Dagiti Mannursuro​—Apay a Kasapulantay Ida?

“Nasaysayaat ti maysa nga aldaw a pannakikadua iti nalaing a mannursuro ngem ti sangaribu nga aldaw a napasnek a panagadal.”​—Proverbio dagiti Hapones.

MALAGIPMO aya ti maysa a mannursuro a talaga a nakaimpluensia unay kenka idi ages-eskuelaka? Wenno no estudianteka pay laeng, adda aya paboritom a mannursuro? No kasta, apay?

Ti nalaing a mannursuro iwardasna ti panagtalek ken pagbalinenna a makaay-ayo ti panagadal. Maysa a 70-anyos a lakay manipud Inglatera ti maay-ayatan a manglagip iti maestrona iti Ingles iti eskuelaanna idiay Birmingham. “Impabigbig ni Mr. Clewley kaniak dagiti diak impagpagarup nga abilidadko. Managbabainak ken naalikaka, ngem pinaregtanak a makisalip iti drama idiay eskuelaan. Idi maudi a tawen ti panageskuelak, nangabakak iti drama. Diak koma nabaelan dayta no dinak pinaregta. Nakalkaldaang ta diak nakitan kadagiti napalabas a tawen tapno makapagyamanak iti kinapasnekna kadagiti estudiantena.”

Kuna ti 50 anyos a ni Margit a taga Munich, Alemania: “Adda maestra a kaay-ayok unay. Simple ti panangilawlawagna kadagiti banag a nakarigrigat a maawatan. Pinaregtanakami nga agsaludsod no adda dimi maawatan. Nasinged ken mannakigayyem. Gapu iti dayta, ad-adda a makaparagsak ti panagadalmi.”

Kastoy ti malagip ti maysa nga Australiano a ni Peter maipapan iti maysa a maestrona iti matematika: “Nakatulong kadakami a makaamiris iti kinapateg ti ad-adalenmi babaen ti panangtedna kadagiti praktikal a pagarigan. Idi ad-adalenmi ti trigonometry, insurona kadakami no kasanomi a rukoden ti katayag ti maysa a pasdek uray no dimi sagsagiden dayta, no la ket ta usarenmi laeng dagiti prinsipio ti trigonometry. Malagipko a kinunak iti bagik, ‘Talaga a nakaskasdaaw dayta! ’”

Impudno ni Pauline, a taga makin-amianan nga Inglatera, iti maestrona: “Nakapuyak iti numero.” Nagsaludsod ti maestrok: “Kayatmo kadi a lumaingka? Matulonganka.” Intuloy ni Pauline: “Iti simmaganad a sumagmamano a bulan, ad-adda nga inasikasonak. Tinulongannak pay kalpasan ti klase. Ammok a kayatna a makasursuroak​—talaga a nadungngo. Gapu iti daytoy, gimmagetak nga agadal, isu a limmaingak.”

Ni Angie a taga Scotland, a nasurok a 30 anyosna itan, malagipna ni Mr. Graham a maestrona idi iti history. “Pinagbalinna a makapainteres ti history! Inestoriana dagiti pasamak ket talaga a makapagagar ti panangisurona iti tunggal tema. Pinagbalinna a kasla agpaypayso dayta.” Maay-ayatan met a makalagip iti baketen a maestrana idi iti grado uno a ni Mrs. Hewitt. “Naanus ken nadungngo iti tattao. Adda idi aldaw a nagsaludsodak kenkuana iti klasemi. Sinappuyotnak. Impariknana a talaga a maseknan kaniak.”

Agyaman unay ni Timothy a taga abagatan a Grecia. “Malagipko pay laeng ti maestrok iti science. Interamente a binalbaliwanna ti panangmatmatko iti lubong ken iti biag. Pinagammanga ken pinagsiddaawna ti klase. Inyukuokna kadakami ti panagregget a manggun-od iti pannakaammo ken panagayat iti pannakaawat.”

