Ti Panangmatmat ti Biblia

Dagiti Kararag a Denggen ti Dios

“Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo. Ta ti tunggal maysa nga agdawdawat umawat, ken ti tunggal maysa nga agsapsapul makasarak, ket iti tunggal maysa nga agtuktuktok mailukatto dayta.”​—LUCAS 11:9, 10.

GAPU ta naan-anay nga agtalek ti adu a Kristiano iti nadakamat iti ngato nga imbaga ni Jesu-Kristo, ikarkararagda iti Dios ti maipapan kadagiti parikut ken pakadanaganda, ta siguradoda nga ay-ayatenna ida ken maseknan kadakuada. Nupay kasta, maupay ti dadduma bayat nga ur-urayenda ti sungbat dagiti kararagda. Pagarupem met aya a saan a masungsungbatan dagiti kararagmo? Dumdumngeg aya ti Dios no agkarkararagka?

Uray no kasla saan a masungsungbatan dagiti kararagtayo, dina kayat a sawen a saan a denggen ti Dios dagitoy. Ipasigurado kadatayo ti Biblia: “Dagiti mata ni Jehova addada kadagidiay nalinteg, ket dagiti lapayagna situturong iti ararawda.” (1 Pedro 3:12) No kasta, denggen ni Jehova a Dios ti kararag dagiti nalinteg, maikararag man dagitoy iti napigsa, wenno naulimek. (Jeremias 17:10) Sukimaten met ni Jehova dagiti panunot ken rikna a nangtignay iti maysa tapno agkararag, nga uray ti mismo nga agkarkararag ket mabalin a dina maawatan a naan-anay wenno ammo dayta.​—Roma 8:26, 27.

Nupay kasta, nasken a masurot dagiti kararag ti sumagmamano a maikalikagum tapno patgan ti Dios dagitoy. Umuna, masapul a maiturongda laeng iti Dios​—saan a ken Jesus, iti maysa a “santo,” wenno iti maysa nga idolo. (Exodo 20:4, 5) Masapul met a maidatag dagiti kararag iti nagan ni Jesu-Kristo nga Anak ti Dios. (Juan 14:6) Kaipapanan kadi daytoy a denggen nga umuna ni Jesus dagiti kararagtayo sana iyallatiw iti Dios? Saan. Imbes ketdi, babaen ti panagkararag ken ni Jehova iti nagan ni Jesus, ipakpakaammotayo  nga adalannatayo ni Kristo ken bigbigentayo a mabalintayo ti umadani iti Dios gapu iti subbotna.​—Hebreo 4:14-16.

Masapul nga agkararagtayo a buyogen ti pammati. Inggunamgunam ni apostol Pablo: “No awan ti pammati isu [ti Dios] di mabalin nga ay-aywen a naan-anay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Kasano nga ammo ti maysa a tao no addaan iti kasta a kita ti pammati? Kastoy ti sungbat ti mannurat iti Biblia a ni Santiago: “Ipakitak kenka ti pammatik babaen kadagiti aramidko.” (Santiago 2:18) Wen, ti pammati ket mangpataud kadagiti aramid. Dagitoy met ti mangipakita nga ay-ayatentayo ti Dios ken ikagkagumaantayo a paragsaken.

Masapul met a napinget dagiti agdaydayaw iti Dios no agkarkararagda. Imbatad ni Jesus daytoy idiay Lucas 11:9, 10, a nadakamat itay. Ngamin, no maminsan laeng nga ikararag ti maysa a tao ti maysa a banag, saan kadi nga ipasimudaag daytoy nga isut’ saan a talaga a napasnek iti kidkiddawenna?

Ti Ikarkari ti Dios

Kasano man kasansan ken kapasnek ti panagkararagtayo, kaskasdi nga agbibiagtayo kadagiti “napeggad a tiempo a narigat a pakilangenan.” (2 Timoteo 3:1) Nupay agpayso nga imbaga ni Jesus kadagiti pasurotna nga agbalinda a naragsak, dina imbaga nga agbiagda nga awanan iti problema. (Mateo 5:3-11) Ngem agpayso nga imbagana nga agbalin a naragsak dagiti adalanna iti laksid ti panagleddaang, bisin, waw, wenno pannakaidadanes.

