Pannakaiparangarang ti Ayat​—Panangsaranay a Naunday ken Narigat

SAAN a nalaka a masdaaw ti batido nga editor ti Houston Chronicle, a ni Richard Vara, ngem itay napan a tawen, nasdaaw unay. “Ita pay laeng a nakakitaak iti kasta!” kinunana. “Di nakappapati.” Kasta met laeng ti imbaga ti mayor iti Houston, Texas, E.U.A. a ni Lee P. Brown. Kinunana: “Sapay koma ta makita ti amin a taga Houston ti inaramidyo. Masdaawak unay.” Ania aya ti tuktukoyenda? Tuktukoyen ti editor ken ti mayor ti panangsaranay dagiti Saksi ni Jehova idiay Houston. Ania ti nairaman iti daytoy a panagregget? Apay a kasapulan dayta? Ket apay a nakaskasdaaw unay? Tapno maammuantayo, kitaentayo ti napasamak idi damo.

Kakaruan Pay Laeng a Layus

Idi rugrugi ti Hunio 2001, adda nagpigsa a bagyo a napanaganan iti Allison, a nangdadael iti kapatagan ti makin-abagatan a daya ti Texas. Kamaudiananna idi Biernes, Hunio 8, iti las-ud ti 24 nga oras, indissuor ni Allison ti tallo a pie a tudo idiay Houston​—ti maikapat a kadakkelan a siudad iti pagilian. * Di nagbayag, nalayusen dagiti puesto, opisina, ken pinullo a ribu a balbalay. Dagiti haywey iti intero a siudad ket nagbalinen a nadawel a karayan a nangyanud kadagiti naisadsad a lugan ken nagdadakkel a trak. Gapu ta adalem ti danum, di payen makaalaw ti adu a trak dagiti bombero ken dadduma pay a mangalaw a lugan a lumasat koma kadagiti nalayus a kalsada. Gapu iti dayta, naayaban dagiti helikopter ken dagiti nalagda a lugan ti militar a mangalaw kadagiti umili.

Kamaudiananna, idi immariwanas ti aldaw iti Lunes, Hunio 11, bimmatad a nagadu ti pinatay ken dinadael ni Allison. Duapulo ket dua a tattao ti natay, agraman ti dua a Saksi ni Jehova: Da Jeffrey Green, maysa a Kristiano a panglakayen, ken ti ipagna a ni Frieda Willis. * Kanayonanna, agarup 70,000 a balbalay ti nadadael, isu a daytoy a layus ti maysa kadagiti kakaruan pay laeng a natural a didigra a nangdalapus iti maysa a dakkel a siudad. Kinapudnona, gapu ta dandani $5 a bilion a sanikua ti nadadael, ni Allison ti nagbalin a tropikal a bagyo a kaaduan ken kakaruan ti dinadaelna iti pakasaritaan ti E.U.

Nagdadarison Dagiti Boluntario

Napakigtotan dagiti tattao. Kinuna ti maysa a simmaranay: “Nabasa dagiti kamada. Nabasa dagiti alpombrada. Awanen ti retrato dagiti maladagada ken dagiti retratoda idi ubbingda pay laeng.” Napukawan ti adu kadagiti nasurok a 16,000 a Saksi ni Jehova iti Houston. Nadadael ti walo a Kingdom Hall ken ginasut a balbalay dagiti Saksi. Dadduma kadagitoy a balbalay ti nalayus iti sumagmamano a sentimetro a danum; nalipus ti dadduma. Agdagup iti 80 a kongregasion dagiti Saksi ni Jehova ti naapektaran. Nupay kasta, saan a nabaybay-an dagitoy a biktima. Iti las-ud ti sumagmamano nga aldaw, adda nagdadarison. Nupay kasta, saanen a parikut dagitoy a nagdadarison no di ket dagiti boluntario nga immay tapno umarayat. Kasano a napasamak dayta?

