Nagbalin a Natalna a Kalat ti Makapapatay Idi a Gandat

KAS INSALAYSAY NI TOSHIAKI NIWA

Maysa a dati a piloto a Hapones a nasanay iti panangraut a kamikaze, wenno panagpakamatay a panangbomba iti barko dagiti Americano kabayatan ti Gubat Sangalubongan II ti mangisalaysay no kasano ti panagriknana bayat nga ur-urayenna idi ti makapapatay a gandat.

GAPU ta nakaro ti pannakaabak ti Japan iti Battle of Midway idi Hunio 1942, simmardeng ti panangpalawa dagiti Hapones iti masakupanda iti Pacifico. Nanipud idin, nagtultuloy a naabak ti Japan iti nadumaduma a pannakirupakna maibusor iti Estados Unidos ken dagiti aliadona bayat a rinugianda nga iturayan dagiti teritoria a dati a sinakup ti Japan.

Idi Setiembre 1943, impakaammo ti gobierno ti Japan a maayaban itan nga agsoldado dagiti estudiante iti unibersidad a dati a naipuera nga agsoldado. Idi Disiembre, iti edad a 20, nagbalinak a paset ti navy manipud iti unibersidad. Makabulan kalpasanna, nagadalak iti kinapiloto. Idi Disiembre 1944, sinanaydak nga agbalin a piloto ti maysa a kita ti pakigubat nga eroplano a napanaganan iti Zero.

Kamikaze Special Attack Force

Maab-abak idin ti Japan. Idi Pebrero 1945, dimmegdeg ti panangbomba dagiti B-29 a pakigubat nga eroplano iti Japan. Maigiddato iti dayta, inasitganen ti naval task force ti E.U. ti kangrunaan a paset ti pagilian, ket pinagbalinna dayta a puntiria dagiti mangbomba nga eroplanona.

Sumagmamano a bulan kasakbayanna, inkeddeng dagiti lider ti militar iti Japan a makigubatda iti kaudian a gundaway babaen ti panangusarda kadagiti taktika ti panagpakamatay. Nupay nabatad idin a maabak ti Japan iti gubat, dayta a desision ti nangpapaut iti dangadang, ket sigurado a rinibu dagiti natay gapu iti dayta.

Dayta ti gapuna a nabuangay ti Kamikaze Special Attack Force. Naipasurot dayta iti nadiosan nga angin a ni kamikaze. Sigun iti tradision, maysa a bagyo dayta a nangitayab kadagiti barko dagiti rimmaut a taga Mongolia idi maika-13 a siglo. Iti kaunaan a panangraut dagiti kamikaze, lima a pakigubat nga eroplano a Zero a tunggal maysa ket nakargaan iti 250 a kilo a bomba para iti panagpakamatay a panangbomba iti puntiria a barko.

Naibilin a maorganisar ti espesial nga agpakamatay nga iskuadron ti Yatabe Naval Flying Corps, a nakaikamengak. Naikkankami amin iti porma a suratanmi, nga ibagbagami  nga agboluntariokami nga agbalin a miembro ti agpakamatay a grupo dagiti rumaut.

Patiek idi a rumbeng nga isakripisiok ti biagko para iti pagiliak. Ngem uray no situtulok nga ipaayko ti biagko babaen ti panangimaniobrak iti eroplano para iti panagpakamatay a gandat, mabalin a paltogandak sakbay a makadanonak iti puntiria, ken matayak nga awan serserbina. Maragsakan ngata ni nanangko no keltayek ti biagko a diak matungpal dagiti rebbengek iti pamiliak? Diak makombinsir ti bagik a ti panagboluntariok para iti panagpakamatay a gandat ti kasayaatan a pangusarak iti biagko. Ngem kaskasdi a nagboluntarioak.