Ti kinaragsak a nadakamat ni Jesus ket saan nga agpannuray iti kaaddatayo kadagiti kasayaatan a kasasaad. Imbes ketdi, daytat’ pannakariknatayo iti pannakapnek, agsipud ta agserserbitayo iti Dios. No kasta, maaddaantayo iti kinaragsak uray iti tengnga dagiti pakarigatan.​—2 Corinto 12:7-10.

Panangtaming Kadagiti Personal a Parikut

Awan ngarud aya ti serserbi ti panangikararag iti Dios maipapan kadagiti personal a banag a kas iti panagbirok iti maitutop a pakiasawaan wenno panangtaming kadagiti parikut ti pamilia, salun-at, wenno panggedan? Saan, ta nupay di ikarkari ti Dios a simimilagro a balbaliwanna dagiti kasasaad ti biagtayo, ikkannatayo iti kinasirib a mangtaming kadagitoy. Kastoy ti insurat ni Santiago maipapan kadagiti pakasuotan: “No ti asinoman kadakayo agkurang iti sirib, agtultuloy koma nga agdawat iti Dios, ta isu mangted a sipaparabur kadagiti isuamin ken awanan panangumsi; ket maitedto dayta kenkuana.” (Santiago 1:5) No kasta, iwanwannatayo ni Jehova babaen ti nasantuan nga espirituna. Daytoy ti makatulong kadatayo a mangtarus ken mangyaplikar kadagiti prinsipio ti Biblia iti panagaramidtayo kadagiti desision.

Siempre, saan a ti espiritu ti Dios ti mangaramid kadagiti desisiontayo no di ket masapul a datayo a mismo ti agregget. Kas pagarigan, no adda parikuttayo, nagsukimattayo kadin maipapan iti dayta ken inusigtayon ti nadumaduma nga aspeto ken elemento ti situasion? Daytoy ket maysa nga aramid tapno maipakitatayo iti Dios nga adda pammatitayo. (Santiago 2:18) Sipipinget kadi nga ikagkagumaantayo a risuten ti parikuttayo, a kanayon a kidkiddawentayo ti panangiwanwan ti Dios? (Mateo 7:7, 8) Siaannad kadi a sinukimattayon dagiti prinsipio ti Biblia nga agaplikar iti situasion? Ti Sao ti Dios mapagbalinnatayo a ‘naan-anay a makabael, naan-anay a nakabalan maipaay iti tunggal naimbag nga aramid.’​—2 Timoteo 3:16, 17.

Nupay agpayso a kabaelan ti Dios ti bumallaet kadagiti aramid ti tattao ken ikkaten ti amin a parikuttayo, palpalubosannatayo a mangikeddeng a siwayawaya. Nakalkaldaang ta adu ti mangikeddeng a siwayawaya a pakadangranan ti dadduma. Dayta ti gapuna a dadduma kadagiti parikut nga ikarkararagtayo ket mabalin nga agtultuloy agingga a dumteng ti baro a lubong ti Dios. (Aramid 17:30, 31) Daytat’ mabalin a maysa a kasasaad iti lugar a pagnanaedantayo, kas iti krimen wenno literal a gubat; wenno mabalin a nainaig dayta iti panagibturtayo iti panangparigat dagiti bumusbusor. (1 Pedro 4:4) Masapul a bigbigentayo a saanen a sumayaat ti dadduma a kasasaad iti daytoy nadangkes a lubong.

Nupay kasta, ay-ayaten ti Dios dagiti agdaydayaw kenkuana ket kayatna a tulongan ida. Inton ti Pagarianna ti kakaisuna nga agturayen iti intero a daga, naan-anay a pukawennanto dagiti nakaro a parikut iti daytoy a lubong. (Apocalipsis 21:3, 4) Agingga iti dayta a tiempo, masapul a sipipinget a kiddawentayo ti panangiwanwanna iti panangtamingtayo kadagiti parikuttayo iti biag. No aramidentayo dayta, masiguradotayo a tungpalen ni Jehova ti karina iti Biblia a mabasa iti Isaias 41:10: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.”