Ni Ramona a taga California, E.U.A., ti sabali pay a pagarigan. Insuratna: “Ingles ti pagay-ayat ti maestrak idi iti haiskul. Talaga a makaakar ti kinapasnekna! Pinalakana pay dagiti narigat a maawatan.”

Kastoy ti siraragsak nga impadamag ni Jane a taga Canada maipapan iti maestrona iti physical education: “Nakaad-adu ti napanunotna a paglinglingayan ken pakasursuruan. Impannakami kadagiti nagpipintas a lugar ket sinuruannakami nga ag-ski iti away ken agkalap kadagiti abut iti kaniebean. Nagaramidkami pay iti bannock, a maysa a klase ti tinapay dagiti Indian, wenno biskuit a naaramid iti sebada. Linutomi dayta iti pinasgedanmi nga apuy iti nagkampuanmi. Nakaay-ayat amin dagitoy a kapadasan para iti balasitang a  naanep nga agadal ken gagangay nga adda laeng iti balay!”

Managbabain ni Helen a maysa a balasang a naipasngay idiay Shanghai ken nageskuela idiay Hong Kong. Malagipna: “Idi addaak iti grado singko, maestrok ni Mr. Chan iti physical education ken painting. Narapisak isu a nakapuyak unay nga ag-volleyball ken ag-basketball. Dinak pinabainan. Binay-annak nga agay-ayam iti badminton ken iti dadduma nga ay-ayam a maibagay kaniak. Nakonsiderasion ken naasi.

“Kasta met iti painting​—saanak a nalaing nga agpinta iti bambanag ken tattao. Isu a binay-annak nga agpinta kadagiti sukog ken disenio nga ad-adda a paglaingak. Gapu ta ub-ubingak ngem iti dadduma nga estudiante, kinombinsirnak nga agtalinaed iti dayta a grado iti maysa pay a tawen. Dakkel ti namalbaliwan ti panageskuelak gapu iti daytoy. Naaddaanak iti panagtalek ken limmaingak. Kanayonto nga agyamanak kenkuana.”

Siasino dagiti mannursuro a kasla makaimpluensia iti kasta unay? Adtoy ti sungbat ni William Ayers iti librona a To Teach​—The Journey of a Teacher: “Ti naasi, nadungngo a mannursuro a mangipateg iti biag dagiti estudiantena ti kangrunaan a kasapulan iti epektibo a panangisuro. . . . Ti epektibo a panangisuro ket saan a gapu iti espesipiko a wagas wenno estilo, plano wenno aramid. . . . Ti panangisuro ket maigapu a nangnangruna iti ayat.” No kasta, siasino ti naballigi a mannursuro? Kunana: “Ti mannursuro a nakatignay iti pusom, ti mannursuro a nakaawat kenka wenno nangdungngo kenka kas maysa a tao, ti mannursuro a pagay-ayatna ti maysa a banag​—musika, matematika, Latin, ullaw​—makaakar ken makaparegta.”

Awan duadua nga adu a mannursuro ti umaw-awat iti ebkas ti panangapresiar dagiti estudiante ken uray dagiti nagannak isu a maparparegtada nga agtultuloy a mangisuro nupay adu dagiti pakaupayanda. Ti napudno nga interes ken kinamanangngaasi nga impakita ti mannursuro iti estudiante ti kadawyan a kalidad kadagitoy nagadu a komento.

Siempre, saan nga amin a mannursuro ket mangipakpakita iti kasta nga interes kadagiti estudianteda. Ket masansan met a makapasar dagiti mannursuro iti adu a pakarigatan a manglimitar iti maaramidanda kadagiti estudianteda. Daytoy ti manggutugot kadatayo nga agsaludsod, Apay a pilien dagiti tattao ti kasta a narigat a propesion?

[Picture Credit Line iti panid 4]

“Ti panangisuro ket maigapu a nangnangruna iti ayat”