Idi Marso 1945, nabuangay ti kaunaan a grupo ti Yatabe Special Attack Corps. Nupay 29 kadagiti kakaduak ti napili, saanak a napili. Kalpasan ti naisangsangayan a pannakasanayda, nayeskediulen ti panagtayabda iti Abril para iti panagpakamatay a gandat manipud iti base dagiti eroplano idiay Kanoya iti distrito ti Kagoshima. Sakbay a nayakarda idiay Kanoya, sinarungkarak dagiti gagayyemko tapno maammuak ti riknada bayat a maipasangoda iti panagpakamatay.

“Mataykaminto,” kalmado a kinuna ti maysa kadakuada, “ngem dika agdardaras a matay. No adda makalasat a siasinoman kadakami, rumbeng nga ibagananto iti sabsabali ti kinapateg ti talna ken ikagumaanna a gun-oden dayta.”

Idi Abril 14, 1945, pimmanawen dagiti kakaduak. Sumagmamano nga oras kalpasanna, dimngegkami amin iti brodkas tapno maammuanmi dagiti resulta. Kinuna ti brodkaster: “Ti Kaunaan a Yunit ti Showa ti Kamikaze Special Attack Force rimmaut iti task force dagiti kabusor iti baybay, iti daya ti Kikai Shima. Natayda amin iti rinnupak.”

Ohka​—Tao a Bomba

Kalpasan ti dua a bulan, nayakarak idiay Konoike Naval Flying Corps kas miembro ti Jinrai Special Attack Squadron. Ti Jinrai kayatna a sawen “ti nadiosan a gurruod.” Ti iskuadron ket buklen dagiti nakabase iti takdang nga eroplano (a maawagan iti Attacker), a kumuyog kadagiti pakigubat nga eroplano, ken pagbomba nga eroplano.

Manipud iti tunggal “ina” nga eroplano​—kayatna a sawen, ti doble ti makinana nga Attacker​—agbitbitin ti maysa nga Ohka, a “sabong ti cherry” ti kaipapananna. Dayta ti nangisimbolo kadagiti agtutubo a piloto a situtulok a mangisakripisio iti biagda. Ti Ohka ket maysa-ti-tugawna a glider a ti kaatiddog ti payakna ket 5 a metro ken agtimbang iti 440 a kilo. Nakabalan ti pannakasungona iti agarup sangatonelada a bomba.

Bayat a ti ina nga eroplano ket umasideg iti puntiria, ti piloto ket aglugan iti Ohka, a maisina inton agangay manipud iti ina nga eroplano. Kalpasan ti apagapaman a panagalindayagna babaen ti tulong ti tallo a rocket, a tunggal maysa ket agpaut iti sangapulo a segundo, agsuek dayta iti puntiria. Mabalin a maawagan daytoy a tao a bomba. Apaman a maipatayab, saanen nga agsubli!

 Kadagiti panagensayo, ti maysa a piloto ti Ohka ket aglugan iti pakigubat a Zero sa agsuek iti puntiria manipud iti kangato nga agarup 6,000 a metro. Nakitak ti sumagmamano a piloto a natay gapu kadagitoy a panagensayo.

Kasakbayan a natudinganak iti iskuadron, nakapanawen ti umuna a grupo. Buklen dayta ti 18 nga Attacker a nakabalan kadagiti Ohka, a kinuyog ti 19 a pakigubat nga eroplano. Nadagsen ken nabuntog dagiti Attacker. Awan kadakuada ti nakadanon kadagiti puntiriada. Amin nga Attacker ken dagiti kakuyogda ket pinabettak dagiti pakigubat nga eroplano ti E.U.

Gapu ta awanen ti nabati a mangkuyog a pakigubat nga eroplano, masapul nga agbiahenton ti Jinrai Squadron a bukbukodna kadagiti masakbayan a misionna. Pulos a din nakasubli dagidiay nagbiahe. Natayda amin, ken napukawda iti lugar a paggugubatan iti Okinawa.

