Agimtuod Dagiti Agtutubo . . .

Kasano a Makabirokak iti Kakuarto a Makatunosak?

“Diak idi makapagserbi kas amin-tiempo a managebanghelio ken mabayadan ti pangkaserak agraman ti dadduma pay a paggastosan no awan dagiti kakuartok.”​—Lynn. *

NO PUMANAW dagiti agtutubo iti pagtaenganda, masansan a makigtotda inton maammuanda a nangina gayam ti magastos iti panagbiag iti ‘agpayso a kasasaad.’ Para iti adu, ti maysa a pamay-an tapno kabaelanda ti dakkel a magasto iti panagbiag isut’ pannakibingay iti maysa wenno ad-adu pay a kakuarto.

Ngem kas iti impatuldo ti napalabas nga artikulo iti daytoy a serye, mabalin a maysa a karit ti pannakikuarto nangruna iti naan-anay a saanmo pay nga am-ammo. * Agpayso daytoy uray kadagiti agtutubo a Kristiano nga agkakuarto tapno makapagserbida kas amin-tiempo a managebanghelio. Aniaman ti partikular a kasasaadmo, no pangpanggepem ti makikuarto, nainsiriban laeng nga usarem ti “praktikal a kinasirib” iti panagpilim iti dayta a tao. *​—Proverbio 3:21.

Ti Peggad ti Dakes a Pannakitimpuyog

Adu nga agtutubo nga adulto ti agsukimat kadagiti naipaskil a pakaammo, nabennebenneg nga anunsio iti periodiko, ken iti Internet tapno makasapulda kadagiti agbalin a kakuartoda. Ngem kadagiti agtutubo a Kristiano, adda nakaro a peggad dagita nga impormasion. Mabalin nga ituggoddaka a makiam-ammo kadagiti dimo kapammatian, naiduma ti moral, wenno pagalagadanda. Akikid kadi ti panagpanunotmo wenno mangidumdumaka kadi no makikuartoka laeng kadagiti kapammatiam? Saan, nainsiriban laeng dayta. Mamakdaar a mismo ti Biblia: “Dagiti dakes a pannakitimpuyog dadaelenda dagiti makagunggona nga ugali.”​—1 Corinto 15:33.

Utobem ti agtutubo a babai nga agnagan Lee. Di pay nabautisaran a Kristiano idi nangrugi a nagnaed iti dormitorio ti maysa nga unibersidad. Kastoy ti malagipna: “Napeggad a lugar dayta. No agawid ti dadduma kadagiti babbalasitang, masalamaanda a makidendenna dagiti kakuartoda.” Di nagbayag, naapektaran ti espiritualidad ni Lee gapu iti panagnaedna sadiay. “Naglanganak iti kaaduan kadagiti Nakristianuan a gimong,” inadmitirna. Di pakasdaawan a dimmakes ti kababalinna. “Maysa nga aldaw, agsasaoak metten iti dakes, isu a kinuna ti maysa kadagiti babbalasitang: ‘Anamongan aya ni Jehova dayta?’” Anian a nakababain! Naimbag laengen ta pimmanaw ni Lee iti dayta a dakes a lugar isu a nangrugin a rimmang-ay iti naespirituan. Ngem ipakita ti kapadasanna ti peggad ti pannakikabbalay kadagiti di mangraraem iti pagalagadam.

Panangbirok Kadagiti Maitutop a Kakuarto

Sadino ngay ti mabalin a pagbirokam? Rugiam iti mismo a nakaitimpuyogam a kongregasion dagiti Saksi ni Jehova. Makapainteres ta masansan a makabirok dagidiay amin-tiempo a managebanghelio kadagiti naespirituan ti panagpampanunotda nga agtutubo iti nadumaduma nga eskuelaan  ken gimong a maang-angay para kadagiti amin-tiempo a manangaskasaba. * Makatulong met dagiti nagannak, panglakayen iti lokal a kongregasion, agdaldaliasat a manangaywan, ken ti dadduma; nalabit am-ammoda ti dadduma nga agtutubo a maitutop nga agbalin a kakuartom.

