Manipud Kadagiti Agbasbasa

Makabkabil a Babbai Awan ti maibagak a sasao a mangdeskribir iti panagyamanko gapu iti serye a “Tulong Kadagiti Makabkabil a Babbai.” (Nobiembre 8, 2001) Maysaak a biktima ti kinaranggas iti pagtaengan, ket uray no naipulongkon kadagiti autoridad ti mapaspasamak idi kaniak, kaskasdi a kombinsidoak nga awan ti makaawat iti saem, tuok, ken napalalo a kinaliday a diak idi mailiwliwag iti aniaman a pamay-an. Eksakto ti panangdeskribir dagitoy nga artikulo kadagiti sentimientok.

N. L., Italia

Apaman nga inuksotko ti bungonna ket nakitak ti akkubna, nakaluaak. Dagus nga insublik ti magasin iti bungonna, ta impagarupko a salaysayenna ti maipapan iti napalabasko a kayatko nga ipapan a saan a pulos a napasamak. Nagkararagak a tumured koma ti pakinakemko tapno rugiak manen a basaen ti magasin. Anian a yamanko ta binasak dayta! Daytoy a serye ti nangipaamiris kaniak a saan la a sisiak ti agsagsagaba. Ti sugatko ket kas man la nabukbokan iti makabang-ar a lana idi nabasak ti sasao a “nadagsen a basol iti imatang ti Dios ti panangkabil iti asawa.” Pagyamanan kadagita a makaliwliwa nga artikulo a mangisalaysay kadagiti agpayso a kasasaad iti biag.

D.G.M., Estados Unidos

Napasarak met dagiti napadasan ti babbai a nadakamat iti artikulo. Ibagbagak idi iti bagik a ti arak ken ti aglawlaw a dimmakkelan ni lakayko dagiti makagapu. Uray no mailawlawag dagita a kasasaad ti makagapu, naliwliwaak idi naawatak a saan a nainkalintegan ti kinaranggas. Tarigagayak unay a basaen koma ni lakayko ti Biblia tapno maammuanna ti panagayat ni Jehova.

S. I., Japan

Naisangsangayan ti epekto kaniak daytoy a serye, gapu ta maysaak a makabkabil nga asawa. Nariknak a kaslaak la ni Roxana. Dakkel ti naitulongna idi naammuak nga adda dadduma a tattao a makaawat iti rikna ti makabkabil nga asawa. Naammuak kadagitoy nga artikulo a saan a siak ti makimbasol iti kababalin ni lakayko. Tinulongandak met a mangamiris a napategak iti Dios, uray no ibilangnak ni lakayko nga awan mamaayko ken awan serserbik. Pagyamanan iti panangipablaakyo iti kasta a makatulong a material. Nasaysayaat nga amang dayta ngem iti kinabaknang!

B. L., Pilipinas

Nabaelanyo nga insurat ti amin a saem ken pannakaupay a diak mayebkas. Tinulongannak daytoy a serye tapno matarusak a maawatan ni Jehova ti riribuk ken kinasaem a patauden daytoy a problema. Pangngaasiyo ta itultuloyyo ti agsurat kadagiti artikulo a kas kadagitoy, agsipud ta daytoy a problema ket masapul a maipakaammo ken maawatan ti sabsabali. Siguradok nga adunto met ti maliwliwa a kas kaniak kadagitoy nga artikulo.

K. E., Australia

Pinadakkelnak ti maysa a managpudpudot nga ama, isu a masansan a makaungetak ken ni lakayko. No dadduma​—saan gayam, mamin-adu​—nga aktual a kabilek. Napigpigsa ni lakayko ngem siak, isu nga impagarupko a talaga a saan a masaktan. Idi nabasak ti kinuna ti artikulo​—a nadagsen a basol iti imatang ti Dios ti panangkabil iti asawa​—naklaatak. Ni lakayko ket naemma nga adipen ni Jehova. Naimpusuan a kayatko ti agpakawan kenkuana. Agyamanak ken Jehova iti daytoy a disiplina.

T. I., Japan

Pinagsangitnak daytoy a magasin. Kas man la basbasaek ti mismo a kapadasak. Ngem itay nabiit, agim-imtuoden ni lakayko maipapan iti Biblia. Tinabunuannan ti sumagmamano a gimong idiay Kingdom Hall, ket makipagad-adalen iti Biblia. Mabalinko metten nga ibaga ti kinuna ni Lourdes a mabasa iti panid 11: “No dadduma pagarupek nga agar-arapaapak!”

E. R., Estados Unidos