Ammoyo Kadi?

(Masarakan dagiti sungbat daytoy a pannubok kadagiti naipaay a teksto ti Biblia, ket nayimprenta iti panid 14 ti kompleto a listaan dagiti sungbat. Para iti kanayonan nga impormasion, kitaenyo ti publikasion nga “Insight on the Scriptures,” nga impablaak dagiti Saksi ni Jehova.)

1. Idi imbilin ni Jezebel a mapapatay dagiti mammadto ni Jehova, siasino ti nangilemmeng iti 100 kadakuada kadagiti rukib? (1 Ar-ari 18:3, 4)

2. Ania a titulo ni Jesus ti binigbig uray ti narugit a sairo a pinaruar ni Jesus manipud iti maysa a tao iti sinagoga idiay Capernaum? (Lucas 4:34)

3. Ania ti nagan ti asawa ni Noemi? (Ruth 1:3)

4. Siasino ti lima a Romano nga agturay a dinakamat ni Lucas idi pinasingkedanna ti tiempo ti panangrugi ni Juan a Manangbautisar iti ministeriona? (Lucas 3:1)

5. Iti ania a direksion ti makinsango a ruangan agpadpada ti tabernakulo ken ti templo? (Numeros 3:38)

6. Mano ti annak a lallaki ni Jesse, ket maikamano ni David kadakuada? (1 Samuel 17:12, 14)

7. Apay a nagimtuod dagiti Pariseo ken ni Jesus? (Mateo 22:15)

8. Ania a siudad dagiti Filisteo ti nangalaan ni Samson iti 30 nga aruaten nga intedna kadagiti ‘nangsungbat’ iti burburtiana? (Uk-ukom 14:19)

9. Iti sirmata ni Juan maipapan iti trono ni Jehova, ania ti kaasping ti maikadua a sibibiag a parsua? (Apocalipsis 4:7)

10. Ania a siudad ti saan a dinadael ni Jehova idi a nagbabawi ti ari ken dagiti umilina manipud iti kinadakesda? (Jonas 3:1-10)

11. Apay a nabagbagaantayo nga ‘agtulnogtayo kadagidiay mangidadaulo’ iti kongregasion? (Hebreo 13:17)

12. Idi imbagana ti panangilaksid ti Dios iti natural nga Israel ken pananganamongna iti naespirituan a nasion, siasino a mammadto ti nangipakpakauna a “dagidiay saanko nga ili naganekto iti ‘ilik’”? (Roma 9:25)

13. Iti sirmata ni Juan, ania ti pinangparaut ti anghel ken Satanas? (Apocalipsis 20:1)

14. Manipud Roma, apay nga immakar da Aquila ken Priscila idiay Corinto? (Aramid 18:2)

15. Apay nga awan a pulos ti mabalin a pamilawantayo iti unget ti Dios? (Josue 7:1)

16. Nangyaspingan ni Isaias kadagiti nadangkes a tattao a naisina iti Dios? (Isaias 57:20)

17. Siasino ti kaudian kadagiti ari iti Juda a nagturay idiay Jerusalem? (2 Ar-ari 24:18)

18. Ania ti imbaga ni Jesus iti eskriba a nagkuna a sumurot iti sadinoman a papanan ni Jesus, a mangipasimudaag nga aglak-am iti rigat dagidiay sumurot kenkuana? (Lucas 9:58)

19. Siasino ti nadangkes nga ari ti Moab a dakkel ti tianna isu a limmumlom ti kampilan nga induyok ni Ehud iti dayta? (Uk-ukom 3:17-22)

20. Gapu ta di mamati a di ammo ni Jesus ti nabiit pay idi a napasamak idiay Jerusalem, ania ti inyimtuod ni Cleopas kenkuana? (Lucas 24:18)

 Dagiti Sungbat iti Pannubok

1. Ni Abdias, ti agay-aywan iti palasio

2. “Daydiay Santo ti Dios”

3. Elimelec

4. Tiberio Cesar, Poncio Pilato, Herodes Antipas, ti kabsatna a ni Felipe, ken ni Lisanias

5. Daya

6. Walo; buridek

7. “Tapno siluanda iti panagsasaona”

8. Ascalon

9. “Urbon a toro”

10. Nineve

11. Tapno mabalinda ti manungsungbat “buyogen ti panagrag-o ket saan a buyogen ti panagsennaay,” a mabalin a “makadangran” kadatayo

12. Oseas

13. “Dakkel a kawar”

14. Agsipud ta imbilin ni Claudio a pumanaw dagiti Judio idiay Roma

15. Kanayon a nainkalintegan, natimbeng, ken maitunos kadagiti galadna nga ayat, sirib, ken kinahustisia

16. Ti baybay no nadaleg dayta

17. Zedekias

18. “Ti Anak ti tao awan pangisaadanna iti ulona”

19. Eglon

20. “Agtataengka kadi a siksika laeng kas ganggannaet idiay Jerusalem?”