Ti Diablo​—Pudno Aya nga Adda ken Dakes?

ITI adu a narelihiosuan a gunglo, ti Diablo ket maibilang laengen a relikia a nainaig iti an-anito​—a partuat ti tattao. Dayta ti gapuna a ti arsobispo iti Genoa a ni Dionigi Tettamanzi​—maysa kadagiti kangrunaan a kardinal iti Italia​—ket talaga a nakapataud iti riribuk babaen ti 40-panid nga opisial a suratna kadagiti klero no kasanoda a busoren ti Diablo. Nailista iti dayta ti “10 a bilin.”

Umuna: “Diyo liplipatan nga adda ti diablo,” agsipud ta ti “immuna a kinaulbod” a pinataudna ket ti “panangipapati kadatayo nga isut’ awan.”

Maikadua: “Diyo liplipatan a maysa a mannulisog ti diablo. . . . Diyo pagarupen a dinakay maan-ano wenno mabiktima.”

Maikatlo: “Diyo liplipatan a nasaririt unay ken nakalalaing ti diablo. Kanayon a nasikap babaen ti panagbalinna a makaay-ayo, kas iti inaramidna iti kaunaan a tao.”

Maikapat: “Agsalukagkayo: iti matmata ken pusoyo. Ket agbalinkayo a nakired: iti espiritu ken naimbag nga aramid.”

Maikalima: “Patienyo a naan-anay ti panagballigi ni Kristo iti mannulisog” agsipud ta daytoy ti “mamagbalin kadakayo a natalged ken natalna iti imatang ti kararanggasan a panangraut a mabalin a dumteng kadakayo.”

Maikanem: “Laglagipenyo a pagbalinennakayo ni Kristo a kaduana iti panagballigina.”

Maikapito: “Itultuloyyo nga ipangag ti Sao ti Dios.”

Maikawalo: “Agpakumbaba ken situtulokkay koma a maibabain.”

Maikasiam: “Kanayon nga agkararagkayo,” tapno madaeranyo ti pannulisog.

Maikasangapulo: “Ayatenyo ni Apo Dios ken isuna laeng ti pagdayawanyo.”

Ania ti epekto daytoy a surat kadagiti klero? Ti pammagbagana ket di inapresiar ti Milan’s Center of Theological Studies. Inrason ti Center a ti kasta a “teolohikal a panangtubay ket kaasping ti kapanunotan idi edad media.” Sigun iti maysa a pannakangiwat, “ti naan-anay a panangpabasol iti diablo ket mabalin a makatulong tapno maikkat kadagiti tattao ti [mismo a] sungsungbatanda.”

Nupay di ilibak ti Biblia a manungsungbat dagiti tattao kadagiti aramidda, silalawag nga iyam-ammona ni Satanas a Diablo kas “ti dios daytoy a sistema ti bambanag,” daydiay nangsulisog ken Jesus. Ipalgakna met ti pannakabalin ni Satanas ken ti panggepna a ‘mangbulsek iti panunot dagiti di manamati.’​—2 Corinto 4:4; Mateo 4:1-11.

Kinapudnona, kas insurat ni apostol Pedro, ni Satanas ket “kasla leon a ngumerngernger nga agsapsapul iti alun-onenna.” (1 Pedro 5:8) Di pakasdaawan a pinalagipan ni apostol Juan dagiti manamati: “Ti intero a lubong adda iti pannakabalin daydiay nadangkes.” (1 Juan 5:19) Masiribtayo no ipangagtayo dagitoy a Nainkasuratan a pakdaar.