Agsolsolo a Nagannak, Ngem Saan nga Agmaymaysa

“No sumangpet dagiti annakko ket arakupendak ken ibagada nga ay-ayatendak, dayta ti kasayaatan a paset ti panagbalin nga ina.”​—DORIS, AGSOLSOLO NGA INA TI DUA NGA ANAK.

MABALIN a makasarak dagiti agsolsolo a nagannak iti pammatalged iti kunaen ti Biblia: “Ti annak ket bendision ken sagut a naggapu iti APO.” (Salmo 127:3, Contemporary English Version) Dagiti annak ket napateg iti imatang ti Dios, nupay napadakkel dagitoy kadagiti pamilia nga addaan iti agsolsolo a nagannak. Kayat ti Namarsua kadatayo nga agballigi dagiti pamilia nga addaan iti agsolsolo a nagannak. Kuna ti Biblia maipapan kenkuana: “Ti awan amana nga ubing ken ti balo a babai pabang-aranna.” (Salmo 146:9) Masigurado dagiti agsolsolo a nagannak a sisasagana ti Dios a tumulong kadakuada.

Tunggal anak ket maikari a mapadakkel iti naayat ken natalged nga aglawlaw tapno tumanor a naimbag iti pisikal, emosional, ken naespirituan. Rebbengen ken pribilehio ti tunggal ama ken ina nga usaren ida ti Dios a mangsanay iti anak.

Natakuatan ti adu nga agsolsolo a nagannak a kasapulan ti napasnek a kararag, kanayon a panangyaplikar kadagiti prinsipio ti Biblia, ken ti naan-anay a panagtalek ken Jehova tapno agballigida. Maitunos daytoy iti pammagbaga a masarakan iti Salmo 55:22: “Ipalladawmo ti dadagsenmo ken Jehova a mismo, ket isu saranayennakanto.”

Sagpaminsan, dagiti lolo ken lola, papanglakayen, ken aduanen iti kapadasan a nagannak iti kongregasion Kristiano ket mabalin a makatulong iti pamilia nga addaan iti agsolsolo a nagannak a mangtaming kadagiti narikut a kasasaad. Agpayso a dakkel ti maitulong dagiti miembro ti pamilia ken kapammatian kadagiti panagregget dagiti agsolsolo a nagannak, ngem ti kangrunaan a rebbengen a mangsanay iti anak ket inted ti Dios kadagiti nagannak. *

 Makaparagsak ta adu nga agsolsolo a nagannak ti nagballigi a nangsaranget kadagiti naisangsangayan a karit iti kasasaadda isu a nakapadakkelda kadagiti responsable, nasingpet, ken managbuteng iti Dios nga annak. Kinasarita ti Agriingkayo! ti adu kadakuada. Adtoy ti sumagmamano kadagiti pagpapadaan dagita a nagannak.

• Nasayaat a panangaywan iti pagtaengan. Ikagumaan dagiti naballigi nga agsolsolo a nagannak ti agbalin nga organisado ken nagagetda a mangurnos kadagiti eskediul. Napateg ti umiso a panagplano ken urnos. Kuna ti Biblia: “Dagiti gakat daydiay nasaet sigurado a mangipaay iti pagsayaatan.”​—Proverbio 21:5.

• Pannakaikumit. Dagiti naballigi nga agsolsolo a nagannak pagbalinenda ti biag ti pamiliada a maysa kadagiti ipangpangrunada. Iyun-unada ti kasapulan dagiti annakda ngem iti kasapulanda.​—1 Timoteo 5:8.

• Natimbeng a panangtaming iti bambanag. Dagiti naballigi nga agsolsolo a nagannak saanda a laglag-anen wenno padakkelen dagiti parikut no di ket mangbirokda kadagiti solusion. Awatenda dagiti pakarigatan ket ikagumaanda a daeran dagitoy a di ay-ayen ti bagida wenno agsakit ti nakemda.

• Nasayaat a komunikasion. Iparparegta dagiti naballigi nga agsolsolo a nagannak ti komunikasion. Iparparegtada ti nalawag ken masansan a panangyebkas kadagiti kapanunotan ken riknada iti pamilia. Kuna ti maysa nga agsolsolo nga ama maipapan kadagiti annakna: “Makisaritaak kadakuada iti amin a gundaway. ‘Nasinged ti panagkakaduami’ no agisagsaganakami iti pangrabii. Iti dayta a tiempo nga agipudnoda kaniak.”

• Panangaywan iti bagida a mismo. Nupay adu ti agkalikagum iti panawenda, mabigbig dagiti naballigi nga agsolsolo a nagannak a nasken nga aywananda ti naespirituan, emosional, ken pisikal a kasapulanda. Ilawlawag ni Ethel a maysa a diborsiada nga agsolsolo nga ina ti dua a babbalasang: “Mangilasinak iti tiempo a para iti bagik. Kas pagarigan, no ti maysa a gayyem ket mangisuro iti musika kadagiti annakko, adda maysa nga oras a para iti bagik. Agtugawak ket iddepek ti TV.”

