Ti Naatap a Coelacanth
Ti Naatap a Coelacanth
BABAEN TI MANNURAT TI AGRIINGKAYO! IDIAY KENYA
IDI Abril 2001, adda kabaian a coelacanth (maibalikas a see-la-kanth) a natiliw iti baybay ti Kenya. * Ti ikan ket 1.7 a metro ti kaatiddogna ken agtimbang iti 77 a kilo. Mailasin ti coelacanth babaen ti tallo a pamukelen a murdong ti ipusna ken ti asul a kolorna a batekbatekan iti puraw.
Maipagarup idi a nabayagen a naungaw ti coelacanth. Pagammuan ta idi 1938, adda coelacanth a natiliw iti baybay ti South Africa. Daytoy ket maysa kadagiti nakaskasdaaw unay a natakuatan dagiti eksperto iti animal iti maika-20 a siglo. Agingga idi, naammuan ti kaadda ti ikan gapu laeng kadagiti natakuatan a fossil. Nanipud iti damo a panagtiliw, addan dadduma pay a coelacanth a nasirpatan iti asideg ti Mozambique ken Madagascar. Adda met kalkalainganna a kaaduda a natakuatan idiay Comoro Islands.
Saan nga agitlog dagiti kabaian a coelacanth iti mapessaan iti danum. Imbes ketdi, dagitoy ket agpataud kadagiti itlog a tumanor ken mapessaan iti uneg ti bagi ti kabaian wenno kalpasan unay a rummuar dagitoy. Sangapulo ket pito kadagita nga itlog—a kas iti kadakkel ti bola ti tennis ti tunggal maysa—ti naala manipud iti maysa a kabaian a natiliw itay napan a tawen.
Dagiti parsua iti baybay a kas iti coelacanth itan-okda ti kinasirib ken nadumaduma a dinisenio ti Namarsua kadakuada a ni Jehova a Dios.—Salmo 148:7.
[Footnote]
^ The name coelacanth is derived from the Greek words koilos (hollow) and akantha (spine), describing the fish’s hollow fin spines.
[Picture Credit Line iti panid 23]
Retrato ken dagiti drowing: Ichthyology Department/NATIONAL MUSEUMS OF KENYA