Manipud Kadagiti Agbasbasa

Sangalubongan a Talna Nagsayaat ti pannakaisurat ti serye nga “Arapaap Laeng Aya ti Sangalubongan a Talna?” (Mayo 8, 2002). Rumbeng a basaen dayta dagiti amin a politiko. Naglawag ti panangisalaysay dagiti publikasionyo iti nasken a maammuan ti maysa a tao ken no kasano koma ti panagbiagna.

J. S., Czech Republic

Kinamasindadaan ti Maysa nga Agtutubo Kanayon a kayatko idi nga ibaga kadakayo ti panangapresiarko unay kadagiti magasinyo, isu a kamaudiananna, inkeddengkon nga aramiden dayta kalpasan a nabasak ti artikulo a “Nagunggonaan ti Kinamasindadaanna a Mangyun-una.” (Mayo 8, 2002) Itay nabiit, napadasak ti napasaran ni Stella. Maragsakanak a makaammo nga adda dagiti kas kaniak nga agtutubo iti intero a lubong a mangyun-una ken ni Jehova iti panagbiagda. Dagiti kapadasan a kas kadagitoy ket makaparegta iti amin, agpadpada kadagiti agtutubo ken natataengan.

L. P., Estados Unidos

Dagiti Animal Kabasbasak ti artikulo nga “Am-ammuem ti Misterioso nga Snow Leopard.” (Mayo 8, 2002) Kaay-ayok ti tunggal parsua ni Jehova, nangruna dagiti burboran! Maluksawak a nakabasa a manmano laengen nga snow leopard ti nabati. Panunotenyo no kasano ti panagrikna ni Jehova maipapan iti daytoy.

D. R., Estados Unidos

Hankul Sangapulo ket tallo ti tawenko, ket nagustuak ti artikulo a “Padasentayo ti Agsurat iti Hankul!” (Mayo 8, 2002) Nanipud idi ammokon ti agbasa, interesadoak unay kadagiti ganggannaet a pagsasao. Sapay koma ta iti masakbayan ket agimprentakayo iti ad-adu pay nga artikulo maipapan kadagiti ganggannaet a pagsasao!

B. J., Estados Unidos

Sangapulo ket maysa ti tawenko, ket naammuak a nakaskasdaaw ken mabalin nga usaren ti Hankul uray kadagiti sasao a saan a Koreano. Nalaka a maawatan dayta. Pagyamanan iti panangipablaakyo iti daytoy nga artikulo!

J. I., Estados Unidos

Dagiti Lawwalawwa Nagustuak ti artikulo a “Ti Lawwalawwa nga Agpammarang a Kuton.” (Abril 22, 2002) Anian a nakaskasdaaw a Namarsua ni Jehova! Segseggaak ti agbiag iti baro a lubong, inton ad-adu ti masursurok maipapan kadagiti pinarsuana.

P. P., Sri Lanka

Barko Dagiti Balud Nasurok a 50 a tawenen nga agbasbasaak kadagiti magasinyo. Nabiit pay a nabasak ti artikulo a “Ti Nagdakes a Panawen Dagiti Balud Idiay Australia.” (Abril 22, 2002) Iti panid 13, nadakamatyo ti pannakapukaw idi 1883 ti barko nga Amphitrite a nagluganan dagiti Britano a balud. Para kaniak, maysa a kamali daytoy. Sigun iti panagsirarakko, ti barko ket aktual a napukaw idi Agosto 1833. Mayataday unay dayta iti panawen dagiti balud a naisalaysay iti artikulo, a nagpatingga idi 1868.

D. B., Scotland

Kastoy ti sungbat ti “Agriingkayo!”: Agpayso a dinakamat ti reperensia ti artikulomi a napukaw ti “Amphitrite” idi 1833. Dispensarendakami iti kamalimi.

Agimtuod Dagiti Agtutubo Pagyamanan iti panangipablaakyo iti artikulo nga “Agimtuod Dagiti Agtutubo . . . Kasano Ngay no Mairana a Kaeskuelaak ti Makasabaak?” (Pebrero 22, 2002) Adu a tawenen ti napalabas, maysaak idi a managbabain unay ken beddal a barito. Marigatanak a mangasaba, nangruna no mairana a kaeskuelaak ida. Ammok a nagdakkel ti maitulong daytoy nga artikulo iti dadduma nga agtutubo.

W. T., Estados Unidos

Nainsiriban a Pammagbaga Pagyamanan iti panangipaayyo iti nawadwad ken makaisuro a babasaen. Nagadu a suheto ti saklawen dagiti artikuloyo, ket saan a kas iti adu a publikasion, saan a mangidumduma ken raraemen ti publikasionyo ti pammati ti dadduma a tattao. Ti Agriingkayo! ket nagbalinen a nasinged ken naynay a gayyemko, a pagtaudan ti nainsiriban a pammagbaga a makatulong kaniak a mangsaranget kadagiti parikut iti biag buyogen iti namnama.

N. P., Brazil