Kasano nga Agbalinak nga Ad-adda a Makaay-ayo?
Agimtuod Dagiti Agtutubo . . .
Kasano nga Agbalinak nga Ad-adda a Makaay-ayo?
“Marigatanak wenno alusiisenak a makisarita kadagiti babbai. Diak ammo ti pampanunotenda, panagriknada, wenno panangmatmatda kadagiti bambanag.”—Tyler.
ANIADA a kalidad ti kangrunaan a magustuan dagiti babbai kadagiti lallaki? “Kompiansa,” kuna ti tin-edyer nga agnagan iti Emily. Sigun iti sabali pay a tin-edyer a ni Robyn, ti managpakatawa ti kangrunaan a magustuanna. Ket ania met ngay ti kangrunaan a magustuan dagiti lallaki kadagiti babbai? Di pakasdaawan, impakita ti maysa a surbey a ti napintas a langa ti kangrunaan a magustuanda. Maikanem laeng daydiay kapadada iti paginteresan ken prinsipio.
Kadagiti magasin a naisentro kadagiti agtutubo, masansan nga adda dagiti artikulo ken surbey maipapan iti relasion ti lallaki ken babbai. Nalawag nga adu nga agtutubo ti agpampanunot unay—wenno madanagan pay ketdi—no kasano ti panangmatmat kadakuada ti dida kasekso. Nalabit madanaganka met no dadduma maipapan iti dayta. Ngem dina kaipapanan a nakasaganakan a makiasawa iti aniaman nga oras. Ngamin, awan ti mayat nga agbalin a naalas wenno di makaay-ayo! Kinuna ni Tyler: “No maysaka a tin-edyer, kayatmo nga agbalinka a makaay-ayo iti siasinoman. Kayatmo nga awatendaka dagiti kapatadam, lallaki man wenno babbai.” Mabalin met a mariknam nga addanto aldaw a kayatmo ti makasarak iti nasayaat a pakiasawaam. Inton dumteng dayta a tiempo, natural laeng a kayatmo a maatrakar dayta a tao.
Nupay kasta, kas Kristiano nga agtutubo, mabalin a bassit pay laeng ti kapadasam iti pannakilangen iti dimo kasekso. Malaksid iti dayta, mabalin a pilpilitendaka dagiti kapatadam a pagbalinem a makaay-ayo ti pammagim. Gapu iti nagadu a naisangsangayan unay a modelo ken maskulado nga aktor a mabuybuyam iti telebision ken makitkitam kadagiti magasin, natural laeng a mabalin a maupay ken madismayaka no saanka a kas kadakuada! Ania ngarud ti kasapulan tapno agbalinka a makaay-ayo iti sabsabali—agraman iti dimo kasekso—iti natimbeng ken makagunggona a wagas?
Ti Kinamaag ti Panangnamnama a Maaddaanka iti “Perpekto” a Pammagi
Imbaga ti clinical psychologist a ni William S. Pollack a gapu iti impluensia ti industria ti paglinglingayan, adu nga agtutubo ti “mangbusbusbos iti nagadu nga oras tapno agdieta, agbarbel, ken agehersisio iti aerobic, gapu ta pagreggetanda a balbaliwan ti kadakkel, kabassit, ken sukog ti pammagida.” Peligroso ken aglablabes pay ketdi ti ar-aramiden ti dadduma. Bisinenda payen ti bagida, tapno agbalin a “perpekto” ti pammagida. Nupay kasta, kuna ti Social Issues Research Centre: “Ti ipabpabuya ti agdama a media a pagtuladan dagiti babbai ket matulad ti kurang a 5% ti amin a babbai—ket maipapan laeng dayta iti timbang, kadakkel, ken kabassit. No kayatmo ti pagtuladan a sukog, rupa, kdp., mabalin a 1% laeng ti makatulad iti dayta.”
No kasta, praktikal ti pammagbaga ti Roma 12:2: “Saankayo nga agpasukog iti lubong iti aglawlawyo.” (Phillips) Ngem di kaipapanan daytoy a baybay-amon ti langam. Nainkalintegan laeng nga aywanam ti bagim babaen ti kalkalainganna a panagehersisio ken balanse a pannangan. (Roma 12:1; 1 Timoteo 4:8) Mabalin met a makatulong kenka ti umno a panaginana ken pannaturog tapno sumayaat ti langa ken riknam. Agbalinka met a nadalus ken asikasuem ti panagay-ayusmo iti bagim. Kinuna ti maysa a Britano nga agtutubo nga agnagan iti David: “Adda balasang a talaga a napintas, ngem nabangsit ti pay-udna. Gapu iti dayta, isut’ likliklikanen dagiti tattao.” Isu nga agdiguska a kanayon. Sumayaat ti langam no nadalus dagiti imam, buok, ken kukom.