Dagiti Maudi nga Aldaw ti Gubat Sangalubongan II

Idi Agosto 1945, nayakarak idiay Otsu Naval Flying Corps. Ti base a nakaibaonak ket adda iti sakaanan ti Hiei-zan nga asideg ti siudad ti Kyoto. Kas panagpadaan iti panaglanding dagiti puersa ti E.U. iti kangrunaan a paset ti Japan, naiplano a maipatayab kadagiti Ohka manipud iti bantay tapno agpakamatay dagitoy a mangraut kadagiti barko ti E.U. Naisaad dagiti pagpatayaban a riles ti eroplano iti tapaw ti bantay.

Naguraykami iti bilin nga agtayabkamin. Ngem saan a pulos a dimteng ti bilin. Kalpasan a nadadael ti Hiroshima ken Nagasaki gapu iti bomba atomika idi Agosto 6 ken 9, naan-anay a simmuko ti Japan iti Estados Unidos ken kadagiti aliadona idi Agosto 15. Nagpatingga met laengen ti gubat. Nagistayan idin a diak nakalasat.

Idi arinunos ti Agosto, nagawidak iti ilik a Yokohama, ngem dimmapon ti balayko gaput’ panangbomba dagiti eroplano a B-29. Awanen iti namnama ti pamiliak. Natay ni manangko ken ti kaanakak a lalaki gapu iti uram. Nupay kasta, naliwliwakami idi sitatalged a nakasangpet ti adiek a lalaki.

Iti laksid dagiti dadael ken nakaro a kinakirang ti taraon, nageskuelaak manen iti unibersidad tapno turposek ti panagadalko. Kalpasan ti makatawen, nagturposak ken nakastrekak iti trabaho. Idi 1953, inkallaysak ni Michiko ket idi agangay nagbalinak nga ama ti dua nga annak.

Ti Panangbirokko iti Talna

Idi 1974, nagpayadal ni Michiko iti Biblia kadagiti Saksi ni Jehova. Di nagbayag, makigimgimong ken mangaskasaban. Diak idi kayat ti masansan nga iruruarna ngem inlawlawagna a ti Nakristianuan a ministerio ket mangitantandudo iti pudno a talna ken kinaragsak. No kasta, kinunak iti un-unegko, diak rumbeng a busoren no di ket makitunosak ketdi.

Agarup iti dayta met la a tiempo, nangtangdanak iti sumagmamano nga agtutubo a Saksi nga agbantay iti rabii. Idi immay dagiti agtutubo a Saksi, saludsodak ida maipapan iti organisasion ken ministerioda. Nasdaawak idi naammuak a saan a kas kadagiti kasadaranda, naipamaysa ti panagreggetda ken managsakripisioda. Nasursuroda dagita a kalidad manipud iti Biblia. Inlawlawagda a saan a mangidumduma iti puli dagiti Saksi iti intero a lubong ken sipipinget a tungtungpalenda ti bilin iti Biblia nga ayatenda ti Dios ken dagiti kaarrubada. (Mateo 22:36-40) Ibilangda a kakabsatda dagiti kakaduada, aniaman ti nasionalidad dagitoy.​—Juan 13:35; 1 Pedro 2:17.

‘Idealismo laeng dayta,’ kinunak iti un-unegko. Gapu ta aglalaban ti adu a denominasion ti Kakristianuan, diak patien a naiduma dagiti Saksi ni Jehova.

 Imbagak kadakuada dagiti panagduaduak. Babaen ti panangusar ti maysa nga agtutubo a Saksi iti Yearbook of Jehovah’s Witnesses, impakitana kaniak a naibalud ken napapatay pay ketdi dagiti Saksi idiay Alemania gapu iti neutralidadda iti sidong ti rehimen ni Hitler. Idin a nakombinsirak a pudno a Kristiano dagiti Saksi ni Jehova.