Dakkel met ti maitulong ti panangipakaammom nga agbirbirokka iti agbalin a kakuartom. No maammuan ti ad-adu a tattao ti kasapulam, dakdakkel ti posibilidad a makabirokka. (Eclesiastes 11:6) Kangrunaanna, agpatulongka ken ni Jehova iti panagsapulmo iti kakuartom, ket agpannurayka kenkuana tapno mabendisionan dagiti panagreggetmo.​—1 Juan 5:14, 15.

Panangsukimat Kadagiti Kasapulan nga Impormasion

Gapu ta addan nabirokam a posible nga agbalin a kakuartom, mabalin a magagaranka iti asidegen a panagkaduayo. Ngem nainsiriban nga agsukimatka pay nga umuna. Dayta aya a tao ket “naimbag ti damagna kadagiti kakabsat” iti kongregasionna? (Aramid 16:1, 2) Mabalin a direkta a makisaritaka a kadua ti dadakkelmo kadagiti kualipikado iti naespirituan a makaam-ammo kenkuana. Nalabit mayimtuodmo: ‘Ania ti reputasionna? Kalmado ken nainkalintegan aya ken narang-ay iti naespirituan? Mangaskasaba aya iti sabsabali ken agkomkomento kadagiti gimong? Agdinamag aya a nasayaat ti kababalinna?’

Laglagipem a “daydiay makipagna kadagiti masirib a tattao agbalindanto a masirib.” (Proverbio 13:20) “Naespirituan unay ti panagpampanunot ti kakuartok,” kuna ni David. “Dayta ti makatulong kaniak a rumang-ay iti naespirituan.” Umasping iti dayta ti kinuna ni Renee, a napadasannan ti naaddaan iti adu a kakuarto: “Dadduma kadagiti nagbalin a kakuartok ti nangisingasing a rinabii nga agbasakami a sangsangkamaysa iti maysa a kapitulo iti Biblia. Gapu ta saan a Saksi ti dadakkelko, awan a pulos ti sangapamiliaan a panagadalmi iti Biblia. Isu a maragsakanak unay ta naaddaanak iti ‘sangapamiliaan a panagadal’ a kadua dagiti kakuartok!” Wen, pudno a bendision ti kakuarto a kapadpadam nga adda panagayatna kadagiti naespirituan a banag.

 Sipaprangka a Pagsaritaanyo Dagiti Bambanag

Sumaganad, pagsaritaanyo dagiti bambanag. Makatulong kenka dagita a saritaan tapno maammuam no agkatunosankayo met laeng. Makapainteres ta impalgak ti maysa a panagadal a naipadamag iti pagiwarnak a Communication Research Reports a dagiti agkakuarto nga agpada dagiti kababalinda iti pannakikomunikar “ti nangipadamag a mapnek ken magustuanda unay dagiti kakuartoda.” Isu a no prangka, mannakilangen, ken napasigka, mabalin nga agproblemakanto a makikuarto iti tao a di mannakipulapol, di maun-uni, wenno managputputong.

Nupay dimo kayat a kasla agpalpalutpotka no agtungtongkayo, mabalin a makatulong no pagsaritaanyo dagiti insigida a kalat ken plano ti manamnama a kakuartom. Ikagkagumaanna aya ti rumang-ay iti naespirituan wenno nalabit kayatna laeng a liklikan ti narigat a kasasaad iti pagtaenganda? Impatuldo ni Lynn ti sabali pay a parikut a mabalin a tumaud: “Adda idi kakuartok a makide-date, ket kanayon nga adda ti nobiona sadiay, uray no adalem unayen ti rabii.” Nakita ni Lynn a di umiso ken makapasuron dagiti panangipakitada iti panagdinnungngoda. Ngem mabalin a maliklikan dagita a parikut no adda sumagmamano a pagannurotan nga aramidenyo a nasaksakbay. Kas pagarigan, kastoy ti kuna ni Renee: “Adda idi pagannurotanmi a masapul nga agawiden dagiti lallaki iti masinunuo nga oras.” Pagimbaganyo met nga agkakuarto no pagnumuanyo a dikay agsolsolo iti siled wenno apartment a kadua ti diyo kasekso.

