Manipud Kadagiti Agbasbasa

Kinatured a Mangsaranget iti Didigra Pagyamanan iti serye ti akkub a “Kinatured a Mangsaranget iti Didigra​—Ti Aldaw a Pannakarbek ti Twin Towers.” (Enero 8, 2002) Natukayak unay kadagitoy nga artikulo, ket impaamirisda kaniak no kasano a mabalin a maapektaran ti siasinoman kadatayo iti di mapakpakadaan a pasamak. Maladingitanak no panunotek ti nagadu a biag a nakeltay.

S.B.R., Denmark

Pagyamanan iti panangipablaakyo iti “Kararag ni Tatiana.” Madaman nga agsangsangitak idi basbasaek ti serye ti akkub, ngem idi nabasak daytoy a kahon, nagsangitak iti napigsa. Kayatko nga ikararag ti naespirituan nga irarang-ay dagiti ubbing a naulila iti ama wenno ina gapu iti iraraut dagiti terorista tapno makitadanto manen da tatang wenno nanangda idiay baro a lubong. Gapu met iti daytoy nga artikulo, immuneg ti apresasionko ta kas maysa kadagiti Saksi ni Jehova, addaanak iti naraniag a namnama iti masakbayan.

T. A., Japan

Nupay agnanaedak ditoy Alemania, naklaatkami a sangapamiliaan kadagiti napasamak idi Setiembre 11. Tallo a bulan kalpasanna, agdo-drowing pay laeng ti siam ti tawenna a balasangko kadagiti ladawan ti eroplano a nangdungpar iti maysa a nangato a pasdek. Segseggaanmi ti aldaw inton awanen dagita a didigra.

E. G., Alemania

Idi nakitak ti napasamak idiay New York, nagkararagak ken ni Jehova ket kiniddawko a pabilgenna dagiti nakalasat ken ikkanna iti namnama ti pampamilia dagiti biktima. Idi binasak dagitoy nga artikulo, nakitak no kasano a nasungbatan dagiti kararagko agraman ti kararag ti adu pay a sabsabali. Inusigko manen ti biagko idi naammuak a mabalin a dumteng ti trahedia iti aniaman nga oras.

M. V., Italia

Apresiarenmi unay ti imbaga dagiti tattao a naispal a mismo iti dayta a didigra. Nakasangitkami iti imbaga dagiti nakalasat. Kiddawenmi ken ni Jehova a tulonganna koma ti amin a naapektaran ken sapay koma ta maliwliwada babaen ti Agriingkayo! Nupay ubingkami pay laeng, naparegtakami kadagiti saludsod a namagpanunot kadakami maipapan iti panagbiagmi ken kadagiti ipangpangrunami. Sapay koma ta diyo isardeng ti agipablaak iti daytoy a magasin.

T. M. ken A. P., Slovenia

Sangapulo ket uppat ti tawenko ken estudianteak iti maikatlo a tawen iti haiskul. Idi nabasak daytoy a serye, naawatak ti buteng a pinataud ti insidente. Nakitak ti panangisakripisio ti adu a tattao iti biagda tapno maispalda ti sabsabali. Idi dimngegak kadagiti damag, naammuak nga adu a bombero ti natay, ngem ita laeng a natukayak iti kasta unay. Nagsangitak idi nabasak ti kahon a napauluan iti, “Kararag ni Tatiana.” Kabayatan ti immuna a tawenko iti haiskul, naulilaak met iti ama gapu iti panagsakitna. Ti kahon ti namagpanunot kaniak, ‘Ti aya baro a lubong ket napaypayso kaniak a kas iti kinapaypaysona ken ni Tatiana?’ Dagiti mannursurok iti haiskul ken ti adu a gagayyemko ket kayatko nga ikkan iti daytoy a magasin. Pangngaasiyo ta itultuloyyo ti agimprenta kadagitoy a nagsayaat a magasin!

H. T., Japan

Baro a Disenio Makaparagsak a kitaen no kasano a pimmintas ti disenio ti Agriingkayo! nanipud idi damo a rinugiak ti agbasa iti dayta idi 1978. Idi sinukimatko ti Enero 8, 2002, a ruar, nagustuak unay dagiti panidna. Nakaminminar ti paulo dagiti artikulo, ket makaay-ayo dagiti ilustrasionna. Ad-adda a makaparagsak itan ti agbasa gapu iti intero a diseniona. Siguradoak a daytoy baro a diseniona ti mangallukoy iti adu pay a napasnek nga agbirbirok ken ni Jehova.

V.P.L., Brazil