Sakbay pay nga immes-es ti danum, dagus a nagtignay dagiti Kristiano a panglakayen kadagiti kongregasion dagiti Saksi ni Jehova idiay Houston. “Tineleponuan ken sinarungkaranmi dagiti kakabsat,” kinuna ti maysa a panglakayen. “Kalpasanna, kinalkularmi ti nadadael, ket idi Lunes, Hunio 11, naurnosmin ti kompleto a report a nakailistaan dagiti biktima, ti bilang dagiti nadadael a balbalay, ken ti kinakaro dagiti nadadael. Naipatulod daytoy iti hedkuarter dagiti Saksi ni Jehova idiay Brooklyn, New York.” Sumagmamano nga aldaw kalpasanna, ti sanga nga opisina dagiti Saksi ni Jehova idiay E.U. ket nangdutok iti maysa a komite ti saranay a buklen ti walo a Kristiano a panglakayen a taga Houston sada nangted kadagiti pondo a pangsaranay. Ania ti naituding nga aramiden ti komite? Tumulongda  a mangliwliwa kadagiti biktima ken mangtarimaan iti nadadael a balbalay dagiti Saksi​—nasurok a 700 a pagtaengan!

‘Kasanotay a maaramid daytoy nagdakkel a trabaho?’ pinampanunot dagiti miembro ti kabubuangay idi a Jehovah’s Witnesses Houston Relief Committee 2001. Adu nga oras iti rabii ti binusbosda a nagaramid iti damo a plano sada inawis ti nasurok a 160 a kongregasion dagiti Saksi iti Houston tapno tumulong. “Nakaad-adu dagiti timmulong,” kinuna ti tserman ti komite. “Nasurok a 11,000 a Saksi ti nangiboluntario iti oras, panagobra, ken kinabatidoda a dida nagpatangdan.”

Buot Kontra Dagiti Boluntario

Sumagmamano nga aldaw kalpasan ti layus, napan nagtrabaho dagiti boluntario iti balbalay dagiti biktima. Linikkiatda dagiti narusep nga alpombra, nadadael a suelo, diding, naupran nga aparador ken estante, ridaw, ken dadduma pay nga alikamen a narugitan gapu iti kontaminado a danum ti layus. “Saan laeng a ti panangtarimaan iti balbalay dagiti kakabsattayo ti kayatmi nga aramiden,” kinuna ti maysa a boluntario, “no di ket kayatmi met a salakniban ti salun-atda.” Gapu ta nagbiit nga umadu ti makapapatay a buot iti likudan dagiti diding ken iti uneg dagiti aparador ken estante, dagiti balbalay nga umuna ti nasken a madis-impekta a naan-anay.

Tapno masursuro ti sumagmamano a Saksi no kasano ti natalged a panangaramidda iti daytoy, kiniddawda a sanayen ida ti Federal Emergency Management Agency (FEMA), maysa nga ahensia ti gobierno a paglainganna ti mangasikaso kadagiti didigra. Kalpasanna, tunggal Saksi a sinanay ti FEMA ti nangawis iti sangapulo a boluntario  a kumuyog kenkuana a mapan iti maysa a nadadael a balay, ket sadiay a naisuroda no kasano ti umiso a panangdis-impekta iti dayta. Kabigatanna, tunggal maysa kadagiti sangapulo a kabarbaro a nasanay a boluntario ti nangawis met iti sangapulo pay a dadduma a boluntario a kumuyog kenkuana. “Iti sumagmamano nga aldaw,” malagip ti maysa a boluntario, “nagbalinen a sumagmamano a gasut ti bilang dagiti makaammo iti daytoy a trabaho.” Saanen a nagwaras ti umad-adu idi a buot gapu iti umad-adu a boluntario! No aldaw, ti nagtrabaho ket dagiti retirado ken tin-edyer nga awan ti klaseda gapu ta bakasion iti eskuelaan. Iti rabii, dadduma pay a boluntario ti simmublat ken nangituloy iti trabaho. Iti las-ud ti innem a lawas, nadalus ken natalgeden ti amin a kontaminado a balbalay dagiti Saksi.

