Dungdunguen a Taraken Wenno Narungsot a Mammapatay?

BABAEN TI MANNURAT TI AGRIINGKAYO! IDIAY POLAND

MAYSA nga ag-jog-jogging ti dinuklos ti narungsot nga aso ket naadasan iti dara agingga a natay. Maysa a balasitang ti pinatay ti mismo a tarakenna nga aso a Rottweiler. Adda nakabulos nga aso a German shepherd a nangdangran iti siam ti tawenna nga ubing a lalaki iti imatang dagiti dadakkelna. Sumagmamano laeng dagitoy kadagiti trahedia idiay Poland nga inaramid dagiti aso a puro ti pulida.

Tapno maliklikan dagita a trahedia, ti dadduma nga autoridad palubosanda laeng ti tattao nga agtaraken iti sumagmamano a puli ti aso no nakaaladan iti sertipiko. Kuna ni Barbara Zaleska, a kameng ti Polish Kennel Association, a maited koma ti sertipiko gapu iti makinkukua, saan a gapu iti aso “ta ti makinkukua ti mangikeddeng no dagiti puli ti aso a mastiff, Rottweiller, ken bullterrier ket agbalinto a narungsot wenno agtalinaedda a gayyem ti tattao.”

Iti dadduma a kaso, masanay dagiti aso nga agbalin a mammapatay. Dagiti pamay-an kano dagiti mangsanay ket pakairamanan ti panangmalo, panangbisin, ken uray pay “ti panangsanay a mamapatay,” a pakainaigan ti panangsanay iti aso a dumuklos ken mangrangrangkay kadagiti sinsinan a biktimana. Sumaganad, masanay ti aso a makiangat kadagiti nakapkapuy nga aso a sigurado a mapatayna. No nalpasen ti panangsanay, sisasaganan ti aso a makipaset iti agpaypayso a panagaangat dagiti aso, a pagraragsakan dagiti sugador ken dagiti agrayo iti panangibukbok iti dara.

Sibabatad nga ibaga ti Biblia ti panangmatmat ti Dios iti kinaranggas kadagiti animal. Kunana: “Daydiay nalinteg ipategna ti kararua ti naamo nga animalna, ngem naulpit dagiti asi dagidiay nadangkes.” (Proverbio 12:10) Dagidiay mayat a mangay-ayo iti Dios dida parigaten dagiti animal. Maragsakantayo ta iti baro a lubong ti Dios, agpatingganton ti panangsanay kadagiti animal nga agbalin a mammapatay tapno pagay-ayaman laeng wenno iti dadduma pay a rason.​—Salmo 37:9-11.