Manipud Kadagiti Agbasbasa

Kinatalged iti Panggedan Pagyamanan iti serye ti akkub a “Natalgedka Aya iti Pagtrabahuam?” (Pebrero 22, 2002) Iti aldaw sakbay a binasak dagitoy nga artikulo, adda makapadanag a napasamak idiay panggedak. Patiek a ti natanang a panagtignay, kas insingasing ti magasinyo, ti kasayaatan a pammagbaga. Maitutop met ti impormasion maipapan iti panagtrabaho iti bigbigat ken rabii unayen. Idi kalman, pinilitdak a mangawat iti kasta a kita ti trabaho ngem nagkitakitak. Idi nabasak daytoy a magasin, agyamanak ta kasta ti inaramidko!

M. H., Japan

Agimtuod Dagiti Agtutubo Kalkalpasko a binasa ti artikulo nga “Agimtuod Dagiti Agtutubo . . . Kasano Ngay no Mairana a Kaeskuelaak ti Makasabaak?” (Pebrero 22, 2002) Kas maysa nga estudiante iti haiskul ken amin-tiempo nga ebanghelisador, masansan a mariknak ti narikna ni Simon, a nadakamat iti artikulo. Namnamaek met idi a saan koma a dagiti kaeskuelaak ti mairana a makasabaak iti panagbalaybalaymi. Daytoy nagsayaat nga artikulo ket maysa a palagip manipud ken ni Jehova. Agyamanak kenkuana gapu iti dayta.

S. S., Estados Unidos

Sangapulo ket uppat ti tawenko ket bumdengak a makakita kadagiti kaeskuelaak iti teritoria a pangaskasabaak. Naliwliwaak a nakaammo a tultulongannak ni Jehova no paguniek dagiti timbre kadagiti ridaw. Pinabilegnak daytoy nga artikulo.

M. L., Italia

Chewing Gum Pagyamanan iti artikuloyo a “Chewing Gum​—Moderno Ngem Kadaanan.” (Pebrero 22, 2002) Magustuak ti chewing gum, ngem dandani kada agngalngalak iti dayta, diak mapupuotan a maalimonko. Pinakdaarannak daytoy nga artikulo a diak alimonen ti gum. Surotekto ti balakadyo!

K. B., Thailand

Dagiti Masai Pagyamanan unay iti artikulo a “Dagiti Masai​—Nagpaiduma ken Makapainteres a Tattao.” (Pebrero 22, 2002) Il-iliwek ti agpasiar idiay Kenya nanipud pay idi ubingak, ket kasta pay laeng ti tartarigagayak. Uray no adun ti nasirarakak maipapan kadagiti kostumbre ken tradision dagiti Masai, diak man la impagarup nga adda gayam Saksi ni Jehova kadakuada. Maysaak itan nga amin-tiempo nga ebanghelisador, ket sapay koma ta addanto aldaw a matabunuak ti maysa a kombension idiay Kenya. Pangngaasiyo ta itultuloyyo ti agipablaak kadagiti impormasion maipapan iti Africa.

Y. H., Japan

Dolphin Sangapulo ket uppat ti tawenko, ket kayatko ti agyaman unay iti artikulo a “Panangbirok Kadagiti Dolphin Ditoy New Zealand.” (Enero 8, 2002) Natukayak unay iti daytoy nga artikulo. Nagsayaat ti impormasion ken ipakpakitana ti nakaskasdaaw a pannakabalin ni Jehova a nangparsua kadagita a makapaamanga ken nalaing a parsua. Yantangay dagiti dolphin ti paboritok nga animal, segseggaak ti tiempo inton ad-adu ti maammuak maipapan kadakuada idiay baro a lubong ti Dios.

A. C., Australia

Sangapulo ket lima ti tawenko ket talaga a kaay-ayok dagiti animal. Interesadoak a nangnangruna kadagiti dolphin, a nakangayngayed ti panaglangoyda. Kalpasan a nabasak daytoy nga artikulo, nagyamanak ken ni Jehova a Dios. Kayatko nga aywanan ti nakaparsuaan ken dagiti animal a pinarsuana.

A. N., Japan

Subalit Dagiti Editor Komendarankayo iti panangsubalityo kadagiti surat a pasaray agparang iti “Manipud Kadagiti Agbasbasa.” Agdinamag a di makaay-ayo, makapasair, ken nasagibar ti panangsungbat ti editor ti periodiko iti lugarmi kadagiti agsurat, uray no adda kamali kadagiti maipablaak iti dayta. Nagsayaat a basaen ti sungbat dagiti editor ti Agriingkayo! a mangyanninaw iti balanse a panangipannakkelda iti magasin ken panangikonsiderarda iti agbasbasa.

K. W., Estados Unidos