Naisangsangayan a Panagkinnita Manen Kalpasan ti 30 a Tawen

IDI 1967 naiparna a nagkadua ti dua nga agtutubo a lallaki. Natudinganda nga agkakuarto idiay Michigan Technical University ti Estados Unidos. Taga Lima, Ohio ni Dennis Sheets, nga agtawen idi iti 18 ken umuna a tawenna nga agad-adal iti forestry, wenno panagbakir. Agtawen idi iti 20 ni Mark Ruge, a taga Buffalo, New York ken maikatlo a tawenna iti panagadalna iti kinainheniero sibil.

Apagbiit laeng idi ti panaggayyemda. Agpadada a di nangituloy iti panagadalda iti unibersidad; simmardengda a dua tapno ituloyda ti kalat ti tunggal maysa kadakuada. Limmabas ti nasurok a tallopulo a tawen. Pagammuan ta maysa nga aldaw idiay Dominican Republic, nagkinnitada manen. Naiparna daytoy nakaskasdaaw a panagkinnitada manen. Ngem adda makagapu. Ania dayta? Tapno maammuantayo, usigentayo ti nadumaduma a napasamak iti biagda.

Napan Nakigubat ni Dennis

Nagawid ni Dennis kalpasan ti umuna a tawenna iti kolehio. Kalpasanna idi Disiembre 1967, naayaban nga agserbi iti Buyot ti E.U., ket idi Hunio 1968, naibaon idiay Vietnam. Nakitana sadiay dagiti nakaap-aprang nga epekto ti gubat. Idi naturposnan ti trabahona iti militar idi 1969, nagawid idiay Estados Unidos, ket idi agangay, nakastrek nga agtrabaho iti maysa a dakkel a kompania idiay Ohio, ngem di napnek.

“Ti arapaapko idi ubingak pay ket umakarak idiay Alaska ken agbangkagak,” kinuna ni Dennis. Isu nga idi 1971, napan a kaduana ti gayyemna idi adda pay laeng iti haiskul tapno tungpalenda dayta nga arapaap. Ngem imbes nga agbangkag, adu ken nadumaduma ti nagtrabahuanna a bassit laeng ti pasueldoda. Iti sumagmamano a tiempo ket nagnaed met iti tolda ken nagtrabaho a para siput kadagiti uram iti kabakiran. Nagpaatiddog iti barbas ken buok ket rinugianna ti agsigarilio iti marihuana.

Idi 1972, pimmanaw ni Dennis idiay Anchorage tapno makipaset iti Mardi Gras idiay New Orleans, Louisiana. Kalpasanna, nagaramid iti bassit a balayna iti kabakiran ti Arkansas. Sadiay a nagtrabaho iti panagipatakder iti balbalay a kayo ken semento. Idi Hunio 1973, pinasiar ni Dennis ti intero a pagilian babaen laeng ti pannakilugan tapno makitana no masarakanna ti panggep iti biag.

Nakipaset ni Mark iti Organisasion a Kontra Gubat

Nagtalinaed ni Mark iti unibersidad iti sumagmamano a semestre kalpasan a pimmanaw ni Dennis, ngem inkeddengna idi agangay a dina kayat ti makipaset iti sistema a mangsupsuportar iti gubat. Isu a nagawid idiay Buffalo, ket apagbiit a nagtrabaho sadiay a kapatas ti maysa a planta ti asero. Gapu ta kaskasdi a maupay iti kampania ti gubat, immikkat iti trabahona, gimmatang iti motorsiklo, sa nagdaliasat iti intero a pagilian agingga idiay San Francisco, California. Nupay dida ammo idi, naggiddan ti kaadda da Dennis ken Mark idiay San Francisco.

Kas ken Dennis, nagpaatiddog met ni Mark iti barbas ken buok ken rinugianna ti nagusar iti marihuana. Ngem aktibo unay ni Mark iti organisasion a kontra gubat isu a nakipaset kadagiti  protesta ken martsa. Isut’ birbiroken ti FBI gapu iti dina panagsoldado, isu a nagusar kadagiti alias iti sumagmamano a tawen tapno dida malasin. Sinurotna ti estilo ti panagbiag dagiti hippie idiay San Francisco. Idi 1970, dua a Saksi ni Jehova ti simmarungkar kenkuana sadiay.

Inlawlawag ni Mark: “Impagarupda siguro nga interesadoak, isu a nagsublida. Awanak idi ngem imbatida ti maysa a berde a Biblia ken tallo a libro.” Ngem ni Mark ket aktibo unay nga aktibista iti politika ken iti ragragsak isu nga awan tiempona a mangbasa kadagitoy. Kasta met nga isut’ birbiroken ti FBI. Isu a babaen ti sabali manen nga alias, immakar idiay Washington, D.C. Nakikadua kenkuana sadiay ti nobiana a ni Kathi Yaniskivis, a naam-ammona idi iti unibersidad.

