Panangsapul Kadagiti Solusion

NANGRUGI idi 1972, nasurok a sangagasut a nasion ti nagpirma iti internasional a tulagan a mangiparit iti panangpataud, panagaramid, ken panangipempen kadagiti biolohikal nga igam. Maawagan daytoy a tulagan iti Biological and Toxin Weapons Convention (BTWC). Daytoy ti kaunaan pay laeng a nangiparit iti amin a kita dayta nga igam. Ti laeng pakapilawanna ket saan a naibinsabinsa ti maysa a pamay-an tapno maammuan no tungtungpalen dagiti nasion dagiti pagannurotan.

Narigat a maammuan no agpayso a saan nga agpatpataud dagiti pagilian kadagiti biolohikal nga igam, ta dagiti pamay-an ken pannakaammo a mausar kadagiti natalna a panggep ket mabalin met nga usaren a mangpataud kadagiti biolohikal nga igam. Daytoy “dua a pakausaran” ti biotechnology palakaenna ti panangilimed iti panangpataud iti adu nga igam kadagiti planta ken laboratorio a kasla mangitantandudo kadagiti aramid a pagimbagan dagiti sibilian.

Tapno marisut ti parikut, nagtutulag dagiti delegado ti nadumaduma a nasion a tungpalenda dagiti annuroten a nagtutulaganda idi 1995. Iti nasurok nga innem a tawen, nagnunumuanda dagiti espesipiko nga annuroten tapno masigurado a tungpalen dagiti nasion ti BTWC. Idi Disiembre 7, 2001, nariribuk ti panagpatingga ti tallo a lawas a komperensia a tinabunuan ti 144 a partido ti tulagan idi 1972. Ngamin, saan nga immanamong ti Estados Unidos kadagiti kangrunaan a singasing no kasano a maammuan a matungtungpal ti BTWC. Kuna ti Estados Unidos a mabalin a masiimda no palubosanda ti sabsabali a pagilian a mangsukimat kadagiti namilitariaan ken industrial a pasilidadda.

 Ti Mabalin a Mapasamak iti Masanguanan

Agpadpada nga adda dakkel a pagimbagan ken pagdaksan ti biotechnology. Dadduma a kangrunaan a teknolohia​—ti metallurgy, eksplosibo, internal combustion, abiasion, elektroniks​—nausardan saan laeng a maipaay kadagiti natalna a panggep no di ket kadagiti pay naranggas. Kastanto met aya iti biotechnology? Adut’ mamati a kastanto ti mapasamak.

Kinuna ti maysa a report ti U.S. Commission on National Security idi 1999: “Dagiti indibidual ken kasta met ti adu a grupo . . . maaddaandanto iti pannakabalin ken impluensia, ket addanto dagiti nakaam-amak a pamay-anda a mangdadael. . . . Ad-adunto ti grupo dagiti aktibista ken indibidual a mabalin nga agtignay sigun kadagiti kasasaad, a masansan a matignay gapu iti narelihiosuan a regta, ti kasla karkarna a pammati, wenno nakaro a sakit ti nakem. Mabalinen nga usaren ti adu a terorista dagiti teknolohia nga us-usaren laeng idi ti dadakkel nga estado ket rautenda ti pagnanaedan ti adu a populasion.”

Nupay ditay ammo no ania ti mapasamak iti asidegen a masanguanan, ammotayo no ania ti pampanunoten ti Dios maipaay iti sangatauan. Ikarkari ti Biblia a dumtengto ti tiempo inton dagiti tattao ditoy daga ket “agnaeddanto a sitatalged, nga awan asinoman a mamagpigerger kadakuada.” (Ezequiel 34:28) Tapno maammuanyo ti ad-adu pay maipapan iti dayta a makaliwliwa a kari, makiumankayo kadagiti Saksi ni Jehova iti lugaryo wenno agsuratkayo iti maitutop nga address nga adda iti panid 5 daytoy a magasin.

[Ladawan iti panid 10]

Mangpatpataud dagiti managsukisok kadagiti pamay-an a mangsumra iti anthrax

[Credit Line]

Retrato nga impaay ti Sandia National Laboratories

[Ladawan iti panid 10]

Bioweapons Conference, Nobiembre 19, 2001, Switzerland

[Credit Line]

AP Photo/Donald Stampfli

[Dagiti Ladawan iti panid 11]

Ikarkari ti Biblia a dumtengto ti tiempo inton ti amin ket “agnaeddanto a sitatalged”