Naisangsangayan a Trabaho​—Ngem Pagay-ayatko

NASINGA ti kinatalingenngen ti agsapa gapu iti ungor ti naisangsangayan a bilogko bayat ti ipapanawko iti nakataltalna a sangladan ti Gibson. Agbannawagen idi ket agrubbuatakon a mapan agsapul iti birbirokek.

Iti makinlaud a kosta ti Canada, adu a trabaho ti mainaig iti panagbakir ken panagtroso, a kas iti trabahok. Ngem manmano ti naisangsangayan a trabaho a kas iti trabahok. Aggabatak kadagiti troso. Saan a kabbaro a trabaho daytoy. Kinapudnona, maikapaten a kaputotan ti dadduma kadakami nga aggabgabat. Mabalin a pagarupem nga agurnongkami kadagiti naibasura a mabalin nga usaren manen! Agtartrabahoak idiay Howe Sound ken iti Strait of Georgia, iti baet ti Vancouver Island ken ti aplaya iti British Columbia. Daytoy a lugar ket paset ti Vancouver Log Salvage District.

Maysa kadagiti kangrunaan a pamay-an ti panangyakar dagiti kompania nga agtrostroso kadagiti pinukanda a kayo a maawagan troso ket babaen ti tali a mamagsisilpo kadagiti mayan-anud a troso, wenno babaen kadagiti bilog. Naekonomia ti panangibiahe kadagiti troso iti danum. Ket gapu iti Taaw Pacifico, adu ti danum ditoy. Ngem, adu a banag ti pakasapulan iti kinasigo. Napartak nga agbaliw ti angin ken ti panagugot ken panagatab ti baybay, ken kellaat dagiti bagyo, isu nga adu a troso ti mapukaw. Dayta ti pakasapulan kadagiti aggabat.

Panaggabat Kadagiti Napukaw a Troso

Dagiti laeng lisensiado nga aggabat iti troso ti mabalin nga aggabat kadagiti mabalin nga ilako a troso a nakalapsut kadagiti tali wenno bilog. Tinawen nga aglisensia dagiti aggabat. No damo a maited, mapakuyogan dayta iti pagmarka a martilio nga addaan iti naisangsangayan a numero ti lisensia. Magabat ti aniaman a troso a masarakan a tumtumpaw wenno naisadsad no agatab. Markaanmi nga umuna dayta iti pakabigbiganmi a numero.

Nasken met ti maysa a bilog a kompleto dagiti alikamenna. Daytoy ket saan a maysa a bilog a mausar a paglinglingayan. Agusarkami kadagiti nalagda a babassit a bilog a de motor wenno bilog a pagguyod a napuskol dagiti kaskoda. Adda dagiti landok a pagiduron kadagiti troso a naikabil iti proa ti bilog, ken kanayon nga aduankami kadagiti tali. Daytoy ket dandani uppat a metro a nalagda a tali nga addaan iti natirad a metal a maawagan dog a naikabit iti pungtona. No makasarakkami iti troso a magabat, ipalokmi a naimbag ti dog  iti troso ket igalutmi ti tali iti mangguyod a bilog. Addaankami met iti amin a kasapulan nga alikamen tapno natalgedkami.

Mabiit la a maammuan ti agdadamo nga aggabat nga adu pay ti masapul a masursurona iti daytoy a trabaho ngem iti pagarupna iti damo. Mangrugi ti trabaho iti agbannawag iti aniaman a kita ti paniempo iti intero a tawen. Iti panawen ti lam-ek, mabalin a masapul a burakenmi dagiti yelo tapno makapanawkami iti sangladan.

Sadino ti pakasarakan kadagiti troso? Agpannuray dayta iti dua a banag: ti panagatab ken panagugot ti baybay ken ti angin. Ti aduanen iti kapadasan nga aggabat kitaenna ti tsart ti ugot ken atab sakbay a rummuar iti bigat. Kasayaatan no agatab iti kasta unay agsipud ta ad-adu ti masarakan a troso. Malaksid iti dayta, nalaklaka a guyoden dagiti troso iti aplaya no agatab.

Kanayon a napateg ti panangsiput iti paniempo. Kankanayon a siputanmi ti angin, langit ken ti panaggaraw dagiti ulep, ken ti kolor ti danum. Ti abagat nga aggapu iti daya mangyeg iti tudo, ngem ti angin nga aggapu iti laud masansan a kaipapananna ti nasirnaat a tangatang ngem nadaleg ti baybay. Ti kasaor, nga aw-awaganmi iti Squamish, ti pakpakauna ti makaketter a paniempo no panawen ti lam-ek, nadaleg a danum, adu  a niebe, ken namnamaenmi nga adu dagiti napukaw a troso.

Kanayon a makaparagsak ti panangipalok iti dog iti tumtumpaw a troso, ngem ad-adda a makaparagsak ti panangiguyod kadagiti troso iti takdang. Dagiti nalmeng a bato iti uneg ti danum mabalin a lussokenda ti kasko ti bilogmi ket talaga a madadael. Masapul a nasiputkami.

Bayat ti panangurnongmi kadagiti troso, guyodenmi dagitoy kadagiti nadumaduma a lugar a natalingenngen sa igalutmi. Mabaybay-anda sadiay agingga iti linawas nga aldaw ti panangiguyod. Dayta ti aldaw a panangurnong ken panangitulodmi kadagiti nagabatmi a troso, a manipud 50 agingga iti 100, iti puesto dagiti aggatang, a sadiay matimbang ken maikeddeng ti presioda. Kalpasanna, mabayadankamin sigun iti gatad dagiti nagabatmi a troso.