Kamaudiananna, isut’ nasarakan ti FBI idi 1971. Dua nga ahente ti FBI ti nangkuyog kenkuana iti eroplano manipud Washington, D.C. a mapan idiay New York ket siniguradoda a makadanon idiay Toronto, Canada. Nabatad nga isut’ di imbilang ti FBI a pangta iti urnos ti kagimongan; kayatda laeng a papanawen iti pagilian. Nagkasarda ken Kathi iti simmaganad a tawen, ket immakarda idiay Gabriola Island, British Columbia, Canada. Kayatda ti sumina iti kagimongan, ngem patienda nga adda pay napatpateg a panggep ti biag.

Nagbalinda a Saksi

No malagipmo, agpaspasiar ni Dennis iti intero a pagilian babaen ti pannakiluganna laeng tapno mabirokanna ti panggep iti biag. Nakadanon idiay Montana gapu iti panagpasiarna. Iti ruar ti ili ti Chinook, nakasarak iti trabaho a panangtulong iti maysa a mannalon nga agani iti trigo. Saksi ni Jehova ti asawa ken balasang ti mannalon. Inikkanda ni Dennis iti basaenna a magasin nga Agriingkayo! Di nagbayag, nakombinsir a pudno ti relihion dagiti Saksi.

Nangitugot ni Dennis iti Biblia idi pimmanaw iti talon ken immakar idiay Kalispell, Montana. Sadiay ti damo nga itatabunona iti gimong dagiti Saksi ni Jehova. Iti dayta a gimong, kiniddawna a mayadalan iti Biblia. Di nagbayag kalpasanna, nagpapukis ken nagibarbasen. Idi Enero 1974 ti damo a panangasabana, ket nabautisaran iti maysa a pagpainuman kadagiti taraken idiay Polson, Montana, idi Marso 3, 1974.

Kabayatanna, agnanaed da Mark ken Kathi idiay Gabriola Island. Inkeddengda a sukimaten ti Biblia yantangay addan tiempoda. Rinugianda a binasa ti King James Version ngem natakuatanda a narigat a maawatan ti kadaanan nga Ingles. Nalagip ni Mark nga adda pay la ti Biblia ken dagiti libro nga inted idi dagiti Saksi kenkuana. Binasa da Mark ken Kathi ti Biblia agraman dagiti libro a Ti Kinapudno a Mangiturong iti Biag nga Awan Inggana ken Pudno aya a ti Biblia ket Sao ti Dios?, nasdaawda unay kadagiti naammuanda.

Ilawlawag ni Mark: “Naallukoyak a nangnangruna iti dinakamat ti libro a Kinapudno nga adda grupo dagiti Kristiano a saan a makigubat uray aniaman ti mapasamak. Patiek a dagita ti mangal-alagad iti pudno a Kristianidad.” Di nagbayag kalpasanna, nagawid da Mark ken Kathi idiay Houghton, Michigan, tapno sarungkaranda ti pamilia ni Kathi​—nupay mabalin a maarestoda. Sadiay a timmabunoda iti gimong dagiti Saksi, nupay aglanglangada pay laeng a hippie. Immannugotda a mayadalanda iti Biblia isu a nagadalda bayat ti makabulan a kaaddada idiay Michigan.

Idi nagsublida idiay Gabriola Island, adda Saksi a nasabatda iti maysa nga eskinita idiay Nanaimo, British Columbia, ket inlawlawagda a kayatda ti mayadalan iti Biblia. Iti dayta met la nga aldaw simmangpet ti maysa a lugan a napno kadagiti Saksi a bimmalasiw babaen ti balsa tapno makipagkita kadakuada, ket nairugi ti panagadal iti Biblia. Tallo a bulan kalpasanna, nangrugin a nangasaba da Mark ken Kathi. Tallo a bulan kalpasan dayta, idi Marso 10, 1974, nagpabautisarda a dua. Makalawas dayta kalpasan a nabautisaran ni Dennis!

Simrek ni Dennis iti Amin-Tiempo a Ministerio

Ni Dennis ket nagbalin a payunir, wenno amin-tiempo a ministro, idi Setiembre 1974. Kunana: “Naragsakak idi nga agpaypayunir, ngem kayatko a palawaen ti ministeriok, isu nga idi Hulio 1975, nagaplayak nga agserbi idiay sangalubongan a hedkuarter dagiti Saksi ni Jehova idiay Brooklyn, New York. Naawisak nga agserbi sadiay idi Disiembre iti dayta a tawen.”

