Manipud Kadagiti Agbasbasa

Danum Ti serye a “Danum​—Addanto Aya Umdas?” (Hunio 22, 2001) ket makaisuro unay. Ngem nadlawko nga imbagayo a “tapno mapataud ti maysa a tonelada nga asero, mabusbos ti 280 a tonelada a danum.” Adda la ketdi kamali ditoy. Kas maysa a consultant iti danum, ammok nga iti dadduma a pagaramidan iti asero ditoy India, 20 agingga iti 23 a tonelada laeng a danum ti mabusbosmi.

N.K.K., India

Kastoy ti sungbat ti “Agriingkayo!”: Ti bilang a dinakamatmi aktual a tukoyenna ti kaadu ti danum a mausar iti pannakapataud ti asero​—saan a ti kaadu ti danum a “mabusbos.” Naammuanmi a kaaduan gayam a danum a nausar iti pannakapataud ti asero ket saan a mabusbos no di ket mausar manen. Ladingitenmi ti di umiso a naawatanmi.

Biblia a Dalmatin Bayat a basbasaek ti artikulo a “Ti Biblia a Dalmatin​—Manmano Ngem Di Nalipatan” (Hunio 22, 2001), nasdaawak a makabasa iti panid 15: “Nabatad a nagipatarus [ni Dalmatin] manipud iti orihinal a pagsasao ngem kanayon a nagreperensiaanna ti Latin Vulgate a patarus ni Martin Luther iti pagsasao nga Aleman.” Impagarupko idi no nagipatarus ni Luther manipud kadagiti orihinal a pagsasao iti Biblia.

R. S., Alemania

Kastoy ti sungbat ti “Agriingkayo!”: Saanmi nga impasimudaag a ti “Vulgate” laeng ti inusar ni Luther idi impatarusna dagiti Hebreo a Kasuratan. Nupay awan ti makaammo kadagiti amin a detalye maipapan iti patarus ni Luther iti pagsasao nga Aleman, patien ti kaaduan a ti “Vulgate” ket maysa kadagiti alikamen nga inusar ni Luther tapno maawatanna dagiti teksto iti orihinal a lenguahe. Di pagduaduaan a nagusar met ni Luther iti dadduma pay a reperensia a magun-odan idi a tiempo, kas iti patarus a Griego a naammuan kas ti “Septuagint.”

Navajo Kayatko ti agyaman kadakayo iti makaparegta ken nagpintas nga artikulo a “Ti Nagan ti Dios ti Nangbalbaliw iti Biagko!” (Hulio 8, 2001), nga insalaysay ti maysa a Navajo a babai nga agnagan Sandy Yazzie Tsosie. Dagiti imbagana ti nangpikapik iti pusok ken pinagsangitnak. Ti pannakabasa maipapan iti rigatna a nagsapul iti ayat ken kinaragsak ken ti panangdaerna iti depression-na ti nangted kaniak iti namnama. Maamirisko a kasta unay ti panagayat ni Jehova a Dios kadatay amin!

A. S., Estados Unidos

Nakas-ang a Trahedia Impagarupko idi nga adda sumagmamano a banag a mapasamak laeng iti pelikula. Isu a naklaatak a nakabasa iti kapadasan a “Panangdaer iti Nakas-ang a Trahedia.” (Hulio 22, 2001) Apaman a nalpasko a binasa dayta, nagkararagak ket kiniddawko ken ni Jehova nga andingayenna da Jonathan, Oscar, ken dagiti apong ni Oscar. Dagiti kapadasan a kas iti daytoy ti pakatignayantayo nga agtultuloy a mangipaay ken Jehova ti amin a kabaelantayo sakbay a dumteng kadatayo ti “tiempo ken ti di mapakpakadaan a pasamak.”​—Eclesiastes 9:11.

E. P., Italia

Ti panangbasak iti makapasidduker a trahedia nga immapay ken Theresa ken iti pamiliana ti nangpikapik iti kaunggan ti pusok. Kayatko a maammuan ti pamiliana a magagaranak met a mangabrasa ken Theresa iti baro a lubong nga inkari ni Jehova.

L. T., Italia

Innem a tawen itan nga itantantanko ti agpabautisar. Awan idi ti determinasionko nga agbalbaliw. Ngem gapu iti kapadasan ni Theresa, nagmennamennaak. Naamirisko a saanak nga agbiag no awan ni Jehova, isu a sipapasnek a nagkararagak kenkuana. Uray no nakalkaldaang ti kapadasan ti pamiliana, daytat’ nangparegta kaniak.

M. L., Czech Republic

Nasdaawak ta maysa kadagiti Saksi ni Jehova ti nagbalin a biktima iti kasta a krimen, ngem ti artikulo ti nakatulong kaniak a nangamiris a dinatay simimilagro nga ispalen ni Jehova. Diak ammo no kaano met a mabalin nga umapay kaniak ti maysa a trahedia, ngem ti pannakabasak iti nabileg a pammati ti pamilia ni Theresa a mangtaming iti daytoy a kasasaad ti nangtignay kaniak tapno agbalinak a determinado a mangdaer iti aniaman a pakasuotan.

S. O., Japan