Nupay di iparparegta ti Biblia ti nalabes a panangipangpangruna iti panagkawesmo, balakadanna met dagiti Kristiano nga “arkosanda ti bagbagida iti naimbag-pannakaurnosna a kawes, buyogen ti kinaemma ken kinasimbeng ti panunot.” (1 Timoteo 2:9) Agkaweska iti mangpasayaat iti langam ngem saan met nga aglablabes wenno di nanakman. * Ti nainkalintegan a panangasikasom iti langam ket mabalin a mangpabileg iti kompiansam iti bagim. Kinuna ti agtutubo nga agnagan iti Paul: “Nalabit saan a sika ti kapipintasan wenno kaguguapuan, ngem mabalinmo a pasayaaten ti langam.”
Dagiti Makin-uneg a Kalidad
Nupay makaallukoy ti napintas a rupa ken pammagi, inton agangay “ti kinapintas ket maysa a tarabutab.” (Proverbio 31:30, Byington) Saan nga agpaut ti napintas a langa, ket saan a pulos a maisukat iti dayta dagiti makaay-ayo a kalidad ti maysa a tao. (Proverbio 11:22) Laglagipem met a ti “maysa laeng a tao kitaenna no ania ti agparang kadagiti mata; ngem no maipapan ken Jehova, kitaenna no ania ti puso.” (1 Samuel 16:7) Isu nga imbes nga ipangpangrunam ti rukod ti siketmo wenno ti kinamaskuladom, pasayaatem ti “nalimed a kinatao ti puso iti di agrupsa a pagan-anay ti naulimek ken naalumamay nga espiritu, nga addaan dakkel a pateg iti imatang ti Dios.” (1 Pedro 3:3, 4; Efeso 4:24) Agpayso nga iti agdama a lubong, bassit laeng ti panangipateg ti adu nga agtutubo kadagiti makaay-ayo a kababalin—nangruna dagiti naespirituan a kalidad. * Ngem talaga a dagita ti apresiaren ken ibilang a makaay-ayo dagidiay nadiosan ti prinsipioda!
Ti kasayaatan ngarud a pamay-an tapno agbalinka a makaay-ayo kadagiti Kristiano a lallaki ken babbai isut’ panagbalinmo a naespirituan ti panagpampanunotna. Parang-ayem ti espiritualidadmo babaen ti panagkararag, personal a panagadal iti Biblia, ken itatabuno kadagiti Nakristianuan a gimong. (Salmo 1:1-3) Ngem adda pay dadduma a makatulong a paglaingan ken galad a mabalinmo a parang-ayen. Saan a kasapulan a maki-date wenno maaddaanka iti nobio wenno nobia tapno maparang-aymo dagitoy a galad. Imbes ketdi, mabalinmo a parang-ayen dagitoy iti inaldaw a pannakilangenmo iti sabsabali.
Kas pagarigan, alusiisen ken mabainka aya no addaka iti imatang ti dimo kasekso? Kastoy ti admitiren ti maysa nga agtutubo nga agnagan iti Paul: “No dadduma, alusiisenak—gapu ta babbaida, ket diak unay maawatan dagiti babbai a kas iti pannakaawatko kadagiti lallaki. Sa diak kayat ti mapabainan.” Kasano a mapatanormo ti kompiansa ken tured ti pakinakem tapno di alusiisen ti sabsabali? Ti maysa isut’ panangaprobetsarmo iti adu ken nadumaduma a pakilangenam iti kongregasion Kristiano. Kadagiti gimong, makisaritaka iti sabsabali—saan laeng a kadagiti kataebmo a dimo kasekso no di ket uray kadagiti ubbing, nataengan, lallakay, ken babbaket. (Filipos 2:4) Ti panagsursurom a makilangen a naimbag kadagita a nagduduma a tattao ti makatulong kenka a mangpatanor iti kompiansa iti bagim.
Ngem agannadka. Kinaagpaysuanna, kinuna ni Jesus: “Masapul nga ayatem ti padam a tao a kas iti bagim.” (Mateo 19:19) No agtalekka iti bagim, mabalin a dika unay mabain wenno alusiisen no makipulapolka iti sabsabali. * Ngem nupay rumbeng nga adda panagraemmo iti bagim, dika koma nga aglablabes. Kinuna ni apostol Pablo: “Ibagak iti tunggal maysa kadakayo dita a saanna a panunoten nga ad-adda ti bagina ngem iti rebbengna a panangpanunot.”—Roma 12:3.
