Manipud Kadagiti Agbasbasa

I-PLAY

Manipud Kadagiti Agbasbasa

Globalisasion Apresiarek ti serye ti akkub a “Globalisasion—Lunod Wenno Solusion?” (Mayo 22, 2002) Nakaatenderakon iti sumagmamano a lekteur maipapan iti globalisasion ket nakitak a mangidumduma dagiti presentasion ken paboranda ti maysa a grupo. Pinaboran dagiti nagpalawag ti globalisasion babaen ti panangibagada kadagiti pagimbagan nga ipaayna wenno binabalawda ngem awan ti impaayda a solusion wenno pamuspusan. Ngem kas impakita dagiti artikuloyo, iyegto ti Pagarian ti Dios ti globalisasion nga agpaay a pagimbagan ti tunggal maysa kadatayo. Anian a panangseggak kadagita a nagimbag a panagbalbaliw iti masanguanan!

E. F., Pilipinas

Nakaisuratkayo manen iti nagsayaat nga artikulo a makagun-odto iti aglaplapusanan a pammadayaw. Kas ipaganetget ti konklusionyo, ti panagturay ti Pagarian ti Dios iti paraiso a daga ti kakaisuna a solusion para iti sangatauan. Kayatko laeng nga iyebkas ti panangapresiarko iti nagsayaat a trabahoyo a panagsurat kadagiti artikulo a maitutop iti napeggad nga al-aldaw a pagbibiagantayo.

G. B., Ireland

Kayatko ti agyaman kadakayo gapu iti nadayaw a trabahoyo a panagebanghelio. Nabasak ti serye a “Globalisasion—Lunod Wenno Solusion?” ket masdaawak iti kinaumisona. Tulongannatayo daytoy a serye a mangbigbig iti limitasiontayo kas tattao. Tulongannatayo met a mangapresiar a no saantayo nga agbiag a maitunos kadagiti linteg ni Jehova, saan nga agballigi dagiti bambanag.

J. D., Belgium

Kayatko nga ibaga a nagustuak dagiti artikuloyo maipapan iti globalisasion. Nagsayaat ti pannakaisurat ken pannakayilustrarda. Sakbay a binasak dagitoy nga artikulo, awan idi ti ammok maipapan iti termino, ngem ita naawatakon a naimbag. Kanayon a magustuak ti agbasa iti Agriingkayo!

E. K., Peru

Panagdengngeg Pagyamanan unay iti artikulo a “Saluadam ti Panagdengngegmo!” (Mayo 22, 2002) Umuna pay la a tawenko iti panagsanayko kas maysa nga espesialista iti hearing-aid, isu a makitak dagiti epekto ti uni iti inaldaw. Ti nangnangruna a napateg ket mailasin koma dagiti agtutubo dagiti uni a dengdenggenda iti inaldaw.

C. K., Alemania

Agimtuod Dagiti Agtutubo Nagadu ti nasursurok iti artikulo nga “Agimtuod Dagiti Agtutubo . . . Kasano a Makabirokak iti Kakuarto a Makatunosak?” (Mayo 22, 2002). Baketakon, ngem nabiit pay a nagdiborsiokami ken lakayko. Diak ninamnama a gapu iti kinangina dagiti masapsapul iti biag, saankon a kabaelan ti agbukbukod. Ti laeng pamuspusan ket agbirokak iti kakuarto. Pampanunotek a gapu ta baketakon, mabalin nga agparikutak. Adda agtutubo a sister a kakongregasionko a makasapul met iti kakuarto. Nagkabbalaykami. Talaga a bendision kadakami dayta nga urnos. Di nagbayag, narigatankami iti pinansial, ket adda pay sabali a sister a nakikabbalay kadakami. Makunak nga iti laeng organisasion ni Jehova a mabalin nga agkakabbalay a sitatalna ken siaayat ti 60 ti tawenna ken dua nga agtutubo a babbai a nagduduma ti naggapuanda a kasasaad ti panagbiag! Nagbalinkami a maysa a bassit a pamilia, ket iti adu a pamay-an, dayta ti nangep-ep iti kinaliday iti biagmi.

L. G., Estados Unidos

Panangmatmat iti Lubong Agyamanak iti artikulo iti “Panangmatmat iti Lubong” a napauluan “Pannakaawat iti Sakit ti Isip.” (Mayo 22, 2002) Naaddaanak idin iti bipolar disorder iti 18 a tawen. Nupay adda daytoy a sakitko, adu ti naaramidak iti biagko. Napadakkelko ti tallo a babbarok ken naimbag met ti panangtaripatok iti asawak. Nakatulongak met iti dadduma a tao a maaddaan iti pannakaammo iti Biblia. Addaanak iti naayat a pamilia ken gagayyem iti kongregasion. Agyamanak iti Agriingkayo! Mangmangted iti padapada nga adal kadatayo amin.

H. B., South Africa

[Picture Credit Line iti panid 30]

AGRIINGKAYO!