Dagiti Ginggined, Padto Ti Biblia, Ken Sika

SAKBAY ti ipapatay ni Jesus, impadtona dagiti pasamak ken kasasaad a mangpaneknek a dimtengen daytoy a lubong ‘iti panungpalan ti sistema ti bambanag.’ Imbagana a mailasin dayta a panawen kadagiti banag a kas iti angol, kinakirang ti taraon, ken nasaknap a panaggugubat. Dinakamatna met ti “dadakkel a ginggined” a mapasamak “iti nadumaduma a disso.” (Mateo 24:3, 7; Lucas 21:10, 11) Tuktukoyen aya ni Jesus ti kaaldawantayo?

Adu ti agkuna a saan. Kunada a di met unay immadu dagiti ginggined kadagiti nabiit pay a dekada. Kinapudnona, ipadamag ti National Earthquake Information Center ti E.U. a dagiti ginggined a 7.0 ti kapigsada ken dagiti napigpigsa pay ket “saan nga immadu” iti intero a maika-20 a siglo. *

Ngem paliiwem a ti kaitungpalan ti padto ni Jesus dina kalikaguman ti iyaadu ti bilang wenno kapigsa dagiti ginggined. Ti laeng imbaga ni Jesus ket addanto dadakkel a ginggined iti nadumaduma a disso. Kasta met a kinunana a dagitoy a pasamak ti pagilasinan ti “pangrugian dagiti ut-ot ti panagrigat.” (Mateo 24:8) Marukod ti rigat, saan a babaen iti bilang dagiti ginggined wenno kasano ti kapigsada iti Richter scale, no di ket babaen ti epektoda kadagiti tattao.

Talaga a nakaro unay a rigat ti pinatauden dagiti ginggined iti kaaldawantayo. Kinapudnona, bayat ti maika-20 a siglo, minilion ti natayen wenno naawanan iti pagtaengan gapu kadagitoy a didigra. Kuna dagiti eksperto a mabalin koma a nalapdan ti adu kadagitoy nga ipapatay. “Kadagiti napanglaw a pagilian,” kuna ti BBC News, “napatpateg dagiti mabiit ti pannakaibangonda ken narukop a pagtaengan ngem ti panangannurot kadagiti alagaden iti panagbangon tapno masupusopan dagiti kasapulan ti napartak nga ilalawa ti siudad.” Iti panagkomentona maipapan iti dua a nabiit pay a didigra, kuna ni Ben Wisner, maysa nga eksperto maipapan iti didigra kadagiti siudad: “Saan a ti ginggined ti nakatayan dagitoy a tattao. Natayda gapu iti nagtutupatop a biddut ti tao, kinaaleng-aleng, kinarinuker, ken kinaagum.”

Wen, no dadduma ti kinaagum ken kinaliway ti kangrunaan a makapapatay no mapasamak ti ginggined. Makapainteres ta naitampok dagita a kababalin iti sabali pay a padto ti Biblia maipapan iti “maudi nga al-aldaw” daytoy a sistema. Bayat dayta a tiempo, kuna ti Biblia, dagiti tattao ket “agimbubukodan, managayat iti kuarta” ken “di mannakipagrikna.” (2 Timoteo 3:1-5, The Amplified Bible) Mairaman iti sasao ni Jesus maipapan iti panungpalan ti sistema ti bambanag, mangipaay daytoy a padto iti nalawag nga ebidensia nga asidegen ti tiempo a bang-aran ti Dios ti marigrigatan a sangatauan manipud iti amin nga agdama a pakaigapuan ti ut-ot ken panagsagaba​—agraman ti napipigsa a ginggined.​—Salmo 37:11.

Kayatmo kadi a maammuan ti ad-adu pay maipapan iti daytoy a namnama a naibasar iti Biblia? Makiumanka kadagiti Saksi ni Jehova iti lugarmo, wenno agsuratka iti maitutop nga address nga adda iti panid 5.

[Footnote]