Makatulong met no pagsaritaanyo dagiti banag a kas kadagiti pagesmanyo, magustuanyo, ken kaay-ayoyo a musika. “Kayatko ti makikuarto iti daydiay kapadak dagiti kayat ken magustuanna nga aramiden, kapadak ti personalidadna, ken kayatna nga aramiden dagiti kayatko nga aramiden,” kuna ni Mark. Siempre, no agduma dagiti magustuanyo, dina kayat a sawen a saankayon nga agkatunosan nga agkakuarto. Ti pudno nga isyu ket, Kasano a pakibagayanyo ti maysa ken maysa? Situtulokkayo aya a mangpanuynoy iti nagdumaanyo ken agbalbaliwkayo tapno mapagustuanyo ti maysa ken maysa?

Isingasing ni Lee: “Masapul met a damagem no ania ti namnamaenna iti panagkakuartoyo. Namnamaen ti dadduma a tattao nga agbalinka a kadekketan a gayyem ken kaduada. Ngem diak kayat ti kasta.” Umasping iti dayta ti kinuna ni David: “Kayatko ti kakuarto a mabalinnak a kaduaen a mangaramid iti nadumaduma a banag ngem dina namnamaen a masapul a kanayonnak a kaduaen no kaano ti kayatko a panangaramid iti bambanag a kadua ti dadduma pay a tattao.” Ammuem met no interesado a makikadua kenka iti trabaho a panagebanghelio wenno adda pay sabali a pampanunotenna, kas iti panagserbi iti ganggannaet-pagsasaona a kongregasion.

Kamaudiananna, siertuem a pagsaritaanyo dagiti banag a kas iti panagluto (ammoyo kadi a dua?), panagtinnulongyo kadagiti trabaho iti balay, panagusar kadagiti personal nga alikamen, espasio iti kloset, muebles, espasio a pagidulinan, ken dagiti taraken. No pagsaritaanyo dagita a banag, mabalin a malapdan dagiti di panagkinnaawatan ken panagsakit ti nakem. Kuna ti Proverbio 20:18: “Babaen iti pammatigmaan maipasdek a sititibker dagiti mismo a gakat.”

“Sitatakneng ken Sigun iti Urnos”

Ti makatulong pay a prinsipio ket masarakan iti Lucas 14:28, a kunana: ‘Pattapattaem ti magastos.’ Wen, padasem nga ammuen ti magastom iti panagkaseram. Mano ti pagabangmo? Pagtaraon? Pagbayad iti nadumaduma a serbisio kas iti danum ken silaw? Pagbingayanyonto aya ti babayadan iti telepono? No kasta, kasanoyo a pagbingayan dayta? “Siertuek a kabaelanna ti agbayad kadagiti paggastuan sakbay nga akseptarek nga agbalin a kakuartok,” kuna ni Lynn. Ti magasin iti Internet a The Next Step siuumiso a kunana: “Dagiti kakuarto a di tumulong kadagiti magasto iti abang wenno taraon . . . wenno mangpadakkel iti babayadan ket mangparnuay iti dimo tartarigagayan a pakarigatan.”

“No dadduma, saan a ti gatad ti problema,” kuna ni Renee, “no di ket ti panawen!” Ilawlawagna: “Agingga iti maikatlo nga aldaw ti bulan ti taning ti abangmi. Ngem no dadduma, agbakasion ti kakuartok iti ngudo ti lawas sakbay nga itedna ti bingayna, isu a masapul nga agpadispensarak iti kaserami.” Nalawag a nainsiriban nga aramidem ti amin a “sitatakneng ken sigun iti urnos” ket dimo palaranan dagiti napateg a banag. (1 Corinto 14:40) Masansan a nainsiriban no isuratyo dagiti nagnumuanyo.

Ti panagbalin a naannad ken masirib ti ad-adda a makatulong tapno makasarakka iti kakuarto a talaga a bendision, imbes a kunsumision. Nupay kasta, kasano ngay no rumsua dagiti parikut ken di agkatunosan ti personalidadyo? Ilawlawag ti masanguanan nga artikulo dagitoy a kasasaad.

[Footnotes]

[Ladawan iti panid 26]

Adu ti peggad ti pannakikuarto kadagiti di mangal-alagad iti moralidad nga isursuro ti Biblia

[Ladawan iti panid 26]

Sakbay a makikuartoka, pagsaritaanyo dagiti napateg a banag