Manipud Kadagiti Agbasbasa

Aldaw ti Kasar Apresiarek unay ti serye ti akkub a “Ti Aldaw ti Kasar​—Panamagbalin iti Dayta a Naragsak a Pangrugian.” (Pebrero 8, 2002) Yantangay ubingak pay, isagsaganak ti panunotko iti napateg nga addang iti panagasawa. Impaawat kaniak dagitoy nga artikulo no kasano ti agsagana a di marigatan a gagangay a mapasamak iti adu nga agtutubo nga agnobio ken no kasano a pagtalinaeden a naragsak ti panagasawa. Pangngaasiyo ta itultuloyyo ti panangasikaso kadagiti kas kadakami a mangikagkagumaan a mangyaplikar iti kayat ni Jehova nga aramiden dagiti adipenna.

F. C., Italia

Kanayon a masmasdaawak iti naintiempuan unay a panangipaay ni Jehova iti panangiwanwan iti tiempo a kasapulak unay dayta. Kasta ti naaramidan ti Agriingkayo! a Pebrero 8, 2002. Iti napalabas a sumagmamano a bulan, iplamplanomi nga agnobio ti kasarmi ket mangrugrugin a mariknami ti rigat. Pinalagipannakami dagiti panglukat nga artikulo a talaga a nagsayaat dagitoy a bulan ti panagplano ken ti panagdanag ket mangpataud laeng iti rigat ken pannakaupay.

H. M., Australia

Ipasimudaag ti panid 10 iti serye ti akkub ti magasinyo a mabalin a panawan ti asawa a lalaki ti sangakabbalayanna no patienna nga adda dagiti pamkuatanna a sumina. Awan ti masarakanmi ken ni baketko manipud iti Biblia a mangpatalged iti daytoy. Kinapudnona, nabatad a ti kasumbangirna ti isursuro ti Biblia​—mabalin a pumanaw ti asawa a babai, ngem masapul nga agbati ti asawa a lalaki. Sigun iti Genesis 2:24, ti maysa a lalaki ket masapul a “makitipon iti asawana.” Ket kuna ti 1 Corinto 7:11 a “no isu agpayso a sumina,” ngem kalpasanna innayon ti bersikulo, “ti lalaki saanna koma a panawan ti asawana.”

K. L. Australia

Kastoy ti sungbat ti “Agriingkayo!”: Masapul a mausig ti Genesis 2:24 sigun iti kontekstona. Ti bilin ti Dios a nailanad sadiay ket saan a naited kas instruksion maipapan iti posible a panagsina. Ibatad ti surat ni Pablo kadagiti taga Corinto a napateg ken ni Jehova ti panagasawa, isu a masapul nga ikagumaan ti agassawa a pagtalinaeden ti panagasawada. Ngem agparang a saan a panggep ni Pablo ti mangpataud iti dua a pagalagadan​—maysa para iti asawa a babai ken maysa para iti asawa a lalaki. Idagadag dagiti bersikulo 10 ken 11 agpadpada iti asawa a lalaki ken babai a dida koma agsina no mabalin. Nainkalintegan ngarud a ti agaplikar iti asawa a babai ket agaplikar met iti asawa a lalaki.

Kea Makaparagsak a basaen ti artikulo a “Kea​—Bulagaw iti Kabambantayan” (Pebrero 8, 2002) ta uray la a nagpaggaakak a nangbasa iti dayta. Talaga a naragsak a Dios ni Jehova! Ti maysa laeng a pudno a naayat a Namarsua ti makabael a mangparsua iti pakaragsakan unay ti sangatauan. Segseggaak ti aldaw inton makitak ken mapaliiwko a mismo ti nakaay-ayat a tumatayab a kea. Agyamanak unay saan laeng nga iti daytoy nga artikulo no di iti adu pay a makapainteres ken makapabileg iti pammati nga artikulo nga isursuratyo.

R. R., Alemania

Kalpasan unay a pinanawannak ni lakayko, naawatko ti Agriingkayo! a Pebrero 8, 2002. Talaga a narigatanak a mangakseptar iti akkubna a maipapan iti aldaw ti kasar. Pinampanunotko, ‘Apay a saankami a nagbalin a naragsak ken ni lakayko a kas iti agassawa iti akkub ti magasin?’ Ngem idi nabasak ti artikulo maipapan iti kea iti isu met la a magasin, nagpaggaakak. Ita la a naammuak nga adda gayam kasta a nalaing a tumatayab! Nabang-aran ti pusok. Kas man la parparegtaennak ni Jehova a kunkunana: “Tagiragsakem ti biag!” Pagyamanan unay.

M. Y., Japan