Asino ti Mangyeg iti Manayon a Kappia?

APAY a saan a sinungbatan ti Dios ti karkararag dagiti panguluen ti nadumaduma a relihion iti lubong? Adda makaawis a sungbat ti Biblia. Saan a gapu ta saan nga interesado ti Dios iti kappia​—kaykayat pay nga amang ti Dios nga adda kappia ngem kadagiti klero a mangikarkararag iti kasta. Kinapudnona, addan masnup nga urnos ti Dios a mangyeg iti kappia. Nagtignayen a mangaramid iti kasta a kalat. Nabataden nga impakaammona dagiti panggepna iti sangatauan. Ngem, nakalkaldaang ta kaaduanna, di ikankano dagiti relihion iti lubong ti imbaga ti Dios.

Nakabaybayagen nga inkari ti Dios ti maysa a “bin-i,” maysa nga agturay, nga agtultuloy nga inladawan ti Biblia ken nangipaay iti ad-adu nga impormasion no asino daytoy nga agturay. (Genesis 3:15; 22:18; 49:10) Ni mammadto nga Isaias a nagdinamag gapu kadagiti naisangsangayan a padtona maipapan iti Mesias, insuratna a daytoy naipakpakauna a Panguluen ket agbalin a “Prinsipe ti Kappia” a mangituray iti daga ken iti sidong ti turayna, ‘awanto ti ngudo ti kappia.’ (Isaias 9:6, 7) Kas Agturay idiay langit, bumallaetto tapno dadaelenna ti kinadakes ket pagbalinenna ti daga a paraiso, a sadiay awanton ti kinaawan hustisia, sakit, kinapanglaw, wenno ipapatay. Agballiginto ti kappia ken ti biag nga agnanayon. (Salmo 72:3, 7, 16; Isaias 33:24; 35:5, 6; Daniel 2:44; Apocalipsis 21:4) Kaanonto a mapasamak daytoy?

Asidegen ti Sangalubongan a Kappia

Imbaga ni Jesus kadagiti adalanna a ti panungpalan daytoy dakes a sistema ti bambanag ken ti panangrugi ti baro a natauan a kagimongan ket sumaruno kalpasan ti adu a nakaskasdaaw ken makapakigtot a pasamak iti lubong, a mapasamak iti maymaysa a panawen. (Mateo 24:3, 7-13) Adu kadagitoy a pasamak​—dagiti gubat, kinakirang ti taraon, ginggined, no madakamat ti sumagmamano laeng​—ket napasamaken iti nadumaduma a panawen. Ngem saan pay a pulos a naggigiddan a napasamak a nangparigat iti sangatauan ken iti intero a lubong a kas iti panawentayo. Ket nakarkaro pay dagiti epekto dagita a kalamidad ngem idi agsipud ta ad-adu itan ti populasion ti daga.

Ti sabali pay nga impadto ti Biblia ket ti madama a panangdadael ti sangatauan iti aglawlaw.  (Apocalipsis 11:18) Maysa pay, sakbay ti naipadto a panungpalan, adda maar-aramid a sangalubongan a trabaho a panangpakdaar, nga isu ti pannakaikasaba ti “naimbag a damag ti pagarian.” Ar-aramiden ita dagiti Saksi ni Jehova dayta a trabaho iti intero a lubong.​—Mateo 24:14.

Ti kaitungpalan dagidiay a padto ket naimbag a damag iti matalek a sangatauan. Asidegen ti naipadto a baro a lubong nga addaan iti naan-anay a kappia! Ipanamnama dayta ti naan-anay ken maudi a pannakapukaw ti gura ken terorismo. Ilawlawag ti Biblia: “Saandanto a mangaramid iti aniaman a panangdangran wenno mangpataud iti aniaman a panangdadael iti intero a nasantuan a bantayko; agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.”​—Isaias 11:9.

Dagiti Kararag a Denggen ti Dios

Ti panagkararag iti Dios ket saan nga awan mamaayna wenno seremonia nga awan serbina. Iti Biblia, maawagan ni Jehova a “Managdengngeg iti kararag.” (Salmo 65:2) Isu nga iti aniaman a kanito, dengdenggenna ti nagadu a kararag dagiti napasnek a tattao ditoy daga. Ngem adda aya dagiti maikalikagum nga aramiden tapno denggenna dagiti kararag? Kuna ti Biblia a dagiti nasingpet panagpuspusona a tattao a mangammo kadagiti kinapudno ti Biblia maipapan iti Dios masapul nga ipangagda dagitoy, ken agbalinda a “pudno a managdaydayaw,” nga agdayaw kenkuana “buyogen ti espiritu ken kinapudno.” (Juan 4:23) Saan a mapatgan ti kararag dagidiay di mangraraem kadagiti pagayatanna: “Daydiay mangyadayo ti lapayagna iti panagdengngeg iti linteg​—uray ti kararagna nakarimrimon.”​—Proverbio 28:9.

Nakalkaldaang ta, adu a panguluen ti relihion ita ti di pay mangisuro wenno mangikararag iti panggep ti Dios a mangyeg iti kappia. Imbes ketdi, ikarkararagda a risuten dagiti gobierno ti tao dagita a parikut, idinto ta sibabatad a kunaen ti Sao ti Dios a “saan a kukua ti tao a magmagna uray ti panangiturong iti addangna.”​—Jeremias 10:23.

Naipadto nga “iti kamaudianan a paset dagiti aldaw,” iti panawentayo, agturongto dagiti managayat iti kappia iti simboliko a ‘bantay iti balay ni Jehova’​—kayatna a sawen, ti pudno a panagdayaw. Dagita a tattao ket mangaramid kadagiti dakkel a panagbalbaliw iti panagbiagda: “Pitpitendanto dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng. Ti nasion saanto a mangitag-ay iti kampilan maibusor iti nasion, saandanto met a sursuruenen ti pannakigubat.”​—Isaias 2:2-4.

Adda aya aniaman a grupo ita dagiti agdaydayaw nga agbibiag a maitunos kadagita a sasao? Wenno basta agsasarita laeng aya ti amin a relihion maipapan iti kappia bayat nga itantandudoda ti gubat? Inton sumaruno a masarakam dagiti Saksi ni Jehova, awisendaka a makisarita kadakuada maipapan iti kappia tapno maammuam no ania a relihion ti mangisursuro kadagiti tattao iti pannakikappia iti amin a tattao.