• Positibo a kababalin. Positibo ti panangmatmat dagiti naballigi nga agsolsolo a nagannak iti panangpadakkelda iti annak ken iti biag. Nasayaat ti panangmatmatda kadagiti narigat a kasasaad. Kuna ti maysa nga agsolsolo nga ina: “Mabigbigko a saan a bin-ig a pakarigatan ken pakaupayan ti mapasaran ti agsolsolo nga ina.”

 Pakasaritaan Dagiti Nagballigi

Epektibo aya dagitoy a prinsipio? Wen, kas makita kadagiti adu a pakasaritaan dagiti nagballigi nga agsolsolo a nagannak. Ni Gloria, a taga England ket maysa a diborsiada, agsolsolo, ken mangmangged nga ina a nadakamat iti umuna nga artikulo. Pinadakkelna ti dua a babbaro ken maysa a balasangna. Dagiti tallo ket nagbalinda nga amin-tiempo a Kristiano a ministro, a mangipampamaysa iti biagda iti panangyadal iti Biblia. Idi napagsaludsodan no kasano a nagballigi, inlawlawag ni Gloria: “Ti panangitultuloy iti regular, makaallukoy a panagadal iti Biblia ti umuna a karit. Kayatko a naragsak dagiti annakko, natalna ti panunotda, kontento, ken masalaknibanda kadagiti pakaisagmakan. Nakasarakak idi iti pangrabii a trabaho. Kayatko a kanayon a kaduak dagiti annakko no mabalin. Sakbay a mapanak agtrabaho, agkararagkami ket paturogek ida. Ni ikitko ti nagbantay iti balay bayat a nanggedak.”

Kasano a natulongan ni Gloria dagiti annakna a mangikeddeng kadagiti umiso a maipangpangruna? Kunana: “Talaga nga iyun-unak dagiti naespirituan a bambanag. Bassit ti makukuartami, ket prangkaak unay kadagiti annakko maipapan iti daytoy. Aniaman a kiddawek nga aramidenda, aramidek met, ket mannakitunosda amin.” No lagipenna no kasano a nataginayonna ti kinasinged ti pamiliana, kuna ni Gloria: “Ti sekreto ket panagtitinnulong a mangaramid kadagiti bambanag. Awan ti agbukbukod iti kuartona. Nagtitinnulongkami nga agluto, agdalus ken agarkos. Pinagbalinmi a balanse dagiti aktibidadmi. Kanayon a siniertok nga aglinglingaykami met.”

Ni Carolyn a maysa nga agsolsolo nga ina ti agtutubo a lalaki nga agnagan iti Joseph, ket maragsakan iti idadakkel ti anakna. Ania ti sekretona? “Agkaduakami nga agbasa iti Biblia sakbay a maturogkami,” kunana, “ket kalpasanna, saludsodak maipapan iti naadalna. Maysa pay, pagsaritaanmi dagiti napili a parapo kadagiti publikasion a naibasar iti Biblia ket iyaplikarmi dagita. Daytoy ti nakatulong ken Joseph no adda dagiti parikutna, kas iti panangasing idiay eskuelaan.” Aminen ni Carolyn a narigat ti biagna, ngem mariknana a saan nga agmaymaysa. Kunana: “Daytat’ kanayon a panangikagumaan, ngem mariknak a talaga a tultulongannak ni Jehova. Adda met aglaplapusanan a pammaregta iti kongregasion Kristiano.”

Ti pakasaritaan dagiti nagballigi a rinibu nga agsolsolo a nagannak, a kas kada Gloria ken Carolyn, ti mangpaneknek a mabalin nga agtalek dagiti nagannak iti kaaldawantayo kadagiti prinsipio ti Biblia a nabayagen a napaneknekan nga epektibo tapno makapadakkelda kadagiti naimbag ken nabileg iti naespirituan nga annak. (Proverbio 22:6) Mabalin met nga agballigika! Adu a karit ti mapasaran dagiti agsolsolo a nagannak iti panangpadakkelda iti anak a mangipaay iti gundaway kadakuada a rumang-ay ken mangiranud. Ti naan-anay a panagtalek iti Dios ken ti panamati nga isut’ mangipaay iti tulong ti kasayaatan a pamay-an iti panangsaranget kadagiti pakarigatan ti panagbalin nga agsolsolo a nagannak.​—Salmo 121:1-3.

[Footnote]

[Dagiti Ladawan iti panid 11]

Ti sangapamiliaan a panagadal iti Biblia ti nakatulong kadagiti tallo nga annak ni Gloria nga agbalin nga amin-tiempo a Kristiano a ministro. Adtoy a kitkitaenda ti surat ken retrato ti inauna nga anak, nga agserserbi itan kas maysa a misionero

[Dagiti Ladawan iti panid 12]

Ni Carolyn ken ti barona a ni Joseph