Liklikam ti Silo ti Sugal

“Awan idi ti epekto ti panagsugal iti salun-atko, ket kanayon a kinontrolko ti gastosek iti panagsugal. Ngem admitirek a kada agay-ayamak iti loteria, kanayon a piliek ti pagarupek a suerte a numerok.”​—Linda.

MAMATI ti adu a sugador iti suerte a numero wenno suerte a banag wenno sao. Mabalin a kanayon nga ar-aramidenda dagitoy a dida pampanunoten nga inaanito gayam dagitoy.

Dadduma a sugador ti agkararag pay ketdi iti Dios, nga agkidkiddaw a tulonganna ida a mangabak iti panagsugalda. Nupay kasta, inlanad ti Biblia ti panangkondenar ti Dios kadagidiay agkunkuna nga agdaydayaw kenkuana ngem ‘mangidasdasarda iti lamisaan maipaay iti dios ti Naimbag a Gasat.’ (Isaias 65:11) Wen, masimron ti Dios kadagiti aramid a mangitandudo iti inaanito a panamati iti  gasat. Kinaagpaysona, iparegta ti sugal ti palso a panagtalek iti makunkuna a Gasat.

Awanan bain met nga itantandudo ti panagsugal ti panagayat iti kuarta. Iti kagimongan ita a kumarkaro ti dina panangikankano kadagiti naespirituan a banag, ti kuarta ket naisukaten iti dios, ket ti panagsugal nagbalinen a nalatak a pamay-an ti panangdayaw iti dayta. Dagiti nangayed a casino nagbalinen a baro a lugar a pagdaydayawan ti tattao, ket ti kabarbaro a prinsipio wenno pilosopiada iti biag ket naimbag ti kinaagum. Natakuatan dagiti managsirarak nga ibagbaga ti kaaduan a mapmapan kadagiti casino a mapanda sadiay tapno “mangabakda iti dakkel a gatad ti kuarta,” saan a tapno aglinglingay. Nupay kasta, mamakdaar ti Biblia: “Ti ayat iti kuarta isu ti  ramut dagiti amin a kita ti makadangran a bambanag, ket babaen ti panangragpat iti daytoy nga ayat nayaw-awan ti sumagmamano manipud iti pammati ket sinalputda ti intero a bagbagida iti adu nga ut-ot.”​—1 Timoteo 6:10.

Iti 1 Corinto 6:9, 10, sibabatad a kuna ti Biblia: “Dikay payaw-awan. Uray . . . dagiti managrukbab iti idolo . . . naagum a tattao . . . didanto tawiden ti pagarian ti Dios.” Ti kinaagum ket saan laeng a makabaldado a sakit ti kagimongan; dayta ket makapapatay a naespirituan a sakit​—ngem dayta ket maysa a sakit a maagasan.

Naaddaanda iti Bileg nga Agbalbaliw

“Namin-adu a pinadasko ti agbalbaliw,” malagip ti nadakamat iti umuna nga artikulo a ni Kazushige. “Nabigbigko a madaddadael ti pamiliak gapu iti panagsugalko kadagiti kareraan a kadua dagiti gagayyemko. Kanayon a maabak met laeng ti aniaman a kuarta nga inabakko. Insugalko pay ti kuarta nga inurnong ni baketko para iti pannakaipasngay ti maikadua nga anakmi a lalaki, ket idi agangay rinugiak payen nga insugal ti pondo ti kompania a pangpanggedak. Nagbanaganna, napukawko a naan-anay ti panagraemko iti bagik. Masansan nga agsangit idi ni baketko ket impakpakaasina nga isardengkon ti agsugal, ngem diak latta maisardeng.”

Kalpasanna, rinugian ni Kazushige ti nakipagadal iti Biblia kadagiti Saksi ni Jehova. Kunana: “No kanayon a basaek ti Biblia, ad-adda a nagtalekak nga adda Dios ket magunggonaanak no dumngegak kenkuana. Inkeddengko a babaen ti bileg nga ipaay ti Dios, maisardengko ti agsugal. Iti pakasdaawak, saanko laeng nga insardeng ti agsugal no di ket ginurak metten dayta. Ket no panunotek ti rigat nga impaay ti panagsugalko iti pamiliak, maldaanganak unay. Anian a yamanko ken Jehova a Dios ta tinulongannak a mangisardeng iti pannakaadiktok iti panagsugal ken tultulongannak a mangannurot iti makapnek a panagbiag!”​—Hebreo 4:12.

