Manipud Kadagiti Agbasbasa

Halloween No maipapan iti artikuloyo a “Dagiti Nalatak a Selebrasion​—Adda Aya Nalmeng a Pagpeggadanda?” (Oktubre 8, 2001), adda kayatko a lawlawagan. Dinakamatyo ti “Guy Fawkes Night,” a silalatak met a pagaammo kas rabii ti panagtemtem ditoy Britania. Talaga a masapul a saan a rambakan dagiti Kristiano ti Guy Fawkes Night. Daytat’ napolitikaan a rambak, a mangidayaw iti pannakapapatay ti maysa a tao. Ngem yantangay ti petsa daytoy a rambak (Nobiembre 5) ket asideg iti Halloween ken medio adda nagpadaan ti rabii ti panagtemtem ken Halloween, ti rabii ti panagtemtem ket saan a paset ti espiritistiko a rambak ti Halloween.

P. B., Britania

Kastoy ti sungbat ti “Agriingkayo!”: Napili ti Halloween kas maysa nga ehemplo ti nalatak a kostumbre a dakes ti namunganayanna. Nadakamat ti Lantern Festival idiay Taiwan ken Guy Fawkes Night kas rambak a “kaasping” ti Halloween iti sumagmamano a wagas. Nupay kasta, saanmi kayat nga ipasimudaag nga aniaman kadagitoy a rambak ket aktual a paset ti Halloween wenno agpada ti namunganayanda. Nupay kasta, gapu ta maipadisda iti Halloween​—a maysa a rambak a nabatad a nainaig iti espiritismo​—nainsiriban nga usigen dagiti agbasbasa ti namunganayan dagitoy a rambak iti panangikeddengda no makipasetda kadagitoy wenno saan.

Pagyamanan iti panangisuroyo no kasano ti pannakainaig ti okulto iti Halloween. Daytat’ matmatan dagiti tattao a di makadangran ken pagraragsakan, ngem naisarsaraken ti dadduma gapu iti dayta. Mabalin a madangran dagiti ubbing nga agpasiar no rabii wenno makaawatda iti nadadaelen a kendi. Maysa nga ubing a babai iti sangakaarrubaanmi ti naitaray idin idiay ospital. Patien ti dadduma a tin-edyer a ti Halloween ket maysa nga okasion tapno agpasiarda kadagiti kalsada ken dadaelenda ti balbalay ti tattao. Naamiris ti maysa a bumalay a nasayaat ti panggepna ken nangiregalo kadagiti kendi, a nagundawayan ti kinaparaburna; nagulbod ti maysa nga ubing ken pinabasolna daytoy a babai a nangted kano iti nadadaelen a kendi. Iti laksid amin daytoy, kaskasdi a ti Halloween ket dakkel a rambak iti sangakaarrubaak. Sapay koma ta basaento ti amin a kaarrubak ti nagsayaat nga artikuloyo.

G. H., Estados Unidos

Dagiti Ay-ayam Pagyamanan iti ababa a padamag iti “Panangmatmat iti Lubong” a napauluan “Nagadu nga Abalbalay.” (Oktubre 8, 2001) Adda anakko a babai a 15 a bulanna pay laeng. Uppat a kahon ti ay-ayamna iti siledna. Agkaiwara ti amin, ket saan a pulos a makapagpili no ania ti ay-ayamenna. Idi impakita ni tatangko daytoy nga ababa a padamag iti Agriingkayo!, binasak a dagus ket kagudua a kahon laengen dagiti imbatik nga ay-ayamenna. Ita, kaay-ayo manen ti anakko ti panangay-ayamna kadagitoy.

P. G., Alemania

Ni Leif Eriksson Kayatko ti agyaman kadakayo gapu iti artikulo a “Ni Leif Eriksson​—Ti Nakatakuat iti America?” (Setiembre 22, 2001) Ad-adalenmi ti maipapan ken ni Columbus kadagiti leksionmi iti historia. Idi imbaga ti maestromi kadakami a ni Columbus ti nakatakuat iti America, intayagko ti imak ket imbagak a mabalin a ni Leif Eriksson ti nakatakuat iti America 500 a tawen a nasapsapa. Nagsirarakak pay, ket inyimprentak iti dadduma pay nga artikulo ti Agriingkayo! maipapan ken ni Columbus. Binasa amin ti maestrok dagitoy ket nagustuanna ti amin a nasirarakak.

M. D., Alemania

Panagbasa iti Biblia Pagyamanan iti artikulo nga “Agimtuod Dagiti Agtutubo . . . Kasano a Mapagbalinko nga Ad-adda a Makaparagsak ti Panagbasak iti Biblia?” (Agosto 22, 2001) Sangkapanunotko idi a makapauma ti agbasa iti Biblia ket diak pulos maanusan a basaen ti kasta kapuskolna a libro. Ngem gapu iti daytoy nga artikulo, pinadasko a basaen ti Biblia ket natakuatak a makapainteres unay dayta. Ita, regularen a basbasaek ti Biblia.

M. S., Alemania