Manipud Kadagiti Agbasbasa

Panagkakanaig ti Biag Sangapulo ket maysa ti tawenko, ket talaga a kaay-ayok dagiti animal. Idi naawatko ti serye nga “Asino ti Mangsalaknib iti Panagkakanaig ti Biag?” (Nobiembre 22, 2001), nagagaranak a nangbasa iti dayta. Naladingitanak unay para iti wandering albatross, a naretrato iti panid 7. Nakalkaldaang a malmalmesda gapu iti di mapakpakadaan a pannakabanniitda kadagiti kitang. Nagustuak met ti maudi a retrato iti dayta a panid, ti sawfish iti tamnay. Pangngaasiyo ta itultuloyyo ti agimprenta kadagiti artikulo a kas kadagitoy!

S. V., Estados Unidos

Dagiti Pagbaludan Kurang ti sasao a mangyebkas iti riknak idi nabasak ti artikulo a “Dagiti Pakasaritaan ti Pammati Manipud iti Historiko a Pagbaludan.” (Nobiembre 22, 2001) Adda barok a naibalud gapu iti panagtakawna iti banko. Maikadua daytoyen a pannakaibaludna. Ipatulodkonto daytoy nga artikulo kenkuana. Ikarkararagko a dayta ti mangpikapik iti pusona ken mangparegta kenkuana a mangawat iti panagayat ni Jehova kadatayo amin. Pagyamanan iti panangliwliwayo kadakami.

C. M., Estados Unidos

Panagpakamatay Pagyamanan unay iti serye a “Makapnek Unay ti Biag.” (Oktubre 22, 2001) Mariribukanak unay idi addaak iti grado 5 agingga iti 8. Talaga a sinuportarannak ni Jehova babaen ti Biblia ken ti Nakristianuan a timpuyog. Ngem nariknak a saanak latta a maikari. Kasla direkta a makisarsarita ni Jehova kaniak idi nabasak ti kahon a napauluan “‘Pakawanennak Ngata ti Dios Gapu iti Kastoy a Riknak?’” Makaparagsak a maammuan a di lipaten ni Jehova dagiti tattao a kas kaniak!

S. H., Japan

Kayatko nga ipakaammo kadakayo a naragsakanak kalpasan a nabasak daytoy a serye. Anian ti ragsakko ta saanak a nasermonan, a kas iti impagarupko kalpasan a nabasak ti paulo ti akkubna! Pinagsangitnak ti kahon a “‘Pakawanennak Ngata ti Dios Gapu iti Kastoy a Riknak?’” Gapu iti daytoy nga artikulo, nakisaritaak iti maysa a Kristiano a kabsat a babai maipapan iti mapaspasarak a rigat. Pagyamanan iti naannad a panangilawlawagyo iti daytoy sensitibo a suheto.

A. F., Francia

Naminwalon a binasak daytoy a serye. Pinampanunotko ti agpakamatay idi addaak iti grado 5 agingga iti grado 8. Kasla kayatko idin ti matay. Gapu iti daytoy a serye, naamirisko a nupay mabalin a di naragsak ti inaldaw a panagbiagko, naimbag laengen ta sibibiagak. Saanak a Saksi ni Jehova, ngem medio nabayag metten nga agbasbasaak kadagiti magasin a Pagwanawanan ken Agriingkayo! Talaga a nagsayaatkayo a tattao!

S. M., Japan

Dagiti Makabkabil a Babbai Pagyamanan iti serye a “Tulong Kadagiti Makabkabil a Babbai.” (Nobiembre 8, 2001) Ipasimudaag ti paulo iti panid 3​—“Nalabit Agbalbaliw Itan”​—ti in-inanamaek iti adun a tawen. Mapasingkedak a husto ti imbagayo iti panid 4, a masansan unay a ti mangab-abuso ti maipakitaan iti simpatia imbes a ti biktima.

S. M., Alemania

Makaay-ayo unay daytoy a serye. Di pagduaduaan a kas iti inaramid ti adun a sabsabali, diak napengdan ti nagsangit manipud iti umuna a panid agsipud ta nalagipko dagiti inibturak idi a rigat ken saem. Apresiarek unay ti kapanunotan a napategtayo amin iti imatang ni Jehova. Kas maysa nga amin-tiempo a managebanghelio, natakuatak a dagiti tattao nga agnanaed iti pangaskasabaak ket magagaran a mangbasa iti daytoy nga artikulo, isu a nagkiddawda iti kanayonan a kopia. Pagyamanan unay iti panangipaayyo iti kasta a napateg nga impormasion.

K. J., Australia

[Picture Credit Line iti panid 30]

Kulibangbang: Butterfly House, Mittagong, Australia