Manipud Kadagiti Agbasbasa

Post-traumatic Stress Disorder (PTSD) Idi naawatko ti Agosto 22, 2001 a ruar ti Agriingkayo! a napauluan “Panangdaer iti Post-traumatic Stress,” naklaatak unay isu a diak maisardeng ti agsangit. Kanayon nga ikarkararagko a suruannak koma ni Jehova a mangdaer iti PTSD. Impagarupko idi nga awan serserbik, isu a nangrugin a napukaw ti panagraemko iti bagik. Ita naawatko ti sungbat dagiti kararagko. Diak mayebkas no kasano kapateg kaniak dagitoy nga artikulo, agpadpada iti naespirituan ken emosional.

C. K., Japan

Maysaak nga adulto nga agtawen iti 40 ken agsagsagaba iti post-traumatic stress disorder gapu iti napasarak idi ubingak. Dagiti artikuloyo ti sungbat kadagiti kararagko. Makaparegta ken makagunggonada. Pagyamanan kadagita nga artikulo a mangipasimudaag iti nauneg a pannakaawat. Itultuloyyo ti agipablaak kadagita!

R.D.M., Estados Unidos

Nagrigat nga iyebkas ti kinasaem ti panagbiag ken panagsagaba iti daytoy a sakit. Mangnginum ni tatangko, ken idi ubingak, kanayon nga ungtan ken ranggasannak. Inabusonak met iti seksual. Naragsakak ta impatuldo daytoy nga artikulo nga agannayas dagidiay addaan iti PTSD a pabasolen ti bagida isu a kasapulanda unay ti pammaregta. Agyamanak unay ken Jehova ken kadakayo amin gapu kadagitoy nagsayaat nga artikulo.

Y. S., Japan

Dagiti artikulo a kas kadagitoy ti makatulong kadakami a mangdaer iti riknami ken mangpabileg met iti panunotmi, tapno nasaysayaat ti maaramidanmi. Pangngaasiyo ta itultuloyyo ti agsurat kadagiti kasta a napateg nga artikulo a makatulong kadakami a mangtarus iti bagimi!

C. L., Estados Unidos

Nadayagnos nga addaanak iti PTSD, ngem ti kakaisuna idi nga ammok maipapan iti daytoy a sakit ket masansan a malagipmo dagiti napalabas. Inlawlawag a naimbag dagiti artikuloyo ti maipapan kadagiti sintoma. Masansan idi a pabasolek ti bagik ta impagarupko no nakapuyak iti naespirituan. Ngem talaga a nakatulong ti punto a rumbeng a panunotenmi no kasano ti panangmatmat ni Jehova kadakami imbes a no kasano ti panangmatmatmi iti bagimi.

J. S., Japan

Narigat a basaen daytoy nga artikulo, gapu ta agsangsangitak bayat a basbasaek dayta. Iti napalabas a dua a tawen, masansan a malagipko dagiti napalabas ken mabatibatak maipapan iti rabii ti ipapatay ni lolok kadagiti takiagko gapu iti atake iti puso. Agsangsangitak iti kaaduan nga oras nga addaak kadagiti Nakristianuan a gimong. Nakatulong kaniak daytoy nga impormasion tapno maawatak no apay a nasaem pay laeng ti riknak. Ita ammokon no siasino ti pagpatulongak​—ti naayat ken maseknan unay a nailangitan nga Amak ken ti organisasionna.

P. T., Australia

Lima a tawen ti napalabasen, nabaloak ken lakayko gapu iti aksidente iti lugan, ket makatawen kalpasanna, nangrugin a mariknak dagiti karkarna a sintoma iti bagi. Idi naawatko daytoy nga artikulo, panagriknak ket ni laeng Jehova ken ti organisasionna ti kasayaatan a makaawat iti dayta a banag. Uray laeng daytoy a rikna ket napabilegak a mangitultuloy latta kadagiti trabahok agpapan pay kadagiti lapped. Naimpusuan nga agyamanak iti amin nga ar-aramidenyo!

A. K., Japan

Panagbasa iti Biblia Naimpusuan nga agyamanak kadakayo gapu iti artikulo nga “Agimtuod Dagiti Agtutubo . . . Kasano a Mapagbalinko nga Ad-adda a Makaparagsak ti Panagbasa iti Biblia?” (Agosto 22, 2001) Agtawenak iti 17. Kanayon nga isardengko ti agbasa iti Biblia no makadanonak iti katengngaanna. No dadduma isardengko idi ti agbasa gapu ta mariknak nga okupadoak unay, ket no dadduma, pagarupek a saan met a talaga a makatulong kaniak ti basbasaek. Ngem talaga a tagtagiragsaken dagiti agtutubo iti artikulo ti panagbasada iti Biblia isu a mabenepisiaranda iti dayta. Dayta ti nangparegta kaniak nga agbasa met. Ita kayatkon nga itultuloy ken diakton isardeng.

Y. T., Japan