“Alfa ken Omega” iti Libro nga Apocalipsis

DAGITOY ti nagan ti umuna ken maudi a letra iti Griego nga alpabeto ken namitlo a nausar a titulo iti libro nga Apocalipsis. Ngem ti maysa pay a nakausaran dagitoy a sasao, iti panangipaulog ti King James iti Apocalipsis 1:11, ket saan a pasingkedan ti sumagmamano kadagiti kadaanan a Griego a manuskrito agraman ti Alexandrine, Sinaitic, ken Codex Ephraemi rescriptus. Dayta ti gapuna a saan a nausar iti adu a moderno a patarus.

Nupay ti adu a komentarista iyaplikarda daytoy a titulo nga agpadpada iti Dios ken ni Kristo, ti naan-annad a panagsukimat iti pannakausar daytoy ipamatmatna a mayaplikar laeng daytoy ken Jehova a Dios. Ipakita ti umuna a bersikulo ti Apocalipsis 1:1 a ti Dios ti orihinal a nangted iti palgaak ken naited babaen ken Jesu-Kristo, isu a no dadduma, daydiay agsasao (babaen ti pannakabagina nga anghel) ket ti Dios a mismo, ket no dadduma, ni Kristo Jesus. (Apocalipsis 22:8) Isu a kuna ti Apocalipsis 1:8 (RS): “‘Siak ti Alfa ken ti Omega,’ kuna ni Apo Dios [“Jehova a Dios,” NW], nga adda ita ken adda idi ken daydiay umayto, ti Mannakabalin-amin.” Nupay ni Kristo Jesus ti tuktukoyen ti immuna a bersikulo, nabatad a ti titulo iti bersikulo 8 ket agaplikar iti “Mannakabalin-amin” a Dios. Maipapan iti daytoy, kuna ti Barnes’ Notes on the New Testament (1974): “Ditay naan-anay a masinunuo a ni Apo Jesus ti espesipiko a tuktukoyen ditoy ti mannurat . . . Saan met a dakes no maipagarup a ti Dios ti tuktukoyen ditoy ti mannurat.”

Ti titulo ket nadakamat manen iti Apocalipsis 21:6, ken iyam-ammo ti sumaganad a bersikulo ti agsasao babaen ti panagkunana: “Asinoman nga agballigi tawidennanto dagitoy a banag, ket siakto ti Diosna ket isunto ti anakko.” Yantangay dinakamat ni Jesus a ‘kakabsatna,’ saan a kas ‘annakna,’ dagidiay kaduana nga agtawid iti Pagarian, ti agsasao ngarud ket ni Jehova a Dios, ti nailangitan nga Ama ni Jesus.​—Mateo 25:40; idiligyo iti Hebreo 2:10-12.

Iti Apocalipsis 22:13 ti maudi a pakabasaan iti titulo, a kunana: “Siak ti Alfa ken ti Omega, ti umuna ken ti maudi, ti pangrugian ken ti panungpalan.” Nabatad nga adu a persona ti nailadawan nga agsasao iti daytoy a kapitulo ti Apocalipsis; sigun iti bersikulo 8 ken 9, nakisarita ti anghel ken ni Juan, nabatad a ni Jesus ti tuktukoyen ti bersikulo 16, agaplikar iti “espiritu ken ti nobia” ti umuna a paset ti bersikulo 17, ket nabatad a ni Juan a mismo ti agsasao iti maudi a paset ti bersikulo 20. No kasta, “ti Alfa ken ti Omega” iti bersikulo 12-15 ket mabalin a siuumiso a mailasin nga isu met laeng ti makintitulo iti dua pay a nakadakamatanna: ni Jehova a Dios. Ti sasao nga, “Adtoy! Umayak a sidadaras,” iti Apocalipsis kapitulo 22, bersikulo 12, dina iparipirip a dagitoy a nadakamat a bersikulo ket mayaplikar ken ni Jesus, yantangay dakdakamaten met ti Dios ti bagina a “rumrummuar” tapno mangukom. (Idiligyo iti Isaias 26:21.) Saritaen ti Malakias 3:1-6 nga agkadua ni Jehova ken ti ‘mensaherona ti tulag’ a rumrummuar tapno mangukom.

Ti kayulogan ngarud ti titulo a “ti Alfa ken ti Omega” ket agpadpada a “ti umuna ken ti maudi” ken “ti pangrugian ken ti panungpalan” no mausar dagitoy a pangtukoy ken Jehova. Awan ti immun-una kenkuana a Mannakabalin-amin a Dios, ket awanto metten ti sumaruno kenkuana. Sibaballigi a pagpatinggaennanton ti isyu maipapan ti kinadiosna ket agnanayon a maalangon kas daydiay maymaysa ken kakaisuna a Mannakabalin-amin a Dios.​—Idiligyo iti Isaias 44:6.