Mapukpukawen Aya ti Namnama a Maipaay iti Kappia?

“Marikriknami nga agbibiagtayo ita . . . iti tengnga ti awan kapadana a makadidigra a bagyo.”​—Periodiko a “La Repubblica,” ti Roma, Italia.

KALPASAN ti pannakaraut ti New York City ken Washington, D.C., ad-adu a tattao ita ngem idi ti mangpampanunot maipapan iti masakbayan ti sangatauan. Dagiti ladawan a pakakitaan ti pannakarbek ti maur-uram a Twin Towers​—agraman dagidiay pakakitaan ti panaglagaw dagiti nakalasat​—ket namin-adun a naibrodkas iti telebision. Dagitoy a ladawan ti nangpadanag kadagiti tattao iti intero a lubong. Ipaamiris dayta a panagdanag nga iti sumagmamano a wagas, adda nakapatpateg a nagbalbaliwan ti lubong. Agpayso aya a kasta?

Bimtak ti gubat kalpasan unay ti Setiembre 11, 2001. Di nagbayag, nagkakaduan dagiti dati nga agbibinnusor a nasion gapu iti panangikagumaanda a mangparmek iti terorismo. No amirisen ti amin, adu ti natay ken nadadael. Ngem para kadagiti tattao iti intero a lubong, nalabit ti nakarkaro a nagbalbaliw isut’ pannakapukaw ti kinatalged, ken ti kumarkaro a pannakarikna nga awan ti asinoman a pudno a natalged iti sadinoman a lugar.

Mataktakuatan dagiti agtuturay iti lubong a maipaspasangoda kadagiti nagkaro a parikut. Pampanunoten dagiti periodista ken komentarista no kasano a malapdan ti napartak a panagsaknap ti terorismo, ta ti kinapanglaw ken kinapanatiko ti kasla mangrubrubrob iti dayta. Kasla awan ti makaammo no kasano a marisut dagita a pakarigatan. Nakasaksaknap ti kinaawan ti kinahustisia iti lubong gapu ta adda ti amin a mabalin a pakaigapuan ti nariribuk a kasasaad. Pampanunoten ti amin a kita ti tattao no addanto ti tiempo a mapukaw ti amin a pakarigatan ti kagimongan. Agpatingganto pay aya ti gubat agraman ti amin a panagsagaba, ipapatay, ken ti iyegna a panangdadael?

Minilion a tattao ti agturturong kadagiti organisado a relihion a kastoy ti iyim-imtuodda. Ngem agduadua ti dadduma. Sika ngay? Pagarupem aya a masungbatan dagiti panguluen ti relihion dagita a saludsod? Ken talaga aya a makatulongda a mangipaay iti kappia babaen kadagiti kararagda?