoman a tao. Ngem iti pananggupgopna no ania a talaga ti napateg, napaltiingan a nagsurat: “Ti panungpalan ti banag, ti isuamin a nangngeganen, ket: Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.”​—Eclesiastes 12:13.

Maigiddato iti dayta, impateg ni Solomon ti trabaho. Insuratna: “Awanen ti nasaysayaat ngem iti pannanganna ket pudno nga uminum ken ipakitana iti kararuana ti naimbag gapu iti napinget a panagtrabahona.” (Eclesiastes 2:24) Impateg met ti Dakdakkel a Solomon a ni Jesu-Kristo ti trabaho a kas iti nailangitan nga amana. Inlawlawagna: “Ni Amak agtultuloy nga agar-aramid agingga ita, ket agtultuloyak nga agar-aramid.”​—Juan 5:17; Mateo 12:42.

Ngem limitado ti kapaut ti biag ti tao ita. (Salmo 90:10) Ammo ni Kristo a masagrapto ti napaut a biag iti sidong ti turay ti Pagarian nga insurona nga ikararag dagiti pasurotna. Isu nga indagadagna iti agdinamag a sermonna iti Bantay: “Itultuloyyo, ngarud, a sapulen nga umuna ti pagarian ken ti kinalinteg [ti Dios], ket amin dagitoy sabali pay a bambanag mainayonto kadakayo.”​—Mateo 6:9, 10, 33.

Maipapan iti biag iti sidong ti turay dayta a Pagarian, ikari ti Biblia: “Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; . . . ti aramid dagiti bukodda nga ima usarento a naan-anay dagidiay pinilik.”​—Isaias 65:21, 22.

Nagsayaat ketdin a namnama​—ti mangsagrap iti awan inggana a biag a pakairamanan ti addaan panggep ken makapnek a trabaho! Ti napasnek a panangutob iti mismo a kasasaadtayo ti mabalin a mangipalgak a rumbeng nga amirisentayo manen ti dadduma nga aspeto ti panagtrabahotayo ita tapno maliklikantayo dagiti peggad a mabalin a mangapektar iti panangsagraptayo iti “pudpudno a biag”​—ti biag iti masanguanan iti sidong ti Pagarian ti Dios. (1 Timoteo 6:19) Sapay koma ta ipakitatayo iti trabahotayo, wenno iti aniaman nga ar-aramidentayo, a raraementayo Daydiay nangted kadatayo iti biag.​—Colosas 3:23.

[Dagiti Ladawan iti panid 8, 9]

Iti sidong ti Pagarian ti Dios, tagiragsakento ti tattao ti trabaho nga agpadpada a natalged ken makapnek