Sentro Administratibo ken Pito a Rehional a Sentro

Kabayatanna, gimmatang ti komite ti saranay iti nagadu a gypsum board ken dadduma pay a tinontonelada a material a pagbangon. Ngem pangipempenanda ngay iti dayta? “Idi naammuan ti manedyer ti maysa a kompania dagiti kasapulanmi,” malagip ti pannakangiwat ti komite ti saranay, “libre nga impausarna ti maysa a bodega a 5,000 a metro kuadrado ti kalawa ti suelona​!” Malaksid iti pagidulinan kadagiti material a pagbangon, adda pay siled ti bodega a mabalin a pagopisinaan. Di  nagbayag, daytat’ nagbalinen a sentro administratibo ti panangsaranay, a nagtrabahuan ti agarup 200 agingga iti 300 a boluntario iti adu nga aldaw, rabii, ken, ngudo ti lawas.

Gapu ta dagiti nadadael a balbalay ket naiwaras iti intero a nalawa a lugar, naipasdek dagiti babbabassit a sentro, wenno rehional a sentro ti saranay, iti pito a Kingdom Hall. Kadagiti ngudo ti lawas, kumaribuso ti adu a boluntario iti tunggal rehional a sentro. (Kitaenyo ti kahon a “Rehional a Sentro ti Aktibidad.”) Adu kadakuada ti nagboluntario idin nga agaramid kadagiti Kingdom Hall iti rehion. Kinapudnona, timmulong dagiti boluntario nga adda paglainganda iti konstruksion manipud iti 11 a nadumaduma a Regional Building Committees idiay Arkansas, Louisiana, Oklahoma, ken Texas. * Iti tunggal rehional a sentro, dagiti karpintero, pintor, tubero, ken dadduma pay a batido a trabahador ti nangidaulo ken nangsanay iti dadduma pay.​—Kitaenyo ti kahon a “Dagiti Programa a Mangsanay.”

Plano ken Impormasion a Naurnong iti Computer

Sinurot dagiti boluntario ti maysa a pito ti pasetna a pamay-an ti panagbangon. Namimpat ti pannakaitulod dagiti materiales a pagbangon kadagiti pagtaengan, ken nayeskediul a matarimaan ti tunggal balay iti tallo a ngudo ti lawas.” Iti kasta, mairingpas ti intero a panangsaranay iti agarup innem a bulan.

Tapno agballigi ti plano, nangbuangay ti komite iti 22 a departamento, agraman ti departamento a mangasikaso kadagiti detalye ti trabaho, aggatang, mangyurnos iti pagdagusan, ken mangasikaso iti panagbunag ken panagitulod dagiti trak. Amin a departamento ket tinulongan ti inaramid dagiti boluntario nga adut’ saklawenna nga impormasion a naurnong iti computer. Sakbay a nangrugi ti panagtarimaan, sangapulo nga aldaw nga inserrek dagiti boluntario ti impormasion. “Naunday ken narigat dayta a panangiserrek kadagiti impormasion,” kinuna ti maysa a damag. Ngem idi nalpas dayta, mabalinen a magun-odan ti nagadu a makatulong a detalye. Babaen laeng ti panangilitik iti mouse ti computer, makitan iti impormasion a naurnong iti computer no kaano nga umay ti 11,000 a boluntario, no ania ti paglainganda, ken no kasanoda a makontak. Babaen ti sabali pay a panangilitik, makita ti kasasaad dagiti matartarimaan, dagiti kasapulan a permiso iti panagbangon, ken dadduma pay a detalye maipapan kadagiti nadadael a balbalay. Ti naurnong nga impormasion iti computer ti nagdinamag kas “ti kangrunaan a paset ti panangsaranay.”