Ti immuna a trabaho a naited ken Dennis ket tumulong a mangtarimaan iti dati a Towers Hotel tapno mapagbalin a pagtaengan dagiti kameng ti hedkuarter. Nagtrabaho iti sumagmamano a tawen sadiay. Isu ti mangay-aywan iti bunggoy nga agikabil kadagiti baldosa. Kalpasanna, gapu ta kayatna  ti mangasawa, immakar idiay California. Idi 1984, idi agserserbi a panglakayen iti kongregasion ti Cathedral City, inkasarna ti maysa a payunir nga agnagan iti Kathy Enz.

Inkeddeng da Dennis ken Kathy a pagbalinenda a simple ti panagbiagda tapno maipangpangrunada dagiti interes ti Pagarian ti Dios. Isu a masansan a di inawat ni Dennis dagiti gundaway a makabirok iti adu a kuarta iti rumangrang-ay idin a negosio ti konstruksion idiay makin-abagatan a California. Idi 1988, nagaplayda ken ni Kathy a tumulong iti internasional a trabaho a panagbangon dagiti Saksi ni Jehova. Idi Disiembre dayta a tawen, naawatda ti pakaidestinuanda a pagtrabahuan iti proyekto a panagibangon iti sanga idiay Buenos Aires, Argentina.

Idi 1989, naawis da Dennis ken Kathy nga agbalin a permanente a paset ti trabaho a panagibangon dagiti Saksi ni Jehova. Iti daytoy naisangsangayan a kita ti amin-tiempo a ministerio, naminduan a nagserbida idiay Suriname ken Colombia. Nagserbida met a nagibangon iti sanga idiay Ecuador ken Mexico, agraman iti kakasta nga umasping a proyekto idiay Dominican Republic.

Simrek ni Mark iti Amin-Tiempo a Ministerio

Idi 1976, ni Mark ket inikkan ti gobierno ti E.U. iti amnestia, agraman ti rinibu pay nga agtutubo nga Americano a nagkamang idiay Canada tapno malisianda ti pannakaayabda nga agsoldado. Kayatda met nga agassawa a pagbalinen a simple ti panagbiagda tapno ad-adu ti tiempoda iti ministerio. Isu a nagtrabaho ni Mark iti paset-tiempo kas surbeyor, ket in-inut a binayadanda ken ni Kathi dagiti naurnong nga utangda sakbay a nabautisaranda

Idi 1978, idi agpalplano dagiti Saksi ni Jehova idiay Canada a mangibangon iti baro a pasdek ti sanga iti asideg ti Toronto, Ontario, mabalinen nga agboluntario da Mark ken Kathi. Agsipud ta adda kapadasan ni Mark kas surbeyor, naawisda a makipaset iti panagibangon. Nakapagtrabahoda iti proyekto idiay Georgetown agingga a naturpos daytoy idi Hunio 1981. Kalpasanna, nagsublida idiay British Columbia ket iti simmaganad nga uppat a tawen, timmulongda a nagibangon iti Assembly Hall dagiti Saksi ni Jehova sadiay. Idi naturposen, naawisda manen nga agtrabaho a mangpalawa iti sanga idiay Canada.

Idi 1986, kalpasan ti sumagmamano a bulan idiay Georgetown, naawis da Mark ken Kathi nga agbalin a regular a kameng ti sanga idiay Canada. Agserserbida a kameng ti sanga sipud idin ket naaddaanda metten iti adu a gundaway a makipaset iti trabaho a panagibangon iti adu a pagilian. Gapu iti kapadasan ni Mark iti panagsurbey, agserserbin a surbeyor para iti panagibangon kadagiti sanga ken Assembly Hall dagiti Saksi ni Jehova idiay Abagatan ken Sentral nga America ken kadagiti isla ti Caribe.

Kadagiti naglabas a tawen, nakapagserbin da Mark ken Kathi idiay Venezuela, Nicaragua, Haiti, Guyana, Barbados, Bahamas, Dominica, Estados Unidos (Florida), ken iti Dominican Republic. Daytoy naisangsangayan a kita ti amin-tiempo a ministerio ti nagkitaan manen da Mark ken Dennis.

Panagkinnitada Manen Idiay Dominican Republic

Saan nga ammo da Mark ken Dennis nga agtartrabahoda gayam iti isu met la a proyekto idiay Dominican Republic. Maysa nga aldaw, naiparna a nagkinnitada kadagiti pasilidad ti sanga dagiti Saksi ni Jehova idiay Santo Domingo. Kas iti mailadawanyo, naragsakanda nga agkinnita manen. Ngamin, agpadada a limmakayen iti 33 a tawen ket adun ti maestoriada maipapan iti biagda. Buyogen iti kasta unay a siddaaw a naginnestoriada  iti kaaduan ti nabasayon iti ngato. Ngem ti nakaskasdaaw unay kadakuada​—agraman kadagiti amin a nangestoriaanda iti kapadasanda​—ket ti nagadu a nagaspingan ti panagbiagda.