Kabayatanna, insimbolon ni baketko ti dedikasionna iti Dios babaen ti panagbautisarna idi Disiembre 1975. Inawisdak a makipagadal iti Biblia iti dayta a kanito. Nupay kasta, diak inawat daydi a tukon gapu ta napanunotko dagiti pinansial nga obligasionko kas iti panangpaadalko kadagiti annakko ken ti babayadak a salda ti balaymi. Balbaliwan dagiti kasado a lallaki iti kongregasion dagiti panggedanda tapno ad-adu ti panawenda iti pamilia ken espiritualidadda. Impagarupko no kasta met ti namnamaenda kaniak. Ngem kalpasan nga insuroda no kasano nga agbalin a natimbeng ti Nakristianuan a panagbiagko ken ti panggedak, inkeddengko met laeng idi agangay ti makipagadal iti Biblia kadagiti Saksi ni Jehova.

Pangngeddengko nga Agserbi iti Dios ti Talna

Kalpasan ti panagadalko iti dua a tawen, dinamag ti mangyad-adal kaniak iti Biblia no napanunotkon nga idedikar ti biagko iti Dios. Nupay kasta, diak pay inaramid dayta isu a maburiborak.

Maysa nga aldaw, agap-apuraak nga immulog iti agdan ti lugar a pagtartrabahuak. Naitibkolak, natnagak, naipakpak ti ulok, ken naawananak iti puot. Idi nakapuotak, nakasaksakit ti ulok ket intaraydak idiay ospital babaen ti ambulansia. Nupay nakaro ti imbal iti ulok, awan sugatna wenno saan a nagdara ti utekko.

Anian a yamanko ken Jehova gapu iti biag nga impaayna! Nanipud idin, determinadoakon a mangusar iti dayta a mangaramid iti pagayatanna, isu nga indedikarko ti biagko kenkuana. Idi Hulio 1977, nabautisaranak iti edad a 53. Nakipagadal met iti Biblia ti inauna nga anakko a ni Yasuyuki ket nabautisaran dua a tawen kalpasanna.

Sangapulo a tawen kalpasan ti panagbautisarko, nagretiroak iti trabahok. Iti panaglabas dagiti tawen, tinaginayonko ti natimbeng a Nakristianuan a panagbiag ken panangged. Ita, addaanak iti pribilehio nga agserserbi kas panglakayen ditoy Yokohama, ket busbusbosek ti kaaduan a panawenko iti Nakristianuan a ministerio. Agserserbi ti inauna nga anakko kas panglakayen ken amin tiempo a ministro iti kabangibangmi a kongregasion.

Yantangay nalasatak ti espesial a mangraut nga iskuadron ken ti makapapatay a gandatna, agyamanak ta sibibiagak ken ibilangko a maysa a dayaw ti makipaset iti pannakaikasaba “daytoy naimbag a damag ti pagarian.” (Mateo 24:14) Naan-anay a kombinsidoak a ti panagbalin a paset ti ili ti Dios ti kasayaatan a panagbiag. (Salmo 144:15) Iti asidegen a baro a lubong, saanton a mapasaran dagiti tattao ti gubat yantangay “ti nasion saanto a mangitag-ay iti kampilan maibusor iti nasion, saandanto met a sursuruenen ti pannakigubat.”​—Isaias 2:4.

No pagayatan ti Dios, kayatkonto a maam-ammo dagidiay natay iti gubat a mapagungarto. Makaparagsakto ti makisarita kadakuada maipapan iti natalna a panagbiag a mabalinda a tagiragsaken iti paraiso a daga iti sidong ti panangituray ti nailangitan a Pagarian ti Dios!​—Mateo 6:9, 10; Aramid 24:15; 1 Timoteo 6:19.

[Ladawan iti panid 19]

Idi addaak iti naval air force

[Ladawan iti panid 18, 19]

“Ohka”​—Tao a bomba

[Credit Line]

© CORBIS

[Ladawan iti panid 20]

Dagiti kakaduak sakbay ti mision nga agpakamatay. Siak ti maikadua manipud iti kannigid ken ti kakaisuna a nakalasat

[Ladawan iti panid 21]

Kaduak ni baketko a Michiko, ken ti inauna a barok a ni Yasuyuki

[Picture Credit Line iti panid 18]

U.S. National Archives photo