Manipud Kadagiti Agbasbasa

Panag-date Dagiti Agtutubo Kayatko ti agyaman unay kadakayo gapu iti artikulo nga “Agimtuod Dagiti Agtutubo . . . Panag-date ti Ubbing​—Aniat’ Pagdaksanna?” (Disiembre 22, 2001) Nabiit pay a kasta met laeng ti inyimtuodko ken ni nanangko​—‘Ania ngamin aya ti pagdaksan unay ti pannaki-date?’ Ammok ti sungbat, ngem kayatko laeng a maammuan tapno ad-adda a siguradoak iti dayta. Idi binasak ti artikulo, nariknak a kasla ammo ni Jehova ti pampanunotek. Daytoy nga artikulo ti nangpabileg iti determinasionko a saan a maki-date agingga a nakasaganaakon a makiasawa. Kanayon a magustuak ti isasangpet dagiti artikuloyo iti umiso a tiempo! Ulitek ti agyaman unay kadakayo.

L. F., Estados Unidos

Binasak a dagus ti artikulo, ket makaparegta unay dayta. Agarup 15 ti tawenkon, ket kasta unay ti pannakapilitko a maki-date. Dandani amin a kaklasek ket addaan kadagiti nobio, ken masansan nga adda makunada gapu ta awananak pay laeng iti nobio. Isu a napateg a talaga daytoy nga artikulo! Dagiti artikulo a kas iti daytoy ti makatulong kadakami a kanayon a manglaglagip iti nasayaat a pammagbaga a masarakan iti Biblia.

J. R., Finland

Sangapulo ket innem ti tawenko, ket kasta unay ti tarigagayko a maki-date​—uray no maapresiar wenno maipakitaan laeng iti interes​—iti saanko a kasekso. Nupay kasta, pinampanunotko dayta, ket naawatak a napateg ti agbalin pay a nataengan sakbay a maki-date. Daytoy ti makatulong kadakami a mangliklik kadagiti peggad ken saanmi nga ibaklay dagiti rebbengen a dimi ammo a tamingen.

A. G., Italia

Sangapulo ket innem ti tawenko. Daytoy nga artikulo ket naintiempuan kadakami nga aggagayyem. Nagtugawkami amin ken binasami dayta ket naawatanmi nga adda dagiti peggad ti pannaki-date no ubbingkami pay laeng. Daytoy nga artikulo ti nakatulong kadakami a manganag iti kaipapanan ti pannaki-date ken ti panangmatmat ti Biblia iti dayta. Ti konklusion ti nangipabigbig kaniak a no agurayak a maki-date, rumang-ayak iti naespirituan ken mabalinko nga usaren “ti kinalasbang ti kinaagtutubo” a mangaramid iti kasta nga irarang-ay.​—1 Corinto 7:36.

R.L.W., Estados Unidos

Pakasaritaan ti Biag Napanunotko a masapul nga ibagak kadakayo a kasta unay ti panangapresiarko iti artikulo a napauluan “Napabilegak Gapu iti Panagtalekko iti Dios.” (Disiembre 22, 2001) Impakita ti kapadasan ni Rachel Sacksioni-Levee no kasano a pabpabilgen ni Jehova a Dios dagiti adipenna kadagiti pakarigatanda. Bayat a dumakdakes ti kasasaad ti lubong, dagiti kapadasan a kas iti daytoy ti makatulong kadakami nga agtultuloy a mangaramid iti pagayatan ti Dios iti laksid dagiti pakasuotanmi.

J. F., Britania

Arthritis Agyamanak unay iti serye maipapan iti arthritis. (Disiembre 8, 2001) Sangapulo ket siam ti tawenko ket naammuak nga addaanak iti arthritis idi 8 ti tawenko. Kanayon a mariknak ti ut-ot, nupay naut-ut-ot dayta iti dadduma nga aldaw. Makaliwliwa kaniak ti namnama a panagbiag iti baro a lubong ti Dios, inton mapukawen kadatayo ti amin a mangpakapuy a sakit. Agingga a dumteng dayta a tiempo, agtalekak a pabilgennak ti Dios nga agibtur iti daytoy naut-ot a sakit.

M. R., Brazil

Makapainteres unay ti impormasion iti daytoy a serye. Sangapulo ket walo ti tawenko ket iti naudi a tallo a tawen, agsagsagabaak iti manmano a kita ti arthritis. Gapu iti namnama nga ipaay dagitoy nga artikulo, makapagtultuloyak nga agserbi ken Jehova.

M. U., Italia

Agyamanak kadakayo gapu kadagiti artikulo maipapan iti arthritis. Kayatko a dumteng koman ti Pagarian ti Dios tapno mabalinak ti ‘kumalay-atto a kas iti panagkalay-at ti kalakian nga ugsa.’ (Isaias 35:6) Pito ti tawenko ket adda rheumatoid arthritis dagiti tumengko.

E. I., Grecia