Ti Adu a Trabaho Dagiti Inna

4:50 ti bigat. Agsangsangit ti maladaga a ni Alex a makaturturogen ken kumarkarab-as ken ni Helen nga inana. Matmaturog ti dua pay nga annakna a da Penny a 5 ti tawenna, ni Joanna a 12 ti tawenna, ken ti asawana a ni Nick. Inubba ni Helen ni Alex ket pinasusona. Saanen a makaturog.

5:45 ti bigat. Agin-inayad a mapan ni Helen idiay kosina, agtimpla iti kape, ken agbasa.

6:15–​7:20 ti bigat. Agriing ni Nick. Riingen ni Helen da Penny ken Joanna, agluto iti pamigat ken aramidenna ti dadduma a trabaho iti balay. Iti alas 7:15, mapanen agtrabaho ni Nick ken idagasna ni Joanna idiay eskuelaan. Sumangpet ti ina ni Helen tapno mangawir ken ni Alex.

7:30 ti bigat. Idagas ni Helen ni Penny iti pageskuelaanna iti kindergarten. Iti panagbiahena a mapan agtrabaho, pampanunoten ni Helen ti agpaypayso a kasasaad ti panagbalin nga ina. “Daytat’ karirigatan a trabahok,” kunana.

8:10 ti bigat. Sumango ni Helen iti lamisaanna a nakaad-adu ti trabahona. Madanagan a mabalin a sumardeng nga agtrabaho no agsikog manen. Masapul ti pamilia ti sueldona.

10:43 ti bigat. Idi nasungbatanen ni Helen ti telepono a nangipakaammo maipapan kadagiti annakna, isut’ liwliwaen ti katrabahona a ni Nancy: “Nagsayaat ti panangtartaripatom kadakuada.” Agarubos dagiti lua ni Helen.

12:05 ti malem. Agdardaras ni Helen a mangan iti sandwich ket pampanunotenna ti tiempo sakbay nga impasngayna ti inauna a balasangna. Adda idi dagiti naiplano nga aramidenna iti “natda” a tiempona. ‘Saan gayam a kasta ti kalakana!’ kinunana.

3:10 ti malem. Kalpasan a makaawat ni Helen iti sumagmamano nga awag maipapan kadagiti pangray-aw ni Alex, dakamatenna ti naisangsangayan a pannakaisinggalutna kadagiti annakna: “Awanen ti kastoy a panagayatko iti siasinoman a sabali a tao.” Daytoy a panangdungngona ti nakatulong kenkuana a nangparmek kadagiti dina ninamnama idi a pakarigatan.

5:10 ti malem. Kalpasan ti panangdagasna ken Joanna, adda sumagmamano pay a banag nga aramiden ni Helen. Awaganna ni Nick tapno palagipanna a dagasenna ni Penny.

6:00–​7:30 ti rabii. No nakasangpeten ni Helen, sublatennan ken ni Lola ti ‘panangawir ken ni Alex,’ agtrabahon iti balay ken agisagana iti pangrabii. No pagsaludsodam ni Helen maipapan iti kasapulan unay ti maladaga, agsennaay ni Helen: “Kasapulan ti maladaga ti intero nga inana: dagiti arakup ti takiagna, ti bagina, ti gatasna ken di pannakaturog.”

 8:30–10:00 ti rabii. Tulongan ni Helen ni Joanna kadagiti homework-na ken pasusuenna ni Alex. Bayat nga ibasaan ni Nick ni Penny iti kaguduat’ oras, iringpas ni Helen ti ad-adu pay a trabaho iti balay.

11:15 ti rabii. Inton nakaturogen da Penny ken Joanna, nakariing pay laeng ni Alex nga ubba ni inana, ngem inton agangay makaturog met laengen. “Mabalin a makaturturogen,” kuna ni Helen ken Nick, a makaturturog metten.