Ti nadakamat iti panglukat nga artikulo a ni John, rinugianna met ti nagadal iti Biblia. Malagipna: “Ti panagadalko iti Biblia ti timmulong kaniak a mangtingiting manen iti kasasaadko. Ita pay laeng a talaga a naamirisko ti panangdadael ti panagsugal iti pamiliak ken iti bagik. Nabigbigko nga iparparegta ti panagsugal ti agimbubukodan ken naagum a kababalin dagiti tattao​—dagiti kalidad a kagura ni Jehova. Bayat nga intultuloyko ti nagadal, ti panagayatko ken Jehova pinabilegnak a mangisardeng iti panagsugal. Rinugiak ti nagsugal ta inar-arapaapko ti maaddaan iti nasaysayaat a biag. Ita ta simmardengak nga agsugal ken siraragsakak nga agserserbin ken Jehova, pimmayson dayta nga arapaap.”

Inkeddeng met ni Linda nga asawa ni John nga isardengnan ti agsugal. “Saan a nalaka,” kunana. “Ngem idi rinugianmi nga agassawa ti nakipagadal iti Biblia kadagiti Saksi ni Jehova, nasursurok nga ipateg dagiti mas importante a banag iti biag. Nasursurok nga ayaten saan laeng a dagiti banag nga ayaten ti Dios no di ket nasursurok pay a guraen dagiti banag a guraenna, agraman ti amin a kita ti kinaagum. Malaksid pay iti panangtagiragsakko iti addaan panggep a biag, ad-adun ti kuarta iti pitakak.”​—Salmo 97:10.

Babaen iti pannakigayyemmo ken Jehova a Dios, maaddaanka met iti bileg ken sirib a nasken tapno maliklikam ti silo ti panagsugal. No kasta ti aramidem, sumayaat ti pinansial, emosional, ken naespirituan a kasasaadmo. Iti kasta maragsakankanto no mapasaram nga agpayso ti sasao a nailanad idiay Proverbio 10:22: “Ti bendision ni Jehova​—isu dayta ti mangpabaknang, ket awan rigat nga inayonna iti dayta.”

[Blurb iti panid 11]

Ti kinaagum ket saan laeng a makabaldado a sakit ti kagimongan; dayta ket makapapatay a naespirituan a sakit

[Kahon/Dagiti Ladawan iti panid 9]

Panagsugal ken ti Datdatlag

Iti report iti National Gambling Impact Study Commission, imparipirip dagiti managsukisok idiay Duke University ti pakainaigan ti pannakayanunsio ti panagsugal ken ti panamati iti datdatlag. Kuna ti report: “Adu nga anunsio ti [loteria] ti nakasentro iti material a kinabaknang ken sanikua . . . Ngem daytoy ket saan a kinabaknang a nagun-odan gapu iti nagaget a panagtrabaho ken panagregget no di ket dagidiay nagun-odan babaen ti panagtalek iti datdatlag a naibasar kadagiti namnama, arapaap ken an-anito. Ken ammo ti tunggal manedyer ti loteria nga adu kadagiti kustomerna a kalaingan nga agpusta ti mangibasar iti pustada kadagiti bukodda nga anito, pasamak iti astrolohia, mammadles, ken patpatien a ‘libro dagiti tagtagainep’ nga addaan iti listaan dagiti numero a katupag dagiti nagan, petsa, ken tagtagainep. Imbes nga ipaganetget nga amin a numero ket mabalin a mapili ken ti panagpusta kadagiti paborito a numero ti mabalin a pakaabakan ti maysa a tao kadagiti sistema ti ay-ayam a parimutuel, wenno makina a mangbola kadagiti numero, dagiti sugador ti paregtaen ketdi dagiti mangpapaandar iti loteria nga itultuloyda ti agpili (ken agpusta) kadagiti pagay-ayatda a numero.”

[Dagiti Ladawan iti panid 10]

“Ti panagayatko ken Jehova pinabilegnak a mangisardeng iti panagsugal.”​—John

“Malaksid pay iti panangtagiragsakko iti addaan panggep a biag, ad-adun ti kuarta iti pitakak.”​—Linda

[Dagiti Ladawan iti panid 10]

“Iti pakasdaawak, saanko laeng nga insardeng ti panagsugal no di ket ginurak metten dayta.”​—Kazushige