Ti Pangkayaw Dagiti Numero

PANUNOTEM ti maysa a lubong nga awanan kadagiti numero. Mabalin nga awan ti kuarta. Ti negosio ket malimitaran laengen iti direkta a panagsisinnubor. Ket ti met ngay ay-ayam? No awan ti numero, ditay mabilang dagiti puntos ti maysa nga umaayam wenno ti maysa a grupo ken ditay pay ammo no mano ti rumbeng nga agay-ayam iti maysa a grupo!

Ngem malaksid iti praktikal a pakausaranda, kuna ti dadduma nga adda met misterioso a kaipapanan dagiti numero. Ngamin, maawatan laeng dagitoy. Saanmo a makita, masagid, wenno maarikap dagiti numero. Kas pagarigan: Ti mansanas ket addaan iti naisangsangayan a kolor, kasasaad, kadakkel, sukog, ayamuom, ken raman. Mabalinmo a sukimaten ti tunggal maysa kadagitoy a kalidadna, tapno maammuam no ti maysa a banag ket talaga a mansanas, lemon, bola, wenno sabali a banag. Ngem naiduma ti numero. Mabalin a saan nga agpapada ti dua a grupo ti pito a banag​—malaksid iti bilangda a pito. Isu a tapno maawatam ti kaipapanan dagiti numero​—kas pagarigan, tapno maawatan ti nagdumaan ti innem ken pito​—masapul a maawatam ti banag a di makita. Ket no mangrugin nga ipapan dagiti tattao a mabalin nga adda kaipapanan dagiti numero, panunotendan nga adda misterioso a kaipapanan dagita.

Nagbalin a Palso a Siensia ti Insuro ni Pythagoras

Gagangayen kadagiti nagkauna a kagimongan ti mangipapan nga adda naisangsangayan a kaipapanan dagiti numero. Insuro ti maysa a pilosopo a Griego ken matematiko a nagbiag idi maika-6 a siglo K.K.P. a ni Pythagoras, a mabalin a madeskribir ti amin a banag babaen kadagiti numero. Isu ken dagiti pasurotna ti nangikalintegan a ti intero nga uniberso ket maysa a pagarigan ti kinaurnos ken panagtutunos. No kasta, saan kadi a sigud nga adda pakainaigan dagiti numero iti amin a material a banag?

Nanipud idi panawen ni Pythagoras, ti panangipatarus  iti kaipapanan dagiti numero ket maus-usaren iti panagpadles ken iti panagipatarus kadagiti tagtagainep ken pamay-an met a makatulong iti panagikabesa. Daytoy ket us-usaren dagiti Griego, Muslim, ken miembro ti Kakristianuan. Babaen ti panangusarda iti maysa a sistema ti numerology a maawagan iti gematria, adda numero nga intuding dagiti Judio a Cabalist (dagiti mamatpati iti Cabala wenno tradisional a Judio a mistisismo) para iti tunggal letra ti Hebreo nga alpabeto isu a kunaenda a nakasarakda kadagiti nalmeng a kaipapanan dagiti Hebreo a Kasuratan.

Umasping met iti dayta ti moderno a numerology. Masansan a ti nagan ken petsa ti pannakaipasngaymo ti pangrugian. Adda maituding a numero iti tunggal letra ti naganmo. Babaen ti pananginayon kadagitoy​—iti numero ti bulan ken petsa ti pannakaipasngaymo​—ikeddeng ti numerologist ti kangrunaan a numerom. Kalpasanna, ikkanna iti naisangsangayan a kaipapanan dagitoy a numero, a patienna a mangipaay iti kompleto a deskripsionmo​—agraman ti personalidadmo, ti dimo mapupuotan a tarigagaymo, ken ti pagtungpalam.

Nalabit ti pudno a pangkayaw ti numerology ket ti kasla kinaumiso ti panangamirisna. “Adu a tattao ti namati iti numerology gapu ta dandani apag-isu ti pannakaibagay dagiti numero iti kababalin dagidiay naamiris sigun iti numeroda,” kuna ni Edward Albertson iti librona a Prophecy for the Millions. Ngem ti numerology ket maawagan met a palso a siensia. Apay? Adda aya pamkuatam a mangatap a daytat’ maysa a siensia?

[Kahon/Dagiti Ladawan iti panid 5]

DAGITI NALMENG A MENSAHE ITI BIBLIA?

Iti librona a The Bible Code, kuna ti periodista a ni Michael Drosnin a natakuatanna dagiti nalmeng a mensahe iti Hebreo a Kasuratan babaen ti panangamirisna ti computer. Sigun ken ni Drosnin, ti “code” impalgakna ti sasao nga Ingles nga “assassin that will assassinate” wenno “mammapatay a mangpapatay” ken ti nagan a Yitzhak Rabin​—ket natakuatanna daytoy makatawen pay sakbay a napapatay ni Primero Ministro Rabin iti Israel.

Kas ninamnama, talaga a makapariro ti The Bible Code. Impakita ni Dave Thomas, maysa a matematiko ken pisiko, a ti panangamiris ti computer iti aniaman a teksto ket mangpataud iti kasla nalmeng a mensahe. Idi inamirisna dagiti mismo a teksto ni Drosnin, natakuatan ni Thomas ti Ingles a sasao a “code,” “silly,” ken “hoax.” “Mabalin a matakuatan dagiti nalmeng a mensahe iti sadinoman,” kuna ni Thomas, “no la ketdi ta adda panawenmo ken ikagumaam a sukimaten ti nagadu a pagarup.”

Gapu ta kabaelan ti computer ti agaramid iti nagadu a kombinasion, mabalin a makasarak kadagiti grupo ti letra a mabalin nga usaren kas maysa a kita ti padles. Ngem naiparna laeng daytoy ket dina paneknekan a naglaon ti Biblia kadagiti nalmeng a mensahe. *

[Footnote]

[Ladawan iti panid 4]

Insuro ni Pythagoras a mabalin a madeskribir ti amin a banag babaen kadagiti numero

[Credit Line]

Courtesy National Library of Medicine