Kasta Unay ti Ragsak ken Panagyamanda

Dagiti balbalay nga awananen iti buot ken namagan ket sinarungkaran dagiti boluntario a batido iti panagaramid iti balbalay tapno maikeddengda no ania ti nasken a pangtarimaan iti nadadael. “Dagitoy a boluntario ti nangpattapatta kadagiti kasapulan a material agingga iti bilang dagiti kasapulan a lansa,” kinuna ti maysa a pannakangiwat. “Dimi kayat a sayangen ti aniaman a pondo wenno naidonar a material.” Maigiddato iti dayta, dadduma kadagiti boluntario ti nangipagna kadagiti kasapulan a permiso iti panagibangon manipud kadagiti opisial ti siudad.

Simmaganad, naawis dagiti naapektaran a pamilia a mapanda iti bodega tapno agpilida kadagiti  limitado a koleksion dagiti alpombra, aparador, estante, vinyl a pangsuelo, ken dadduma pay a kasapulan a maisukat kadagiti napukaw kadakuada. Kasta unay ti ragsak dagiti biktima ti layus ken masansan a makasangitda no makitada dagiti maisagut kadakuada. Dagiti biktima ket binalakadan met dagiti boluntario a paglainganda ti insurance ken paglintegan ti gobierno. Kalpasanna, nayeskediulen ti pannakatarimaan dagiti balbalay, ket iti eksakto nga aldaw a kasapulan ti grupo dagiti agtarimaan ti material a pagbangon, intulod ida dagiti boluntario a nagmaneho ken nagserbi kas pahinante ti trak. Maysa a di Saksi a natarimaan ti nadadael a balayna ti nangibaga iti Saksi nga asawana: “Nakaskasdaaw dagiti kakabsatmo. Maysa a grupo ti pumanaw, ken agap-apura met a sumangpet ti sabali a grupo. Kasda la kuton nga agtrabaho!”

Dagiti kangrunaan a panangtarimaan ket naaramid iti agarup tallo a ngudo ti lawas para iti tunggal balay. “Ngem no dadduma, lima wenno walo pay ketdi a lawas,” kinuna ti tserman ti komite. Idi naikkat dagiti diding kadagiti daanen a balay, masansan a nadlaw dagiti boluntario dagiti datin a nadadael, isu a dida kayat ti mangikabil kadagiti baro a diding a dida tarimaanen nga umuna dagitoy nabayagen a problema. Kinuna ti maysa a boluntario nga artesano: “No dadduma, nakitami nga an-anayenen dagitoy, isu a siniertomi a maikisap dagiti anay. Masansan a dagiti awanan ti inasikasomi tapno matarimaan dagiti bambanag. Pinanawanmi a napintasen ti kasasaad dagiti balbalay.” Malagip ti maysa a biktima ti layus ti rikna ti adu a makimbalay idi siyayaman nga imbagana iti maysa a sangaili: “Napimpintas itan ti balayko ngem idi ginatangko dayta!”

 Dagiti Taraon a Napartak ti Pannakaisaganada

Tapno adda taraon dagiti adu a boluntario, adda grupo dagiti Saksi a pinagbalinda ti maysa a bodega iti likudan ti maysa a Kingdom Hall a pagisaganaan ken pagibunongan iti taraon. Nagdonar dagiti Saksi iti intero a pagilian kadagiti refrigerator, freezer, dishwasher, paglutuan, ken dadduma pay nga alikamen iti kosina. Kada Sabado ken Domingo, 11 a kosinero ken agarup 200 pay a boluntario ti nagisagana iti rinibu a taraon iti sentro. Kinuna ti boluntario a nangaywan iti kosina: “Sangapulo ket siam a tawenen nga agisagsaganakami iti taraon para kadagiti proyekto a panagibangon iti adu a Kingdom Hall, ngem dakdakkel daytoy a proyekto ngem iti impagarupmi.”

Nayempake dagiti taraon iti 120 a dadakkel a pagkargaan. Nailugan dagitoy iti 60 nga agur-uray a lugan, a nangitulod kadagiti taraon iti amin a rehional a sentro ken iti sentro administratibo. Kabayatanna, tunggal grupo nga agtartrabaho iti maysa a pagtaengan ket nagibaon iti maysa a boluntario iti naituding a rehional a sentroda tapno alaenna ti taraon para iti intero a grupo. Kadagiti balay a pagtartrabahuanda ti nanganan dagiti boluntario sada intuloy manen ti nagtrabaho.