Agpadada a nagbiag kas hippie ken immakarda kadagiti addayo a lugar tapno mapanawan ti materialistiko ken moderno a panagbiag agraman ti amin a pakasikoranna. Inkasar ni Dennis ti babai nga agnagan iti Kathy, idinto ta inkasar met ni Mark ti babai nga agnagan iti Kathi. Agpadada nga immawat iti panagadal iti Biblia iti damo nga itatabunoda iti gimong dagiti Saksi ni Jehova. Agpadada a nabautisaran idi Marso 1974. Agpadada a nagbalin a kameng ti pamilia iti sanga dagiti Saksi ni Jehova​—ni Dennis idiay Estados Unidos ken ni Mark idiay Canada. Agpadada a mangikagkagumaan nga agbiag iti simple tapno maragpatda dagiti naespirituan a kalat. (Mateo 6:22) Agpadada a nakipaset iti internasional a panagibangon ken naidestinoda iti adu a pagilian. Agingga iti naiparna a panagkinnitada manen idiay Dominican Republic, awan kadakuada a dua ti nakakita manen kadagiti dati a gagayyemda a nangawat iti kinapudno iti Biblia.

Patien ngata da Dennis ken Mark a dagitoy a panagrana ket maigapu iti gasat? Saan. Ammoda a kas iti kunaen ti Biblia, “ti di mapakpakadaan a pasamak mapagteng kadakuada amin”​—ket no dadduma, mapasamak dayta kadagiti nakaay-ayat unay a pamay-an. (Eclesiastes 9:11) Nupay kasta, mabigbigda met nga adda pay makagapu iti panagkinnitada manen: ti panagsapulda a dua iti panggep iti biag ken ti panagayatda ken Jehova a Dios.

Ipaganetget met ti pakasaritaan da Dennis ken Mark ti sumagmamano a banag a pagpapadaan ti amin a nasingpet ti panagpuspusoda a tattao a makaammo iti kinapudno iti Biblia. Kuna ni Dennis: “Ti kapadasanmi ken ni Mark ti mangipakita nga ammo ni Jehova ti kasasaad iti biag dagiti tattao, ket no talaga nga umiso ti kasasaad ti pusoda, iyadanina ida kenkuana.”​—2 Cronicas 16:9; Juan 6:44; Aramid 13:48.

Kinuna pay ni Mark: “Ti kapadasanmi ti nakaamirisanmi a no makitunos ti maysa a tao kadagiti pagalagadan ni Jehova, idedikarna ti biagna kenkuana, ken ipaayna ti bagina, mabalin nga usaren ni Jehova dagiti saguday ken abilidadna a mangitandudo iti pudno a panagdayaw nga agpaay a pakabenepisiaran ti ilina.”​—Efeso 4:8.

Ipakita met ti kapadasanda a bembendisionan ni Jehova a Dios ti naimpusuan a panagserbi ti ilina. Talaga a marikna da Dennis ken Mark a nabendisionanda. Kinuna ni Dennis: “Maysa a pribilehio ti agserbi para kadagiti interes ti Pagarian iti espesial a panagserbi iti amin a tiempo. Gapu iti dayta, matagtagiragsakmi ti makipimpinnaregta bayat nga agtartrabahokami a kadua dagiti Kristiano a kakabsatmi iti intero a lubong.”

Innayon pay ni Mark: “Talaga a bembendisionan ni Jehova dagidiay mangipangpangruna iti Pagarianna. Ibilangko a naisangsangayan a bendision ti makapagserbi kas miembro ti pamilia ti sanga ditoy Canada ken makipaset iti internasional a panagibangon.”

Naisangsangayan aya a panagkinnita manen? Wen, agsipud ta kas iti kinuna ni Mark: “Ti pudno a rason no apay a makaparagsak ti panagkinnitami ket agpadakami a makaam-ammo, agay-ayat, ken agserserbi iti naisangsangayan a Dios a ni Jehova.”

[Ladawan iti panid 21]

Ni Dennis idi 1966

[Ladawan iti panid 21]

Ni Mark idi 1964

[Ladawan iti panid 23]

Ni Dennis idiay South Dakota idi 1974

[Ladawan iti panid 23]

Ni Mark idiay Ontario idi 1971

[Ladawan iti panid 24]

Da Dennis ken Mark, agraman dagiti assawada, kalpasan la unay ti naiparna a panagkinnitada manen idi 2001