Mabalin a nakaay-ayat daytoy a panggedan, ngem agannadka! Daytoy a trabaho ket saan a para kadagiti takrot. Adu dagiti peggad ken risgo. Mabalin nga agpeggadka no saanmo a masiputan ti paniempo. Naimbag ta ti Howe Sound ket aduan kadagiti lugar a natalingenngen a pagurayan iti ilalabas ti bagyo. Adda pay sabali a peggad: No matinnag iti bilog ti di nasiput nga aggabat no panawen ti lam-ek, mabalin a makapapatay ti sumagmamano laeng a minuto a kaaddana iti nakalamlamiis a danum. Ket malagipmo kadi dagiti nadakamat itay a tali? No ti dog ket saan a maipalok a naimbag iti troso, mabalin a malapsut ket agpallating iti bilog. Makaparagsak ta sumagmamano laeng nga aggabat ti napaltikan iti dog, ngem maysa dayta a kapadasan a di pulos malipatan.

Personal a Gunggona ken iti Aglawlaw

Apay a pagay-ayatko ti trabahok? Ti Howe Sound ket paset ti baybay a nalatak a pagbakasionan, a sadiay dagiti tattao sipapartak nga aglayagda ken agpataray kadagiti bilogda. Ken gapu ta adu dagiti isla, adda ginasut a balay a pagbakasionan ken bilog a de motor. Agmalmalem ti panagibiahe kadagiti bisita a sumangpet ken agawid. Gapu iti peggad a patauden dagiti troso, nalaka laeng a makita ti kinapateg ti trabahomi.

Makatulongkami a mamagbalin a natalged iti dalan dagiti bilog no gabatenmi dagiti napukaw a troso. Lumned ti dadduma a troso a nabayagen a tumtumpaw iti danum. Nalabit sumagmamano laeng a pulgada ti nakaruar iti danum a mamagpeggad kadagiti agbilbilog. Nupay kasta, nasayaat dagitoy a troso a gabaten ken ilakomi. No gabatenmi, pagbalinenmi a natalged ti dalan iti danum ken makatulongkami a mangdalus iti aglawlaw.

Makaparagsak ken pagay-ayatko daytoy a trabaho. Saan nga agpapada dagiti aldaw. No addaak iti danum, agbaliwbaliw ti buya iti aglawlawko iti kada minuto. Nakakitaakon kadagiti makakayaw nga ileleggak ti init iti panawen ti lam-ek a mamagbalin a maris rosas iti niebe a nangkumot kadagiti bantay. Kadagita a tiempo, pagay-ayatko ti kinalamiis ti angin iti baybay.

Gagangayen a makakitaak kadagiti atap nga animal. Nakakitaakon kadagiti otter, marten, sea lion, ken adu a foca. Nabuyak dagiti agila nga agkalkalap ken dagiti ugsa nga aglanglangoy a mapan ken pumanaw kadagiti isla iti taaw. Anian a makapaamanga a makita ti porpoise a maay-ayatan iti parsiak ti danum a bisngayen ti paligpalig ti bilogko, ti ilalabas ti dapuen a balyena, wenno ti pangen dagiti killer whale a bumatok kadagiti dalluyon!

Nangrugi ni apongko a lakay nga aggabat idi dekada 1930. Impatawidna ti panagayatna iti danum ken iti panangsawar iti aplaya kadagiti annakna a lallaki. Wen gayam, ti agsawar iti aplaya ket agbirbirok kadagiti napateg ken mabalin pay nga ilako a tumtumpaw iti danum. Impatawid met ni tatangko ti panagayat ken panagraem iti daytoy a trabaho kadagiti annakna. Idi nataenganakon, pinilik daytoy a trabaho. Siempre, saan a daytoy ti kapatgan a trabaho iti biagko. Umun-una ti panagserbik iti Dios ken adayo nga ad-adda a makagunggona. Ngem nagasatak met ta pagay-ayatko ti sekular a trabahok iti agarup 50 a tawenen. Magagaranak pay laeng a mapan agbirok kadagiti troso.

Kaduak met ti pamiliak nga agtrabaho. No dadduma, iti nadagaang a rabii ti kalgaw, mapankami amin iti aplaya. No guyodenmi dagiti troso iti sangladan a malikudanmi ti makapaamanga nga ilelennek ti init, dagiti sea gull nga agkikiak iti tangatang, ti sumilsilap a panagsabuag ti nagnaan ti bilog, ken ti panangrugi dagiti silaw nga agsilnag iti aplaya​—amin dagitoy ti mangiparikna iti talna ken pannakikaykaysa iti Namarsua. Awanen ti mapanunotko a nasaysayaat a rason no apay a pagay-ayatko ti trabahok.​—Naipatulod.

[Ladawan iti panid 10]

Aggabgabat a manggalgalut iti troso a nasarakan iti aplaya

[Dagiti Ladawan iti panid 10]

Gagangayen ti makakita kadagiti atap nga animal iti panawen ti panaggabat

[Ladawan iti panid 11]

Nakalukat latta ti Howe Sound a paglakuan ti troso uray no panawen ti lam-ek