Nairingpasen ti Mision!

Kamaudiananna, idi Abril 2002, nairingpasen ti 11,700 a boluntario ti maysa kadagiti kabayagan pay laeng a kampania ti panangsaranay nga inaramid dagiti Saksi ni Jehova. Nakabusbos dagiti boluntario iti 1,000,000 nga oras a nangtarimaan wenno nangibangon manen iti 8 a Kingdom Hall ken 723 a balbalay. Kastoy ti inyebkas ti maysa a biktima ti layus nga aglulua gaput’ panagyamanna para iti biang ti adu pay a kas kenkuana: “Agyamanak ken ni Jehova ken kadagiti boluntario iti amin nga intulongda. Makaliwliwa unay ti agbalin a paset ti naayat a panagkakabsat!”

[Footnotes]

[Kahon/Ladawan iti panid 21]

REHIONAL A SENTRO TI AKTIBIDAD

Sabado ita iti alas 7:00 ti agsapa idiay Rehional a Sentro Num. 4 iti makin-amianan a daya ti Houston. Agsasarita, agkakatawa, agkapkape, ken mangmangan iti doughnut dagiti aglalanglang a boluntario idiay Kingdom Hall. Dadduma ti nagmaneho iti ginasut a kilometro manipud iti ilida tapno makapanda sadiay. Ngem idi alas 7:30 ti agsapa, nagsardeng ti naragsak a saritaanda bayat nga indauluan ti manangaywan iti rehional a sentro ti pannakailawlawag ti maysa a teksto iti Biblia. Sakbay a napan dagiti boluntario iti pagtrabahuanda, impakaammona met a maangay ti Panagadal iti Pagwanawanan inton Domingo iti alas 7:30 ti agsapa, ket pinaregtana ti amin a makipasetda iti panagadal babaen ti panagkomentoda iti Ingles man wenno Español. Indanonna met ti pakomusta ti sangalubongan a hedkuarter dagiti Saksi ni Jehova ket daytat’ pinalakpakan ti amin.

Kalpasanna, imbaga ti manangaywan iti rehional a sentro ti kabaruan a damag maipapan kadagiti panagregget a mangsaranay ken sibabara a nagyaman kadagiti boluntario gapu iti kinatulokda. Inyimtuodna: “Adda kadi siasinoman kadakayo ditoy a dina ammo ti aramidenna wenno papananna ita?” Awan ti nagitayag iti imana. “Mano ti mayat a mangan?” Amin ket nagitayag, isu a nagkakatawada amin. Kalpasanna, nagkararagda ket ti 250 a boluntario​—lallaki, babbai, ubbing agraman dagiti lallakay ken babbaket​—ti napanen kadagiti pagtrabahuanda ken sisasaganadan para iti agmalmalem manen a nagaget a panagtrabahoda.

Kasta met laeng ti mapaspasamak iti innem pay a rehional a sentro ken iti bodega. Kabayatanna, dadduma a boluntario nga agtartrabaho iti sentral a kosina ti makumikomen a mangkiwkiwar kadagiti kaserola​—ngamin inton tengngat’ aldaw, nakasaganan ti nasurok a 2,000 a mabisin a boluntario iti intero a Houston a mangtagiragsak iti kalluto a taraon!

[Kahon/Ladawan iti panid 22]

DAGITI PROGRAMA A MANGSANAY

Kabayatan ti panangsaranay, adda dagiti klase nga indauluan dagiti boluntario nga artesano tapno sanayenda dagiti saan pay nga eksperto a boluntario a mangaramid kadagiti espesipiko nga annongen. Dadduma ti nasanay nga agdis-impekta iti balbalay. Nasursuro ti dadduma ti mangiplastar kadagiti diding ken agaramid kadagiti aparador. Sinursuro met ti dadduma ti agpalitada ken agpinta. Nai-videotape dagitoy a Seminar Dagiti Eksperto a Trabahador, sa nausar dagiti video kadagiti sentro tapno pangsanay kadagiti kanayonan a boluntario. “Babaen kadagitoy a seminar,” kinuna ti maysa a miembro ti komite ti saranay, “masiguradomi a nangato ti kalidad ti panagtarimaanmi.”

