Manipud Kadagiti Agbasbasa

Panagbalin nga Ina Pagyamanan iti serye ti akkub a “Panagbalin nga Ina​—Masapul Aya a Paglainganna ti Amin?” (Abril 8, 2002) Adu ita ti mamati a saan a makumikom dagiti agtagtagibalay nga inna a kas kadagiti agtartrabaho nga inna. Ti artikuloyo ti nakatulong tapno maawatan dagiti agbasbasa nga amin nga inna ket agtartrabaho nga inna!

T. M., Estados Unidos

Ti umuna a nagustuak ket ti retrato ti maysa a superwoman iti panid 2. Kayatko idi a basaen a dagus ti artikulo. Kas ina ti dua a babassit nga annak, makunak nga agpayso a nailawlawag kadagitoy nga artikulo ti inaldaw nga ar-aramiden ti maysa nga ina.

C. L., Alemania

Maysaak a 12 ti tawenna a balasitang ket idi naawatko daytoy a magasin, binasak a dagus dayta. Maawatak itan ti ar-aramiden ni nanangko para kadakami ken ni tatangko. Ad-adda itan nga agyamanak kenkuana ken tulongak kadagiti trabahona!

A. L., Estados Unidos

Dua a tawen ti napalabasen, impasngayko ti anakko a lalaki. Maysaak idi nga amin-tiempo a managebanghelio ken addaan iti paset-tiempo a trabaho. Gapu ta il-iliwek ti dati nga estilo ti panagbiagko, mariknak a diak maikari iti panagbalinko nga ina. Kasapulan a mapatalgedan manen ti riknak, ket dayta ti nariknak idi binasak dagitoy nga artikulo.

S. T., Italia

Ti pammagbagayo nga iwayaak ti agrelaks ti nangyunay-unay iti maysa a banag nga ita laeng a naamirisko. Ar-aramidek idin daytoy sakbay a binasak dagiti artikulo, ngem nakonsiensiaak. Pagyamanan ta tinulongandak a makaawat a diak rumbeng a makonsiensia no la ket ta kanayon a natimbengak.

C. C., Estados Unidos

Marikna ti dadduma nga inna a kurang ti maaw-awatda nga apresasion iti narigat a trabahoda. Dagitoy nga artikulo ti nangted kadakuada iti apresasion a kasapulanda. Kas ina ti uppat nga annak, ammok no kasano karigat a balansien ti panagtagibalay ken panagtrabaho. Ti panangusar ni Jehova ken ni Solomon a mangisurat maipapan kadagiti naggagaget nga inna ti mangliwliwa ken mangparegta kaniak a mangaramid iti amin a kabaelak.

E. S., Alemania

Kas ina ti tallo ti tawenna nga ubing a babai, makonkonsiensiaak gapu ta mabannogak a kanayon. Dagitoy nga artikulo ti nangipaawat kaniak a saan la a sisiak ti makarikna iti kastoy, ket inikkandak kadagiti nagsayaat a singasing no kasano a mapasayaatko ti kasasaadko.

K. J., Estados Unidos

Makita iti akkub daytoy a magasin ti maysa nga ina a mangub-ubba iti bassit nga anakna. Kasla mangmangan ti ubing iti hot dog. Kalkalpasmi ken ni baketko ti nagadal maipapan iti panang-CPR kadagiti maladaga/ubbing. Imbaga ti maestrami a ti pannangan iti hot dog ti kangrunaan a makagapu a maltotan dagiti maladaga ken ubbing. Imbagana a saanmi a palpalubosan a mangan dagiti babassit pay nga ubbing iti hot dog.

G. E., Estados Unidos

Kastoy ti sungbat ti “Agriingkayo!”: Umanamongkami a ti pannangan iti hot dog ti mabalin a makagapu a maltotan dagiti maladaga ken babassit nga ubbing. Kinapudnona, ti ubing iti akkub ti magasinmi ket agnutnutnot iti carrot bayat nga ub-ubbaen ni nanangna.

Pannakikomunikar Dagiti Animal Pagyamanan unay iti artikulo a “Lenguahe Dagiti Naatap​—Dagiti Sekreto iti Pannakikomunikar Dagiti Animal.” (Abril 8, 2002) Nakakatawaak idi nabasak ti karkarna a panangriribuk ti wildebeest, wenno gnu, iti kabusorna. Iti kasumbangirna, nakasangitak iti imbaga ni Joyce Poole maipapan iti napaliiwna a kabaian nga elepante nga “agladladingit” gapu ta natay ti anakna idi naipasngay. Dagita a nagsayaat ken makaay-ayo nga artikulo ti mamagpanunot kadakami ken tulongandakami a mangamiris a daytoy a “saritaan dagiti naatap” ti “pakaidayawan ti namarsua iti dayta a ni Jehova a Dios.” Sapay koma ta itultuloyyo ti agsurat kadagiti kasta nga artikulo!

A. G., Poland