Manipud Kadagiti Agbasbasa

Panagdanag Kayatko ti agyaman gapu iti artikulo nga “Agimtuod Dagiti Agtutubo . . . Kasano a Maisardengko ti Nakaro a Panagdanag?” (Setiembre 22, 2001) Agtawenak iti 17, ket inaldaw a pampanunotek no ania ti masakbayak kalpasan nga agturposak iti haiskul. Ikagkagumaak a bukbukodan ti amin a pakadanagak ta diak kayat ti agbalin a kunsumision ti dadduma, isu a mariribukanak. Nakatulong kaniak ti artikulo a mangamiris iti kinapateg ti pannakisaritak ken ni nanangko ken kadagiti nataengan iti kongregasion.

L. R., Estados Unidos

Agtawenak iti 17. Masansan a madanaganak maipapan iti salun-at ni nanangko, adalek idiay eskuelaan, ken dagiti trabahok iti balay. Kanayon a kidagennak ni nanangko kadagiti Nakristianuan a gimong no adda dagiti pammagbaga maipapan iti panagdanag. Isu nga apresiarek dagiti praktikal a singasing ti artikulo maipapan iti panangusarko a naimbag iti panawenko ken kasta met ti panangaramidko kadagiti di makaay-ayo a trabaho imbes nga itungtungkuak dagitoy. Pagyamanan iti daytoy praktikal nga artikulo.

H. H., Estados Unidos

Kas maysa nga ama ken Kristiano a panglakayen, maawatak a madanagan dagiti agtutubotayo maipapan iti masanguanan. Nasayaat ti balakadyo a makisaritada kadagiti dadakkelda maipapan kadagita a banag ken dagus a tamingenda dagiti parikutda. Pagyamanan iti agtultuloy a pannakaseknanyo kadagiti agtutubomi.

R. H., Canada

Dagiti Malmalday nga Agtutubo Adda idi ti naituding a leksionko idiay eskuelaan nga agsuratak maipapan iti mapilik nga isyu iti kagimongan a maitutop kadagiti agtutubo. Inusarko ti serye ti akkub ti Setiembre 8, 2001 a “Tulong Kadagiti Malmalday a Tin-edyer.” Nagadu kadagiti kalugarak nga agtutubo ti addaan iti depression. Inusarko idin ti Agriingkayo! iti dadduma pay a naituding a leksionko​—ket nagsayaat dagiti nagun-odak a grado!

S. H., Australia

Naimpeksion ti puso ken utek ti baritomi. Naagasan ti sakitna, ngem saan a nadayagnos ti dakdakkel a peggad nga isu ti kakuyogna a depression. Kineltay ti anakmi ti biagna. Nupay naladaw unayen ti panangtulong kenkuana, kaskasdi a nakatulong unay daytoy a serye kadakami tapno maawatanmi daytoy a sakit. Agyamankami unay ta nailawlawag daytoy a tema ken ipakpakitayo ti naayat a pannakaseknanyo kadagiti annakmi.

G. & G. R., Alemania

Adda dagiti kanito a malmaldayak unay ket pampanunotek nga awan serserbik. Mabainak a mangibaga iti riknak kadagiti Kristiano a dadakkelko wenno kadagiti panglakayen iti kongregasion. Nupay kasta, idi nabasak ti sasao a, “Saanmo a basol ti kasasaadmo,” nabang-aranak unay! Isu a naamirisko manen a saanak gayam nga agsolsolo.

H. T., Japan

Panangmatmat iti Lubong Nagsuratak ta kayatko a kablaawankayo kadagiti nakaay-ayat a drawing iti “Panangmatmat iti Lubong.” Dagitoy ti tumulong kaniak a manglagip kadagiti padamag nga iyilustrarda, ket kangrunaanna, paragsakendak. Itultuloyyo ti nagsayaat a trabahoyo!

A.I.P.B., España

Kalendario Dagiti Maya Pagarupek nga adda nadlawko a kamali iti artikulo a “Dagiti Maya​—Idi ken Ita.” (Setiembre 8, 2001) Kinapudnona, ti retrato iti kahon a “Ti Kalendario Dagiti Maya” ket nainaig iti init a kalendario dagiti Aztec. Kinaagpaysuanna, dayta ti makintengnga a paset ti kalendario, a mangiladawan iti init-dios dagiti Aztec.

R. S., Estados Unidos

Kastoy ti sungbat ti “Agriingkayo!”: Husto ti agbasbasa. Agparang a di umiso ti naimarka ti naggatanganmi iti dayta a retrato. Nakalkaldaang ta saan a nadlaw dayta a kamali sakbay a naimaldit ti magasin. Dispensarendakami iti dayta a kamali.