Usigem met a naimbag ti kababalin ken pannakilangenmo iti sabsabali. Kuna ti maysa a Britano a balasitang nga agnagan iti Lydia: “Adda lalaki iti eskuelaanmi a talaga a nalatak kadagiti babbai. Ngem kalpasan a naam-ammoda, didan kayat agsipud ta nakarit ken saan a nakonsiderasion.” Dagiti tattao ket maallukoy iti daydiay naasi ken nataktika ti panagsasaona, ken nakonsiderar iti sabsabali. (Efeso 4:29, 32; 5:3, 4) “Dagiti makaay-ayo a kababalin ket kayarigan ti pasaporte, a mangted kenka iti wayawaya ken gundaway a makilangen kadagiti tattao,” kuna ni Dr. T. Berry Brazelton. Dagiti kababalin “ket napateg tapno akseptarendaka ti sabsabali.”
Iti intero a lubong, nagduduma dagiti kostumbre ken pagannurotan maipapan iti ugali. Isu a mabalin a kayatmo a paliiwen no kasano ti panangtrato dagiti nataengan a Kristiano a lallaki ken babbai iti maysa ken maysa. Kas pagarigan, gagangay kadi iti pagiliam a ti lalaki ti mangilukat iti ridaw para iti babai? Gapuna, no sursuruem daytoy a kababalin, sumayaat ti reputasionmo kas natakneng ken nasayaat ti kababalinna a tao.
Kamaudiananna, mabalin a makatulong no sukayem ti natimbeng a kinamanagpakatawa. Kuna ti Biblia nga adda “tiempo ti panagkatawa,” ket masansan a nalaka a maaddaan iti gagayyem ti tao a managpakatawa.—Eclesiastes 3:1, 4.
Kinamannakigayyem Kontra Kinaalembong
Sigun iti maysa a magasin a nangadmitir a daytat’ “giya iti naballigi a pannaki-date,” ti panagalembong isut’ sekreto tapno maallukoymo ti dimo kasekso. Naibaga kadagiti agbasbasa nga ensaywenda ti umisem ken makipinnerreng ken lalaingenda ti ‘mangirugi iti saritaan.’ Maikontra dayta a balakad iti kababagas ti pammagbaga ni Pablo ken ni Timoteo a tratuenna dagiti dina kasekso “buyogen ti isuamin a kinadalus.”—1 Timoteo 5:2.
Nupay bumileg ti amor propiom no agalembongka, saan a napasnek ken napudno dayta. Saan a kasapulan nga agalembong wenno agpammarangka a naemma iti mangsutil a wagas, tapno agbalin a makapainteres ti pannakisaritam. Saan met a kasapulan nga agimtuodka kadagiti di maitutop a saludsod tapno maammuam ti panagrikna ken panangmatmat ti dimo kasekso. Itultuloymo ti makisarita maipapan kadagiti banag a ‘nadalus ken maay-ayat,’ tapno maipakitam a talaga a rumangrang-ayka kas nataengan, ken naespirituan ti panagpampanunotna a lalaki wenno babai. (Filipos 4:8) No agtulnogka kadagiti nadiosan a prinsipio, agbalinkanto a makaay-ayo saan laeng nga iti dimo kasekso no di ket uray iti Dios a mismo. *—Proverbio 1:7-9.
[Footnotes]
^ Kitaem ti “Agimtuod Dagiti Agtutubo . . . Aniat’ Sekreto iti Panangpili iti Umiso a Kawes?” iti Oktubre 8, 1989, a ruar.
^ Sigun iti maysa a managsirarak, ipamatmat dagiti panagadal a dagiti nasaririt nga agtutubo ket masansan a masutil gapu kadagiti abilidadda isu a din ipadlaw ti dadduma nga agtutubo ti kinasariritda.
^ Ti kapitulo 12 iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, nga impablaak dagiti Saksi ni Jehova, ket addaan iti adu a praktikal a singasing maipapan iti panangpatanor iti panagraem iti bagi.
^ No ubingka pay unay a makiasawa, nainsiriban a tagiragsakem ti makikadua iti dimo kasekso iti nadumaduma a grupo. Kitaem ti artikulo nga “Agimtuod Dagiti Agtutubo . . . Kasano Ngay no Pagarupen ti Dadakkelko nga Ubingak Pay Unay a Maki-date?” iti Enero 22, 2001, a ruar ti Agriingkayo!
[Dagiti Ladawan iti panid 15]
Imbes a ti langam ti ipangpangrunam, ikagumaam a patanoren dagiti naespirituan a kalidad
[Ladawan iti panid 15]
Sursuruem ti makilangen iti nadumaduma a tattao