Manipud Kadagiti Agbasbasa

Panagdayaw Sakbay a nagbalinak a maysa kadagiti Saksi ni Jehova, diak pulos mailawlawag no ania ti kapanunotak maipapan iti Dios. Pudno a nailawlawag ti serye iti akkub a “Mabalin Kadi a Dayawek ti Dios iti Wagas a Kayatko?” (Abril 22, 2002) no apay a natignayak nga agadal iti Biblia idi damo. Panggepko a patulodan iti kopia ti tunggal miembro ti pamiliak.

B. R., Estados Unidos

Pakasaritaan ti Biag Nakasangitak gapu iti rag-o ken ladingit idi binasak ti pakasaritaan ti biag a “Nupay Adu ti Pakasuotak, Nagtalinaed a Naraniag ti Namnamak.” (Abril 22, 2002) Ti kinatured ni Brother Hanák idi agtawen iti 20 ti nangipalagip kaniak a mabalintayo ti agpannuray ken Jehova a mapabilegna ti pakinakem uray dagiti agtutubo tapno maitandudoda dagiti nalinteg a pagalagadanna. Pagyamanan iti agtultuloy a panagimprentayo iti kakasta a nasayaat nga artikulo a mangipapaay iti kasapulanmi a pammaregta iti napeggad a panawen a pagbibiagantayo.

K. G., Estados Unidos

Agimtuod Dagiti Agtutubo Maysaak nga ubing a lalaki nga agtawen iti 11, ket kayatko ti agyaman kadakayo gapu iti artikulo nga “Agimtuod Dagiti Agtutubo . . . Kasano Ngay no Mairana a Kaeskuelaak ti Makasabaak?” (Pebrero 22, 2002) Napadasak metten ti kasasaad nga inlawlawag dagiti agtutubo iti artikulo. Idi nabasak dayta, naawatak a rumbeng a diak ibain ti napateg ken naganetget a mensahe nga idandanontayo kadagiti tattao. Pagyaman unay iti daytoy nga impormasion.

D.D.S., Italia

Sangapulo ti tawenko. Pagyamanan iti daytoy nga artikulo. Kabigatanna kalpasan a nabasak dayta, napanak nangasaba ken saanak unayen a madanagan. Ngamin, inyaplikarkon ti pammagbaga ti magasin.

D.D.C., Italia

Ti artikulo nga “Agimtuod Dagiti Agtutubo . . . Apay a Nagrigat ti Makipagnaed iti Kakuartok?” (Abril 22, 2002) ket naisurat para kaniak! Maysaak nga amin-tiempo nga ebanghelisador, ket innem a bulan a nagkaduakami iti kakuartok. Kas iti kinuna ti artikulo, mabalin a makapainteres ti makipagnaed iti maysa a tao a naiduma ti pannakapadakkelna, ngem mabalin met a makapasikor. Babaen ti tulong dagiti dadakkelko, papanglakayen, ken ni Jehova, in-inut a binalbaliwak ti panangmatmatko. Ita, kayatkon ti umakar a kadua ti kaparehak iti maysa a kongregasion a dakdakkel ti pakasapulanna. Panagkunak, impaay ni Jehova daytoy nga artikulo kas regalo kaniak!

I. S., Japan

Naisangsangayan ti kaipapanan kaniak ti artikulo nga “Agimtuod Dagiti Agtutubo . . . Kasano a Makasabaak Dagiti Kaeskuelaak?” (Marso 22, 2002) Malagipko a medio agalikakaak idi a mangiranud iti pammatik iti sumagmamano a padak nga estudiante ken nangnangruna iti maysa a gayyem a mangraem kadagiti patpatiek. Saankamin a nagkinnita iti sumagmamanon a tawen ti napalabas agingga idi naammuak a nagpayadal iti Biblia kadagiti Saksi ni Jehova. Agpadakami itan a panglakayen iti kongregasion ken nagsayaat nga aggayyem. Kas impakita ti artikulo, kanayon a nasayaat dagiti ibunga ti pannakisarita iti sabsabali maipapan ken Jehova.

J.R.M., Brazil

Makaisuro iti Amin Aniaman ti Edadda Talaga a magustuak dagiti magasinyo agsipud ta makapainteresda saan laeng a para kaniak no di ket uray kadagiti annakko. Adu a periodiko ken magasin ti mangipapaay iti dakes nga impluensia kadagiti agtutubotayo. Iti kasumbangirna, pasayaatenyo ti kinatao dagiti agtutubotayo. Pagyamanan iti lawag nga ipapaayyo kadakami.

G. M., Russia