[Ladawan]

Dagiti artesano a mangang-angay kadagiti klase

[Kahon iti panid 24]

“TI PUDNO NGA ARAMID TI DIOS”

“Dagiti natural a didigra ket awagan dagiti kompania ti insurance kas ar-aramid ti Dios,” kinuna ti maysa a miembro ti komite ti saranay. “Nupay kasta,” innayonna, “dagiti boluntario a nagtrabaho ditoy iti adu a bulan ti pudno nga aramid ti Dios. Ti panagkakabsatmi ket maysa a milagro!” Kabayatan daytoy a panangsaranay, 2,500 wenno ad-adu pay a boluntario ti immay nagtrabaho kadagiti ngudo ti lawas. Kinuna ti tserman ti komite: “Kinanselar dagidiay di agpasueldo a boluntario dagiti naiplano a bakasionda, inyurnosda manen dagiti eskediul ti pamiliada, ken intantanda ti dadduma pay a personal a gannuatda tapno tumulongda iti maysa kadagiti kadakkelan pay laeng a panangsaranay nga inaramid dagiti Saksi ni Jehova.”

Kasapulan ti adu a panagsakripisio iti napaut a kampania ti panangsaranay. Ti maysa a boluntario a timmulong iti trabaho manipud idi nangrugi agingga a nalpas ket mangmangged iti 50 nga oras iti kada lawas. Nupay kasta, 40 nga oras iti kada lawas ti inusarna iti panangsaranay. “Ni Jehova ti mangpappapigsa kaniak,” kinunana. “Damdamagen dagiti am-ammok, ‘Adda kadi sueldom iti dayta?’ Imbagak kadakuada, ‘Awan ti umdas a maisueldo iti panangaramidko iti daytoy.’” Kadagiti ngudo ti lawas, kalpasan ti makalawas a pananggedda, adda pamilia manipud iti estado ti Louisiana a nagbiahe iti 800 a kilometro iti agpapan agawid tapno tumulongda iti panangsaranay. Adu ti nagmalmalem a nagtrabaho sada nagbiahe manen a nagawid. Kastoy ti imbaga ti maysa a grupo a buklen ti 30 a batido a boluntario a nagbiahe iti pito agingga iti sangapulo nga oras iti agpapan laeng: “Makagunggona dayta.” Adda pay boluntario a nagpakada iti panggedanna iti alas 3:30 ti malem sa nagboluntario iti sentro administratibo agingga iti alas 10:00 ti rabii. Timmulong met kadagiti ngudo ti lawas. “Makapnek dayta,” kinunana.

Kinapudnona, dagitoy ken amin a dadduma pay a boluntario ti situtulok a timmulong gapu iti nainkabsatan nga ayat​—ti pagilasinan dagiti pudno a Kristiano. (Juan 13:35) Kalpasan a sinarungkaranna ti sentro administratibo ti trabaho a panangsaranay, natukay ti mayor iti Houston a mangibaga iti maysa a grupo dagiti Saksi: “Mamatikayo iti panangtungpal iti ibagbaga ti Dios nga aramidentayo. Iyap-aplikaryo dagiti patpatienyo.”

[Ladawan iti panid 20, 21]

Nalayus ti Houston idi Hunio 9, 2001

[Credit Line]

© Houston Chronicle

[Ladawan iti panid 21]

Nagbalin a karayan dagiti haywey

[Ladawan iti panid 21]

Nalayus dagiti balbalay

[Dagiti Ladawan iti panid 23]

Ti dadduma kadagiti rinibu a Saksi a nagserbi kas boluntario

[Ladawan iti panid 24]

Nagisagana dagiti trabahador iti kosina iti nasurok a kakapat a milion a taraon!

[Picture Credit Line iti panid 19]

NOAA