Manipud Kadagiti Agbasbasa

Dagiti Ginggined Nabasak ti serye ti akkub a “Dagiti Nakalasat iti Ginggined Agestoriada.” (Marso 22, 2002) Dinakamatyo ti maysa a reperensia a nangibaga a “dagiti ginggined a 7.0 ti kapigsada ken dagiti napigpigsa pay ket ‘saan nga immadu’” iti intero a maika-20 a siglo.” Ngem sigun iti World Almanac ti 1999, kabayatan ti dekada 1990, naisangsangayan ti iyaadu dagiti ginggined.

F. A., Italia

Kastoy ti sungbat ti “Agriingkayo!”: Nupay awan ti dasdasiganna maipapan iti daytoy nga isyu, impatuldo laeng ti artikulomi ti ibagbaga ti dadduma a seismologo maipapan iti pakadagupan ti kasansan dagiti ginggined iti maika-20 a siglo. Ti punto ket naaramid ta uray no patien ti maysa a tao a nagtalinaed a “saan nga immadu” dagiti ginggined, matungtungpal iti panawentayo ti padto ni Jesus a nailanad iti Mateo kapitulo 24. Imbaga laeng ni Jesus a mapasamak dagiti “dadakkel a ginggined.”​—Lucas 21:11.

Pannakaalis Idi nakitak ti artikulo a “Naalisanak” (Marso 22, 2002), nagsangitak ta nalagipko ti pannakaalisko. Dagus a nagkararagak ken Jehova tapno agyamanak iti panangipaayna iti daytoy kasapulak unay nga impormasion ken ti panangliwliwana. Kanayon a maliwliwakami iti kinapudno nga inton baro a lubong ti Dios, saanen a mapasamak manen daytoy iti siasinoman.

J. S., Estados Unidos

Naalisanak kabayatan ti maika-30 a lawas ti panagsikogko. Daydi ti kasaeman a kapadasak iti biag. Anian a nagdakkel ti naitulong ken panangliwliwa daytoy nga artikulo, yantangay ilawlawagna ti maysa a suheto a masansan a maibilang a saan a maitutop a pagsasaritaan, ken mangted met iti praktikal a pammagbaga.

K. W., Alemania

Naalisanak met. Nagtignayak a kasla awan a pulos ti napasamak. Ngem saan a maliwliwa ti pusok, ket agsangitak iti tunggal aldaw nga agmaymaysaak. Nalabit saanko a malipatan ti kinasaemna bayat nga adda pay daytoy a sistema. Ngem talaga a nakatulong kaniak daytoy nga artikulo.

I. M., Japan

Husto ti kinunayo a nasapa ti pannakaisinggalut ti ina ken ti anak. Saan a mailadawan ti kinasaemna. Kalpasan ti 19 a tawen, kaskasdi a sangsangitak pay laeng ti naalis nga anakmi.

C. C., Britania

Kanayon a marigatanak idi a makisarita kadagidiay adda iti kastoy a kasasaad. Idi nadamagko a naalisan ti maysa a kakongregasionko, binasak manen ti artikulo ket sinuratak agraman dagiti nagannak ken katuganganna. Inyebkasko ti naimpusuan a pannakipagriknak kadakuada.

D. R., Alemania

Daytoy nga artikulo ti sungbat kadagiti kararagko. Pagyamanan iti pannakaawatyo iti saem ken pannakadidigra a sagsagabaen ti maysa kalpasan a naalisan. Bayat a basbasaek daytoy nga artikulo, nariknak a kalsa inarakup ken liniwliwanak ni Jehova.

C. P., Estados Unidos

Naalisan ni nanangko iti kabsatko a nagbaetanmi koma ken ni adingko. Talaga a nagsaem ti riknana. Kalpasan a nabasak ti kahon a “No Kasano a Makatulong ti Pamilia ken Gagayyem,” dagus a sinuratak ni nanangko.

M. Y., Japan

Mano Dagiti Kontinente? Iti panid 25 iti Pebrero 8, 2002, a ruar, imbagayo a ti Australia ti “kabassitan iti lima a kontinente iti lubong.” Impagarupko idi nga adda pito a kontinente.

L. U., Canada

Kastoy ti sungbat ti “Agriingkayo!”: Talaga nga adda pito a kontinente​—Asia, Africa, Amianan nga America, Abagatan nga America, Antarctica, Europa, ken Australia. Nupay kasta, sigun iti dadduma a mangibilang a maymaysa a kontinente ti Europa ken Asia (Eurasia), ibagada nga adda innem. Saan nga ibilang ti dadduma a kontinente ti Antarctica.