Ti Solusionna iti Arimbangaw

“Agtartrabahoak iti maysa a kompania nga agar-aramid kadagiti ay-ayam. Kaaduanna, maulit-ulit dayta a trabaho, isu a maipalubos kadagiti empleado a dumngegda iti musika. Maysa kadagiti katrabahuak a dumna kaniak ti pannakasiledna ket kaay-ayona ti dumngeg iti naalas a musika. Dayta a kita ti musika ket magustuan met ti dua pay a katrabahuak iti seksion nga ayanko. Ngem para kaniak, maysa a pakasuotan ti dumngeg iti dayta iti walo nga oras iti kada aldaw.

“Tiningitingko dagiti pagimbagan ti panagtalinaedko iti panggedak. Ti umuna ket kanayon a palubosannak ti superbisorko a tumabuno kadagiti kombension distrito ken espesial a miting dagiti Saksi ni Jehova nga adda iti amin-tiempo a serbisio. Kasta met nga asideg laeng ti biahiek no mapanak iti panggedak, ken ti eskediulko ti mangipalubos kaniak a maaddaan iti panawen para iti ministeriok.

“Inasitgak dagiti katrabahuak ket kiniddawko kadakuada buyogen ti panagraem a baliwanda ti dengdenggenda a musika wenno pakapsutenda ti unina. Nagreklamoda iti superbisormi. Inayabannak ti superbisor iti opisinana. Kinunana: ‘Sharon, saanmo a makomberte daytoy a kompania iti relihionmo. Mabalin a denggen dagiti empleadomi ti aniaman a kayatda.’

“Dinamagko ngarud no mabalin nga itugotko ti bukodko a cassette player agraman dagiti earphone. Immanamong. Nangitugotak kadagiti cassette tape dagiti nairekord a Pagwanawanan. Daytoy ti nakatulong kaniak tapno maliklikak ti dumngeg iti naalas a musika. Ti panagdengngeg kadagiti tape ti nangpabileg met iti espiritualidadko.”​—Kas insalaysay ni Sharon Quan.