Liwliwa Kadagiti Agladladingit

TI PANANGRAUT dagiti terorista idi Setiembre 11, 2001, idiay New York City ken Washington, D.C., ti namagkullayaw kadagiti tattao iti intero a lubong. Iti maysa nga aldaw, rinibu ti natay, agraman ti ginasut a maingel a bombero, polis, ken paramediko.

Nanipud idi napasamak dayta, ikagkagumaan dagiti Saksi ni Jehova a liwliwaen dagiti naulila kadagiti ay-ayatenda iti dayta a trahedia. Ar-aramidenda daytoy tapno ‘mamatapat ti nasnaayan ti pusona’ ken ‘liwliwaen dagidiay amin nga agledleddaang.’​—Isaias 61:1, 2.

Iti panaglabas dagiti tawen, naammuan dagiti Saksi ni Jehova a sangkapanunot dagidiay naulila kadagiti ay-ayatenda dagiti sumaganad a saludsod. Addaan ti Biblia kadagiti sungbat. Apay a dimo sukimaten dagiti Nainkasuratan a reperensia iti baba babaen ti mismo a Bibliam?

Naikeddeng kadin ti ipapatay ti maysa a tao?

Iti Eclesiastes 9:11, kuna ti Biblia a “ti tiempo ken ti di mapakpakadaan a pasamak” (“gasat,” New English Bible) ket umapay iti intero a sangatauan. No naikeddengen ti ipapatay, apay a parparegtaennatayo ti Biblia nga agaramidtayo kadagiti natalged a panagannad?​—Kas pagarigan, kitaem ti Deuteronomio 22:8.

Apay a mataytayo?

Ti immuna a natauan a pagassawaan a da Adan ken Eva ket naisaad idi iti paraiso a daga. No la koma ta nagtalinaedda a natulnog, saanda koma a natay. Dumteng laeng ti ipapatay no sumukir dagiti tattao iti Dios. (Genesis 1:28; 2:15-17) Nakalkaldaang ta simmukir da Adan ken Eva iti Namarsua kadakuada. Nagbanaganna, linak-amda ti dusa nga ipapatay. Yantangay amin a tattao ket nagtaud kada Adan ken Eva, natawidtayo amin ti basol ken ipapatay. Ilawlawag ti Biblia: “Babaen iti maysa a tao [ni Adan] simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao.”​—Roma 5:12.

Ania ti kasasaad dagiti natay?

Kalpasan ti iyaalsa ni Adan, kinuna ti Dios: “Agsublika iti daga, ta dayta ti nakaalaam. Ta tapokka ket iti tapok agsublikanto.” (Genesis 3:19) Gapuna, ti ipapatay ket maysa a kasasaad ti naan-anay a kinaawan ti puot​—kinapudnona, ti kinaawan. Kuna ti Biblia: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” (Eclesiastes 9:5) Kuna pay ti Biblia, a no matay ti maysa a tao, “agsubli iti dagana; iti dayta nga aldaw mapukaw dagiti panunotna.”​—Salmo 146:3, 4.

Saan kadi nga adda kararuatayo nga agtultuloy nga agbiag kalpasan ti ipapatay?

Silalawag nga isursuro ti Biblia a ti kararuam ket sika, saan a maysa a di masinunuo a persona nga agtultuloy nga agbiag kalpasan ti ipapataymo. (Genesis 2:7; Proverbio 2:10; Jeremias 2:34) Gapu iti daytoy, mabalintay nga ibaga a no natay ti maysa a tao, natayen ti maysa a kararua. Silalawag nga ibagbaga ti Biblia: “Ti kararua [kayatna a sawen, ti tao] nga agbasbasol . . . matayto.”​—Ezequiel 18:4.

Ania ti namnama kadagiti natayen?

Ipalgak ti Biblia a panggep ti Dios a pagbiagennanto manen dagiti natay babaen ti panangpagungarna kadakuada iti paraiso a daga a sadiay, awanton ti sakit ken ipapatay. Kinuna ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna ket rummuarda.”​—Juan 5:28, 29; Apocalipsis 21:1-4.

Idi agsasao maipapan iti kapatpatay pay la idi a gayyemna a ni Lazaro, inyasping ni Jesus ti ipapatay iti pannaturog. (Juan 11:11-13) Kanayonanna, kalpasan a pinagungar ni Jesus, awan ti nasao ni Lazaro maipapan iti panaggapuna iti lugar a pagtutuokan wenno idiay gloria kabayatan ti apagbiit nga ipapatayna. (Juan 11:37-44) Nalaka a maawatan daytoy ta awan ti puot dagiti natay. Saanda nga agsagsagaba no di ket ur-urayenda ti “oras” inton mapagungarda. Kangrunaanna, ti panangpagungar ni Jesus ken ni Lazaro ti mangipakpakita laeng nga agbiagto manen dagiti natay. Kinapudnona, babaen iti daytoy a milagro impakita ni Jesus iti bassit a pamay-an ti mapasamakto ditoy daga inton agturayen ti Pagarian ti Dios. (Aramid 24:15) Anian a makaliwliwa dayta kadagidiay naulila kadagiti ay-ayatenda ken patay kadagitoy nariribuk a panawen!