Manipud Kadagiti Agbasbasa

Gura Nabiit pay a sinarungkarannak ni manongko. Diak ammo a panatiko gayam. Nasaona ti maipapan iti nadumaduma a puli ket kasta unay ti gurana kadakuada. Kayatko a tulongan, ngem diak ammo no kasano nga irugik. Idi nakitak ti ruar ti Agosto 8, 2001, nga addaan iti serye a “Panangipatingga iti Siklo ti Gura,” ammok idin a dayta ti sungbat ti kararagko.

L. B., Estados Unidos

Aglablabes ti insuratyo ngem iti maawat ti nainkalintegan a tao. Kinunayo: “Sigun iti Biblia, naipasngay dagiti imperpekto a tattao nga addaan kadagiti dakes nga ugali ken depekto. (Genesis 6:5; Deuteronomio 32:5) Siempre, agaplikar dagidiay a sasao iti amin a tao.” Ngem dagitoy a teksto ket nayaplikar iti dua nga espesipiko a grupo iti espesipiko a panawen ken lugar. Sigurado a saan a mabalin nga agaplikar dagitoy iti amin a tattao.

D. C., Czech Republic

Kastoy ti sungbat ti “Agriingkayo!”: Pudno a dagitoy a sasao ket espesipiko nga agaplikar kadagiti tattao a nagbiag sakbay ti Layus ken iti nasion ti Israel. Nupay kasta, maulit-ulit nga ibatad ti Biblia nga “amin nagbasol ken agkurang iti dayag ti Dios.” (Roma 3:23; 5:12; Job 14:4; Salmo 51:5) Nadakamat ngarud dagiti Israelita ken tattao sakbay ti Layus kas ehemplo ti natauan a kinaimperpekto.

Dagiti Diary Diyo matukod no kasano ti kinaragsakko idi naawatko ti artikulo a “Ti Diary​—Mapagtalkan a Gayyem.” (Agosto 8, 2001) Agtawenak iti 20 ket kanayon nga agsuratak iti diary nanipud pay idi agtawenak iti 11. Mabalin a mailadawanyo ti panagriknak no basaek dagiti kinalokok, dagiti immuna a kursonadak idi agtutuboak, daniwko, pannakaibabainko, ken uray ti aldaw ti panagbautisarko ken ti riknak iti daydi nga aldaw.

L. C., Italia

Kas biktima ti pannakaabuso idi ubingak, natulongannak ti bukodko a diary tapno maam-ammok a naimbag ti bagik ken no kasano a tamingek ti nasaem a riknak. Rimmang-ayakon iti naespirituan.

E. L., Estados Unidos

Scleroderma Idi kalman, ensigida a naoperaak a nalabit pakaigapuanto ti panagdepekto ti kanigid a matak. Naklaat ken nagsagabaak iti depression. Idi nagawidak, simmangpeten ti Agosto 8, 2001 a ruar nga addaan iti pakasaritaan ti Marc Holland a, “Ti Pannakidangadangko iti Scleroderma.” Naparegtaak iti reaksionna iti daytoy nakalkaldaang a sakit, nangruna ti pammati ken determinasionna nga agtultuloy nga agserbi ken Jehova. Gapu iti dayta, nariknak nga awan unay ti pakaimudingan ti problemak.

L. B., Estados Unidos

Panagkararag Pagyamanan iti artikulo nga “Agimtuod Dagiti Agtutubo . . . Kasano a Makatulong Kaniak ti Panagkararag?” (Hulio 22, 2001) Ti panangbasa no kasano a makatulong ti panagkararag kadagiti agtutubo iti panangsaranget kadagiti problemada ti mangparegta kaniak nga ad-adda a siwayawaya a makikomunikarak ken Jehova.

D. B., Italia

Ti artikulo ti nakatulong kaniak a mangamiris a masapul a nasingsinged ti relasionko iti Dios. Iti edadko a 16, nakarigrigat dayta. Nagadu ti pakasulisogan ken panangpilit dagiti kapatadak. Pampanunotek no kasano a maaddaanak iti Biblia.

M. A., Estados Unidos

Kastoy ti sungbat ti “Agriingkayo!”: Nayurnosen a sarungkaran dagiti Saksi ni Jehova daytoy nga agbasbasa ken ikkanda iti Biblia.

Nagustuak ti kinuna ti agtutubo a ni Paul, a nagpatulong ken Jehova tapno maaddaan iti natalna a panunot. Kanayon a kidkiddawek ken Jehova a tulongannak nga agtalinaed a natimbeng iti inaldaw a panagbiagko ken kadagiti desision nga aramidek. Ita kiddawek metten a tulongannak a maaddaan iti natalna a panunot. Adu ti masursurotayo kadagiti agtutubo. Agtawenak iti 62.

M. P., Australia