‘Agtulnogkami iti Dios Imbes a Kadagiti Tattao’

Idi agtawen iti 17, maysa ni Adam kadagiti tallo a nangabak iti salip nga indauluan ti U.S. Holocaust Memorial Museum. Dagidiay dandani 500 a nakipaset iti salip nagusarda iti arte wenno sursurat a mangiladawan iti kinatured iti sidong ti panangirurumen dagiti Nazi. Maysa a Saksi ni Jehova ni Adam, ket panggepna ti mangaramid iti collage a maysa a napinturan a ladawan a naaramid iti papel a naidait iti lupot tapno iladawan ti rigat a napasaran dagiti karelihionanna iti sidong ti turay a Nazi. Ti arte, kuna ni Adam, iparangarangna ti rag-o imbes a pannakaabak wenno sakit ti nakem, ta napagballigian dagiti Saksi ni Jehova dayta naranggas a panangirurumen. Adda naipakita a maysa nga ubing. Apay? “Tapno ipakita nga uray dagiti ubbing naanduranda ti panangidadanes dagiti Nazi,” kuna ni Adam.

Nagdinamag a bayat ti turay dagiti Nazi, nagtukiad dagiti Saksi ni Jehova nga agsaludo ken Hitler wenno sumuporta iti napolitikaan a partidona. Nailadawan ti takderda iti makinngato a kannawan ti collage ni Adam. Adda naadaw a surat nga impatulod ti amin a kongregasion dagiti Saksi ni Jehova iti gobierno ti Alemania idi Oktubre 7, 1934. Kinuna ti paset ti surat: “Direkta nga agsubang ti lintegyo ken ti linteg ti Dios, ket kas panangtulad kadagiti matalek nga apostol, ‘masapul nga agtulnogkami iti Dios imbes a kadagiti tattao,’ ket kasta ti aramidenmi. (Aramid 5:29) . . . Yantangay ti gobiernoyo ken dagiti opisialna itultuloydakami a piliten a sumukir iti kangatuan a linteg ti uniberso, maipapilit itan nga ipakaammomi kadakayo a dakami, babaen ti asina, agtulnogkami ken Jehova a Dios ket agtalekkami a naan-anay Kenkuana a mangispal kadakami manipud amin a panangirurumen ken manangirurumen.”

Ipagpannakkel ni Adam ti naespirituan a tawidna. “Sititibker a patien dagiti Saksi ni Jehova ti saan a panangdangran kadagiti padada a tao ken awan ti sabali a pagdayawan no di ti Dios, uray no kaipapanan daytoy ti ipapatay,” kunana. Naiparangarang ti di maisin a takder dagiti Saksi ni Jehova iti paulo ti collage ni Adam nga: “Agtulnogkami iti Dios Imbes a Kadagiti Tattao!”