No Masansan a Mainitanka Nasaysayaat ti Pannaturogmo no Rabii

MARIGATANKA kadi a maturog? Ti problema ket mabalin a manmanoka a mainitan, nangruna no lakay wenno baketkan. Nabiit pay nga inadal dagiti managsirarak idiay Japan ti kabibiag dagiti addaan iti insomnia nga agnanaed kadagiti balay a pagtaraknan. Natakuatanda a ti makagapu a marigatan a maturog dagiti naadal sadiay ket manmanoda a mainitan. Naammuan met idi naeksamen ti dara dagitoy a lallakay ken babbaket nga agnanaed sadiay, a bassit ti hormone-da a melatonin.

Ti melatonin ket iruar ti pineal gland iti utek. Iti sidong dagiti normal a kasasaad, ti kasansan ti inaldaw nga iruruar ti melatonin ti mamagbalin nga ad-adu ti mailaok a melatonin iti dara “no rabii ken dandani di madlaw no aldaw,” sigun iti report ti The Journal of Clinical Endocrinology & Metabolism. Nupay kasta, no manmano a mainitan dagiti lallakay ken babbaket, bumassit ti melatonin iti darada. Nabatad ngarud a gapu iti daytoy, di unay mapagduma ti bagi ti aldaw ken rabii no manmano a mainitan ti maysa a tao, a patien dagiti managsirarak a mangapektar iti kalidad ti pannaturog.

Idi naipasidong dagiti lallakay ken babbaket iti uppat nga oras a nalawag nga artipisial a silaw iti dandani agtengnga ti aldaw (alas dies ti agsapa agingga iti alas dose ken alas dos agingga iti alas kuatro ti malem) iti uppat a lawas, immadu ti iruarda a melatonin “a kaasping ti kaadu ti melatonin nga iruar dagiti agtutubo a naipasidong ti panagadal,” kuna ti report. * Kasta met a simmayaat ti kalidad ti pannaturogda.

Gapu kadagitoy a nasirarakan, ‘patienen dagiti managsirarak a dagiti lallakay ken babbaket, nangruna dagiti addaan iti insomnia, a kaaduan nga oras iti inaldaw a panagbiagda ket malawaganda laeng iti silaw ti siledda, kurang ti magun-odanda a lawag a mangbalbaliw iti nainkasigudan a pagorasan ti bagida wenno pannakarelo ti bagida.’ Gapu ta agtomar ti dadduma a lallakay ken babbaket iti suplemento a melatonin tapno sumayaat ti pannaturogda, kuna ti report: “No mausig dagiti pagdaksan ti napaut a panagtomar iti melatonin, ti panagpainit no agtengnga ti aldaw ket makaipaay iti mas matarigagayan, nasamsamay, nataltalged, ken makontrol a pamuspusan a mangagas iti insomnia dagiti lallakay ken babbaket a bassiten ti iruarda a melatonin.”

Isu a no addaka iti uneg ti balay iti kaaduan nga oras ti aldaw ken addaanka met iti insomnia, apay a dimo padasen ti rummuar iti sumagmamano nga oras​—wenno uray kaskasano ket palubosam a sumrek ti lawag ti init iti pagtaengam no aldaw, ken pagtalinaedem a nasipnget ti pagturogam no rabii. Mabalin a matakuatamto a no masansan a mainitanka, nasaysayaat ti pannaturogmo no rabii.

[Footnote]